Amb. Mutsindashyaka yatanze kopi z’impapuro zimwemerera guhagararira u Rwanda i Brazzaville

Yanditswe na IGIHE
Kuya 1 Mata 2021 saa 06:48
Yasuwe :
0 0

Ambasaderi Mutsindashyaka Théoneste yashyikirije Minisitiri w’Ububanyi n’Amahanga wa Congo-Brazzaville, Jean-Claude Gakosso, kopi z’impapuro zimwemerera guhagararira u Rwanda muri icyo gihugu.

Uyu muhango wabaye ku wa Gatatu w’iki cyumweru, tariki ya 31 Werurwe 2021. Wabaye hubahirizwa amabwiriza yo kwirinda Coronavirus arimo kwambara neza agapfukamunwa no guhana intera.

Nyuma yo gutanga impapuro zimwemerera guhagararira u Rwanda muri Repubulika ya Congo, Ambasaderi Mutsindashyaka Théoneste yagiranye ibiganiro byihariye na Minisitiri Jean-Claude Gakosso.

Aba bombi baganiriye ku mubano mwiza umaze igihe kirekire hagati y’ibihugu byombi ndetse n’izindi ngeri zitandukanye zihuriweho n’ibihugu byombi.

Mutsindashyaka azwi cyane muri politiki y’u Rwanda kuko yabaye Umuyobozi w’Umujyi wa Kigali, Guverineri w’Intara y’Iburasirazuba n’Umunyamabanga wa Leta muri Minisiteri y’Uburezi.

Kuva mu 2013 yari Umunyamabanga Nshingwabikorwa w’Umuryango ushinzwe kurwanya ikwirakwiza ry’Intwaro nto n’iziciriritse mu Karere k’Ibiyaga Bigari, mu Ihembe rya Afurika no mu bihugu bihana imbibi RECSA (Regional Centre on Small Arms).

Mutsindashyaka yemerejwe nka Ambasaderi w’u Rwanda muri Congo mu Nama y’Abaminisitiri yateranye ku wa 14 Kanama 2020. Yasimbuye Amb Dr Habyalimana Jean Baptiste.

U Rwanda na Congo bifitanye umubano wihariye mu bya dipolomasi ndetse kuva muri Kanama 2016 ruhafite ambasade.

Mu 2011, u Rwanda na Congo byasinyanye amasezerano y’ubufatanye n’imikoranire mu bwikorezi bw’indege, ubucuruzi, ubukerarugendo, imiturire, imicungire y’impunzi, ingufu, umutekano, ubutabera, kurengera ibidukikije, uburobyi, ikoranabuhanga, itumanaho n’ibindi.

Ambasade y’u Rwanda muri Congo yanahawe ubushobozi bwo guhagararira inyungu z’u Rwanda mu bihugu bitandatu bihuriye mu Muryango w’Ubukungu bwa Afurika yo Hagati CEEAC, aribyo Cameroun, Gabon, Guinée Equatoriale, Tchad, Repubulika ya Centrafrique na CEEAC ubwayo.

Kuva mu Ukwakira 2018, Repubulika ya Congo yorohereje Abanyarwanda bajyayo, guhabwa viza bageze ku mipaka no ku bibuga by’indege.

U Rwanda na Congo bifitanye umubano mwiza, buri cyose gifite ugihagarariye mu kindi. Ubuhahirane hagati yabyo kandi bunoroshywa n’ingendo za RwandAir.

Ambasaderi Mutsindashyaka Théoneste na Minisitiri w’Ububanyi n’Amahanga wa Congo-Brazzaville, Jean-Claude Gakosso, banagiranye ibiganiro byihariye
Ambasaderi Mutsindashyaka Théoneste ashyikiriza Minisitiri w’Ububanyi n’Amahanga wa Congo-Brazzaville, Jean-Claude Gakosso, kopi z’impapuro zimwemerera guhagararirayo u Rwanda
Ambasaderi Mutsindashyaka Théoneste na Minisitiri w’Ububanyi n’Amahanga wa Congo-Brazzaville, Jean-Claude Gakosso, bafata ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .