00:00:00 IGIHE NETWORK KN KINYARWANDA EN ENGLISH FR FRANCAIS

Amb. Mukantabana yakebuye Abanyarwanda bari mu mahanga barebera abasebya urwababyaye

Yanditswe na Dufitumukiza Salathiel
Kuya 6 Nyakanga 2021 saa 03:17
Yasuwe :
0 0

Ambasaderi w’u Rwanda muri Leta Zunze Ubumwe za Amerika, Mukantabana Mathilde, yongeye kwibutsa Abanyarwanda baba mu mahanga kutarebera abasebya igihugu cyabo ahubwo bakaba ba “Perezida” aho bari.

Mu kiganiro yagiranye na One Nation Radio ku wa 29 Kamena 2021, Ambasaderi Mukantabana yavuze ko buri Munyarwanda agomba kumva ko aho ari ahagarariye igihugu cye akakirwanira ishyaka, baba bagize amahirwe bakahahurira ari benshi bagafatanya.

Ati “Aho uri hose uri Perezida waho ntabwo uri wenyine. Uzi ko uri kumwe n’abandi, [guhangana n’abasebya u Rwanda] n’iyo utanashaka kubikora wenyine wabikorana n’abandi muri leta zose barahari. Kuki umuntu yaza agatoba amateka yica igihugu […] kandi muzi neza ko atari byo?”

Yagaragaje ko isura nziza u Rwanda rwubatse mu ruhando mpuzamahanga ari yo ituma bagera hanze bakubahwa, bityo ko bagomba kuyirinda kugira ngo icyubahiro bahabwa kigumeho.

Ati “Igihugu cyanyu cyaragiye kibashyira mu mwanya abantu bose babubaha aho muri hose kubera ibyo gikora. Icyo washobora kugikorera ni uko batazajya baza ngo bagitere amabuye kuko iyo bamaze kwica iryo zina cyubatse nawe ntusigara uhagaze neza.”

Yakomoje ku bihugu n’abanyamahanga bakunda kwifashisha itangazamakuru baharabika u Rwanda.

Ati “Uzajya aza abeshya, muzi ko abeshya; amakuru arahari, ibihamya birahari, ni ukugenda mugahangana nabyo mukabivuga kandi ntabwo bizaba ari bibi ni ugukiza igihugu kizaba icy’abana banyu.”

Abanditsi, abanyamakuru n’abanyepolitiki bo mu Burengerazuba bw’Isi bakunze kumvikana baharabika u Rwanda, akenshi bakabivuga mu rwego rw’ubutabera.

Ambasaderi Mukantabana yabwiye Abanyarwanda ko “ntawe ubarusha kwandika” bityo ko niba abo banditse nabo bagomba kwandika babanyomoza kuko abenshi baba banabivuga batabisobanukiwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .