Abanyarwanda baba muri Nigeria, Niger, Burkina Faso na Chad bizihije umunsi w’intwari

Yanditswe na Akayezu Jean de Dieu
Kuya 8 Gashyantare 2021 saa 09:09
Yasuwe :
0 0

Abanyarwanda batuye muri Nigeria n’abatuye mu bihugu Ambasade y’ u Rwanda iri i Abuja ishinzwe birimo Niger, Burkina Faso na Chad, bifatanyije n’inshuti zabo mu muhango wo kwizihiza Umunsi w’Intwari.

Ibi birori byabaye ku wa Gatandatu tariki 6 Gashyantare 2021, hifashishijwe ikoranabuhanga, hagarukwa ku nsanganyamatsiko igira iti ‘Ubutwari mu Banyarwanda, Agaciro Kacu’.

Umunyamabanga wa Leta muri Minisiteri y’Urubyiruko n’Umuco, Bamporiki Edouard watanze ikiganiro yagarutse cyane ku gukunda igihugu kuko ariryo shingiro ry’ubutwari akangurira abanyarwanda n’urubyiruko by’umwihariko, kurangwa n’umuco w’ ubutwari, bakiteza imbere n’igihugu cyabo muri rusange.

Ambasaderi Kamanzi Stanislas, yashishikarije abitabiriye ikiganiro kurangwa n’umuco w’ubutwari, agaruka ku butumwa bwa Perezida wa Repubulika bujyanye n’umunsi w’Intwari, asaba abantu kubugira ubwabo bakanabusangiza abandi.

Abitabiriye ikiganiro cyo kwizihiza umunsi w’Intwari nabo bahawe umwanya batanga ibitekerezo ndetse babaza ibibazo, batahana umukoro wo kurangwa n’indangagaciro zibereye Abanyarwanda.

Umunsi w’Intwari wizihizwa tariki 1 Gashyantare buri mwaka, hazirikanwa Intwari z’u Rwanda zashyizwe mu byiciro by’Imanzi, Imena n’Ingenzi kubera kurangwa n’ibikorwa by’indashyikirwa byagiriye Abanyarwanda benshi akamaro.

Abanyarwanda bo mu bihugu Ambasade y'u Rwanda muri Nigeria ishinzwe bizihije umunsi w'Intwari hifashishijwe ikoranabuhanga
Bamporiki yatanze ikiganiro cyibanze ku butwari no gukunda igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .