Abanyarwanda baba muri Koreya y’Epfo bizihije umunsi wo #Kwibohora25

Yanditswe na IGIHE
Kuya 6 Nyakanga 2019 saa 04:20
Yasuwe :
0 0

Kuri uyu wa Kane tariki ya 4 Nyakanga 2019, Ambasade y’u Rwanda muri Koreya y’Epfo yateguye umunsi wo kwizihiza isabukuru y’imyaka 25 u Rwanda rumaze rwibohoye.

Uyu munsi mukuru wizihirijwe i Seoul, ukaba witabiriwe n’Abayobozi bakuru bo muri Leta ya Koreya, abahagaririye ibihugu byabo muri Korea y’Epfo, inshuti z’u Rwanda ziba muri icyo gihugu, ndetse n’Abanyarwanda bahatuye cyane cyane abanyeshuri.

Ambasaderi w’u Rwanda muri Koreya y’Epfo, Emma Francoise Isumbingabo yashimiye intwari zitanze, zigatabara igihugu cyari mu icuraburindi ryahekuye u Rwanda mu gihe cya Jenoside yakorewe abatutsi mu mwaka 1994 yahitanye abasaga miliyoni.

Ambasaderi Isumbingabo yavuze ko nyuma yo guhagarika jenoside yakorewe abatutsi, hashyizweho guverinoma y’ubumwe bw’abanyarwanda muri yimakaza cyane cyane ubumwe n’ubwiyunge bw’abanyarwanda, indangagaciro z’ubunyarwanda, guharanira ubusugire n’umutekano w’abantu n’ibyabo, guharanira ubutegetsi bushingiye kuri demokarasi n’ibindi.

Yavuze ko ibyo byabaye ishingiro ryo guteza imbere ubunyarwanda, imiyoborere myiza, n’imibereho myiza ya buri munyarwanda.

Isumbingabo yashimangiye ko intambwe ishimishije imaze guterwa mu gihugu ishingiye ahanini ko kwishakamo ibisubizo Abanyarwanda bashyize hamwe.

Uwo munsi kandi wizihirijweho isabukuru y’imyaka 56 umubano hagati y’u Rwanda na Koreya y’Epfo umaze ubayeho, Ambasaderi Isumbingabo akaba yaraboneyeho umwanya wo gushimira leta ya Koreya ndetse n’Abanyakoreya muri rusange kubera ubushuti n’umubano mwiza biranga ibihugu byombi,.

Uwari uhagariye Leta ya Koreya y’Epfo muri uwo muhango, Ambasaderi Chang Jae-bok ushizwe Dipolomasi rusange, yatangiye yifuriza umunsi mwiza wo kwibohora ku banyarwanda bose.

Yashimiye ubuyobozi bwiza bw’uRwanda bwerekanye ko ubumwe n’ubwiyunge bushoboka, ndetse no kwiyubaka nyuma y’amarorerwa yabaye ya Jenoside yakorewe Abatutsi muri 1994.

Yashimiye kandi ubuyobozi bw’ uRwanda burangajwe imbere na Perezida Paul Kagame kubera uruhare rukomeye muri gahunda y’ubumwe bw’Afurika ijyanye no gushyiraho amasezerano y’isoko rusange ry’ubucuruzi muri Afurika (AfCFTA).

Abandi bashyitsi batanze ubutumwa kuri uwo munsi, barimo Umuyobozi Wungirije w’Inteko Ishinga Amategeko ya Koreya y’Epfo, Lee ju-young washimiye ingabo zari iza RPF Inkotanyi zabohoye uRwanda, zigahagarika Jenoside yakorerwaga abatutsi.

Yashimiye Perezida Kagame uruhare rukomeye akomeje kugira mu mavugurura y’umuryango wa Afurika yunze ubumwe agamije iterambere rirambye ry’umugabane wose.

Ibihugu byombi bifitanye umubano mwiza ugaragarira mu ishyirwa mu bikorwa ry’imishinga y’iterambere, mu nzego z’uburezi, ubuhinzi, ikoranabuhanga n’iterambere ry’icyaro.

Ambasaderi Emma Isumbingabo avuga ijambo ry'umunsi wo kwizihiza Kwibohora ku nshuro ya 25, wabereye i Seoul muri Koreya y'Epfo
Uwari uhagarariye Leta ya Koreya y'Epfo mu muhango wo Kwibohora ku nshuro ya 25, Ambasaderi Chang Jae-bok, ageza ijambo ku bantu bitariye uwo muhango
Abanyarwanda n'inshuti z'u Rwanda mu muhango wo kwizihiza kwibohora i Seoul
Umuyobozi wungirije w'Inteko Inshinga Amategeko ya Koreya y'Epfo, Hon. Lee Ju-young yashimye iterambere u Rwanda rwagezeho nyuma ya Jenoside
Umuyobozi mukuru ushinzwe umubano n'ibihugu by'Afrika muri Minisiteri y'Ububanyi n'Amahanga ya Koreya y'Epfo, Bwana Hong Jin-wook, ageza ijambo ku munsi wo kwizihiza Kwibohora ku nshuro ya 25, wabereye i Seoul muri Koreya.
Ifoto y'urwibutso y'abashyitsi bakuru bitabiriye umunsi wo kwizihiza Kwibohora ku nshuro ya 25, wabereye i Seoul muri Koreya
Itorero Umucyo ry'abanyeshuri b’abanyarwanda muri Koreya Y'Epfo ryasusukije abashyitsi mu muhango wo kwizihiza umunsi wo Kwibohora ku nshuro ya 25.
Itorero Umucyo, ry'abanyeshuri b'abanyarwanda muri Koreya Y'Epfo bari kumwe nurubyiruko rw’abanyakoreya bacinye akadiho ku munsi wo Kwibohora25

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza