Abanyarwanda batuye muri Suède bizihije umunsi wo kwibohora bibutswa uruhare rwabo mu kubaka u Rwanda

Yanditswe na IGIHE
Kuya 18 Nyakanga 2019 saa 09:28
Yasuwe :
0 0

Abanyarwanda batuye muri Suède ku bufatanye n’Ambasade y’u Rwanda iri muri icyo gihugu bateguye umunsi wo kwizihiza imyaka 25 u Rwanda rumaze rwibohoye.

Ni birori byabereye mu mujyi wa Uppsala muri Suède tariki 13 Nyakanga 2019.

Byabanjirijwe n’imikino itandukanye bisozwa n’umupira w’amaguru wahuje ikipe y’umuryango w’ abanyeshuri b’Abanyarwanda bahiga niy’uw’Abanyarwanda n’inshuti zabo bahatuye.

Ageza ijambo ku bitabiriye ibirori, Karara Jean Noel mu izina ry’Abanyarwanda baba muri Uppsala, yashimiye Ingabo zahoze ari iza RPA zahagaritse Jenoside yakorewe Abatutsi, zikabohora u Rwanda.

Yavuze ko ari ubutwari butazibagirana mu mateka y’u Rwanda. Yakomeje avuga ko umuryango w’abanyarwanda batuye muri Uppsala wumva neza kandi ushima icyerekezo cy’Igihugu.

Ati “Dushima cyane ubuyobozi bw’u Rwanda bwasubije agaciro Umunyarwanda butibagiwe n’abatuye hanze y’Igihugu. Tuzi aho tuva, ntitwakwemera icyadusubiza inyuma na kimwe. Tuzakomeza gufatanya n’abandi kurinda ibyagezweho no gukomeza guhuriza imbaraga hamwe tugakomeza kubaka u Rwanda.”

Uhagarariye Abanyarwanda batuye muri Suède, Madamu Gloria Sebalu, yashimiye abitabiriye ko baje ari benshi.

Yagize ati “Kuza turi benshi ni uko dufite u Rwanda rwacu ku mutima kandi tunumva neza agaciro ko kwizihiza umunsi wo Kwibohora kw’Igihugu cyacu, u Rwanda n’aha turi mu mahanga.”

Ambasaderi w’u Rwanda mu bihugu byo mu majyaruguru y’u Burayi, Nkulikiyinka Christine, yavuze ko icyubahiro ari ryo shimwe rikomeye abanyarwanda bazahora baha ingabo za RPA zabohoye igihugu.

Yavuze ko u Rwanda rufite amahirwe akomeye yo kuba rufite ubuyobozi bufite icyerecyezo cyo guteza imbere abaturage .

Ati “Ntacyo twabona twitura ingabo zahoze ari iza RPA, abariho n’abatakiriho bitanze bagahagarika Jenoside yakorewe Abatutsi, bakagarura agaciro k’Igihugu cyacu. Tuzahora tubibashimira, tubibubahira. Intambwe ishimishije u Rwanda rugezeho uyu munsi kandi tuyikesha ubuyobozi bwiza dufite, ubuyobozi bwaduhaye icyerekezo gihamye, bwaciye ivangura, akarengane, imyumvire n’imikorere idahwitse, ubuyobozi bwatweretse ko imvugo ariyo ngiro.”

Yakomeje asaba abari aho ko indangagaciro z’urugamba rwo kwibohora zakomeza kubaranga aho bari mu mahanga ndetse bakazitoza n’ababakomokaho.

Yabibukije kandi ko nabo bakwiriye gukomeza kugira uruhare mu kubaka u Rwanda rwifuzwa.
No mu mujyi wa Stockholm, Ambasade yateguye igikorwa cyo kwizihiza Umunsi wo Kwibohora aho yatumiye Abayobozi batandukanye bo muri Suède abikorera, abahagarariye ibihugu byabo, inshuti z’u Rwanda n’abandi.

Ibirori byabereye kuri Waterfront Congress ku italiki ya 10 Nyakanga.

Umuyobozi wa kabiri wungirije w’Inteko ishinga Amategeko ya Suède, Lotta J Fornarve yabwiye abari aho ko ari ibyo gushima uburyo u Rwanda rwiyubatse nyuma ya Jenoside yakorewe Abatutsi, ashima iterambere riri mu nzego zose z’ubuzima bw’igihugu cyane cyane umubare w’abagore bari mu Nteko Ishinga Amategeko n’uburezi bw’umwana w’umukobwa.

Ambasaderi w’u Rwanda mu bihugu byo mu majyaruguru y’u Burayi, Nkulikiyinka Christine, yavuze ko icyubahiro ari ryo shimwe rikomeye abanyarwanda bazahora baha ingabo za RPA zabohoye igihugu
Ibirori byo kwibohora byitabiriye n'ab'ingeri zitandukanye
Umuyobozi wa kabiri wungirije w’Inteko ishinga Amategeko ya Suède, Lotta J Fornarve yabwiye abari aho ko ari ibyo gushima uburyo u Rwanda rwiyubatse nyuma ya Jenoside yakorewe Abatutsi
Karara Jean Noel mu izina ry’Abanyarwanda baba muri Uppsala, yashimiye Ingabo zahoze ari iza RPA zahagaritse Jenoside yakorewe Abatutsi, zikabohora u Rwanda
Abanyarwanda bacinya akadiho ku munsi wo kwibohora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza