Amb. Karamba yashyikirije Perezida wa Seychelles impapuro zimwemerera guhagararirayo u Rwanda

Yanditswe na Karirima A. Ngarambe
Kuya 27 Mata 2021 saa 11:48
Yasuwe :
0 0

Ambasaderi w’u Rwanda muri Tanzania, Maj. Gen. Charles Karamba, yashyikirije Perezida wa Seychelles, Wavel Ramkalawan, impapuro zimwemerera guhagararira u Rwanda muri icyo gihugu.

Perezida Wavel Ramkalawan yakiriye Ambasaderi Maj. Gen. Charles Karamba mu Ngoro ye iri mu Mujyi wa Victoria, kuri uyu wa Kabiri, tariki 27 Mata 2021.

Ambasaderi Maj. Gen. Charles Karamba yavuze ko u Rwanda na Seychelles bifitanye umubano mwiza, yongeraho ko Perezida Paul Kagame yabaye umwe mu bakuru b’ibihugu ba mbere bohererereje ubutumwa bw’ishimwe mugenzi we wa Seychelles ubwo yatorerwaga kuyobora igihugu cye mu mezi atandatu ashize.

Mu kiganiro n’abanyamakuru, Ambasaderi w’u Rwanda muri Tanzania akaba anaruhagarariye muri Seychelles, yavuze ko ubufatanye hagati y’u Rwanda n’icyo gihugu giherereye mu Nyanja y’u Buhinde, uzibanda mu guteza imbere inzego nyinshi zitandukanye hibandwa ku rw’ubukerarugendo.

Seychelles iri mu bihugu bikataje cyane mu bukerarugendo, mu gihe n’u Rwanda narwo ruri mu byimakaje uru rwego ruri mu zirwinjiriza amadevize menshi.

Ambasaderi Maj. Gen. Charles Karamba yagaragaje icyizere ko ibihugu byombi bishobora gusangira ubunararibonye cyane cyane mu bijyanye n’imyigishirize y’ururimi rw’Igifaransa.

Yasobanuye ko hari byinshi bikenewe gukorwa mu bufatanye mu rwego rw’uburezi cyane ko u Rwanda na Seychelles bihuriye mu Muryango w’Ibihugu bikoresha Icyongereza, Commonwealth n’uhuza ibihugu bikoresha ururimi rw’igifaransa, Francophonie.

Ati “Ibihugu byombi kandi bizashyira imbaraga mu bufatanye mu rwego rw’umutekano, cyane cyane urwego rwa Polisi, kubera ko u Rwanda rufite ishuri ryigisha umwuga w’igipolisi.’’

Ambasaderi Maj. Gen. Charles Karamba yabaye uwa kane uhagarariye u Rwanda muri Seychelles, igihugu kigizwe n’ibirwa 115 bibarizwa mu Burengerazuba bwo mu Nyanja y’Abahinde. Yasimbuye kuri uwo mwanya Ambasaderi Eugene Kayihura na we wahagarariye u Rwanda muri Tanzania na Seychelles, afite icyicaro i Dar es Salaam, Tanzania.

U Rwanda na Seychelles bifitanye umubano mu rwego rwa dipolomasi kuva mu mwaka wa 2006.

Muri Seychelles, Ambasaderi w’u Rwanda yanagiranye ibiganiro na Visi Perezida w’icyo gihugu, Ahmed Affif. Aba bombi baganiriye ku kibazo cyugarije Isi cy’icyorezo cya Coronavirus n’ingaruka cyagize mu rwego rw’ubukungu.

Ibi biganiro byibanze ku kungurana ibitekerezo ku buryo ibihugu byakwigobotora ingaruka za COVID -19 dore ko icyo cyorezo gishobora no kuzamara igihe kirekire, bityo hakaba hakwiye kwigwa uburyo hashakishwa ibisubizo by’ibibazo biterwa nacyo.

Mu rugendo rw’akazi agirira muri Seychelles, Ambasaderi Maj. Gen. Charles Karamba, azanaganira n’abayobozi batandukanye bo mu rwego rwo hejuru barimo Perezida w’Inteko Ishinga Amategeko, Minisitiri ushinzwe Ishoramari, ushinzwe ibikorwa by’Abikorera n’Inganda, Ukuriye abadipolomate, Urwego rw’abacuruzi n’inganda n’abandi.

Ku munsi wa mbere w’uruzinduko rw’akazi muri Seychelles, ku wa 26 Mata 2021, Ambasaderi Maj. Gen Charles Karamba yagiranye ibiganiro na Minisitiri w’Ububanyi n’Amahanga n’Ubukerarugendo, Sylvestre Radegonde.

Muri Seychelles biteganijwe ko Ambasaderi Maj. Gen. Charles Karamba azatanga ibiganiro muri Kaminuza ku bijyanye n’igikorwa cyo Kwibuka ku nshuro ya 27 Jenoside yakorewe Abatutsi mu Rwanda mu 1994. Ibyo biganiro bizitabirwa n’abantu baturutse mu nzego zitandukanye muri icyo gihugu.

Ambasaderi w’u Rwanda muri Tanzania, Maj. Gen. Charles Karamba, yakiriwe mu cyubahiro gikwiriye umuyobozi wo ku rwego rwe
Abayobozi bombi banagiranye ibiganiro byihariye byibanze ku kunoza umutekano hagati y'impande zombi
Ambasaderi w’u Rwanda muri Tanzania, Maj. Gen. Charles Karamba, yashyikirije Perezida wa Seychelles, Wavel Ramkalawan, impapuro zimwemerera guhagararirayo u Rwanda
Nyuma y'uyu muhango abayobozi bafashe ifoto y'urwibutso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .