Abanyarwanda baba muri Tanzania bizihije Umunsi w’Intwari

Yanditswe na Karirima A. Ngarambe
Kuya 1 Gashyantare 2021 saa 09:04
Yasuwe :
0 0

Abanyarwanda batuye muri Tanzania bifatanyije n’abandi batuye mu bihugu bitandukanye mu birori Ngarukamwaka by’Umunsi w’Intwari z’Igihugu wizihizwa ku wa 1 Gashyantare.

Umunsi w’intwari z’igihugu watangiye kwizihizwa nyuma ya Jenoside yakorewe Abatutsi mu 1994. Ni umunsi kuri ubu ugiye kwizihizwa ku nshuro ya 27.

Abanyarwanda baba muri Tanzania bizihije Umunsi w’Intwari bifashishije ikoranabuhanga (WEBEX) kubera impamvu zo kurwanya icyorezo cya COVID-19, hirindwa guhuriza hamwe abantu benshi ndetse no korohereza bamwe mu batuye bakanakorera imirimo itandukanye muri Tanzania ngo bashobore gukurikirana uwo munsi ariko banakomeza imirimo yabo.

Iki gikorwa cyayobowe na Ambassaderi w’u Rwanda muri Tanzania, Maj. Gen. Charles Karamba ari kumwe n’abakozi ba Ambasade.

Cyitabiriwe n’Abanyarwanda baturutse mu mpande zitandukanye harimo i Dar es Salaam, Arusha na Morogoro n’abayobozi barimo Vice Chairman w’Umuryango wa FPR- Inkotanyi akaba n’Umunyamabanga mukuru wungirije w’Umuryango wa Afurika y’u Burasirazuba (EAC), Depite Christophe Bazivamo.

Ambasaderi w’u Rwanda muri Tanzania, Maj. Gen. Charles Karamba, yifurije Abanyarwanda umunsi mwiza w’intwari, abakangurira gukomeza kurangwa n’ubumwe n’ubutwari mu guharanira icyateza imbere igihugu cyabo.

Yaboneyeho kubashimira ubutwari badahwema kugaragaza mu gusigasira ubumwe, kurangwa n’ubwitange no gushakira ibisubizo bimwe mu bibazo byugarije igigugu.

Ambasaderi Maj. Gen. Karamba yagarutse ku ruhare abo Banyarwanda bagize mu kunganira gahunda z’igihugu zo gufasha abagizweho ingaruka na COVID-19 ubwo batangaga umusanzu wabo mu rwego rwo kwita ku bagizweho ingaruka n’icyo cyorezo.

Yanashimiye kandi ku nkunga yabo mu kunganira Leta muri gahunda ya “Connect Rwanda’’, igamije gufasha abaturage batishoboye gutunga telefoni ngendanwa igezweho.

Mu rwego rw’imikoranire myiza ya hafi n’Abanyarwanda baba muri Tanzania, Ambasade yagennye Umunyarwanda watanze ikiganiro cyagarutse ku Munsi w’Intwari z’igihugu.

Dr. Sebasaza Mugabe Frederick, umunyeshuri wiga ibijyanye n’Ubuvuzi i Dar es Salaam, yagarutse ku mateka yaranze intwari z’igihugu, ibyiciro biranga intwari z’igihugu aribyo Imanzi, Imena n’Ingenzi.

Yavuze ku ntwari ziri muri buri cyiciro yibanda cyane ku ziri mu cy’Imanzi n’Imena mu gihe icy’Ingenzi cyo nta muntu uragishyirwamo ariko hari gukorwa ubushakashatsi ku bazakijyamo.

Bazivamo Christophe yavuze ku butwari bw’Abanyarwanda mu ngeri zitandukanye harimo no guharanira gusigasiga indangagaciro z’umuco Nyarwanda, iterambere rirambye ry’igihugu n’ubumenyi cyane cyane mu kinyejana aho Isi iri kugendana n’iterambere ryihuse.

Ambasaderi Maj. Gen. Karamba yashimangiye ibyiza byo kurangwa n’indangagaciro y’ubumwe no gutahiriza hamwe nk’Umuryango Nyarwanda uba muri Tanzania no kwirinda cyane icyorezo cya COVID -19 cyugarije Isi.

Ikiganiro cy’Intwari z’igihugu cyanyuze abacyitabiriye ndetse banatanga ibyifuzo ko banagihabwa no mu nyandiko. Biteganyijwe ko abacyitabiriye bose n’abandi batabishoboye bazagira amahirwe yo kugihabwa, banakangurirwa kumenya amateka y’igihugu himakazwa umuco wo gusoma.

Umunsi w’Intwari wabaye ku nshuro ya 27, wizihijwe mu nsanganyamatsiko igira iti “Ubutwari mu Banyarwanda, Agaciro kacu”.

Ambasaderi w’u Rwanda muri Tanzania, Maj. Gen. Charles Karamba, yifurije Abanyarwanda Umunsi Mwiza w’Intwari
Abanyarwanda baba muri Tanzania bizihije Umunsi w’Intwari

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .