Abanyarwanda baba muri Botswana bibutse Jenoside yakorewe Abatutsi banagenera mituweri abarokotse 300

Yanditswe na Mukwaya Olivier
Kuya 29 Kamena 2019 saa 10:30
Yasuwe :
0 0

Abanyarwanda baba muri Botswana bahuriye mu gikorwa cyo Kwibuka Jenoside yakorewe Abatutsi, bagenera mituweri abarokotse 300 mu rwego rwo kwifatanya na bo.

Ku wa 22 Kamena 2019 nibwo Abanyarwanda baba muri Botswana bahuriye mu gikorwa cyo Kwibuka mu murwa mukuru Gaborone, biyemeza gukusanya inkunga yo kwishyurira ubwisungane mu kwivuza abarokotse Jenoside batishoboye.

Umunyamabanga muri Komite ya Diaspora y’abanyarwanda muri Botswana, Rukundo Claude, yabwiye IGIHE ko ari igikorwa basanganywe kandi bivuza ko cyaba ngarukamwaka. Iyi nkunga yagejejwe mu Rwanda ku wa 27 Kamena, umunsi Perezida Paul Kagame yari yatangiye uruzinduko muri Botswana.

Rukundo yagize ati “Uyu mwaka twatekereje gufasha abantu 300 bacitse ku icumu rya jenoside yakorewe Abatutsi tugomba gufasha kubona mituweri, turi imiryango y’abanyarwanda 20 baba hano n’inshuti zacu, twishyize hamwe tubona 1000$ tukaba twohereje umuntu kuyashyikiriza Ibuka.’’

Yakomeje avuga ko ari amahirwe kukuba igikorwa cyo gutanga mituweri cyarahuriranye nuko Perezida Kagame yari muri Botswana.

Ati "Ni ishema kuri twe nk’abanyarwanda, ni igikorwa cyahuriranye n’uruzinduko rwe akaba ari yo mpamvu nk’abanyarwanda dukunda igihugu tugomba kubigaragaza mu bikorwa kandi ni igikorwa gikomeza."

Abanyarwanda baba muri Botswana basanzwe bafasha abatishoboye, aho guhera mu 2015 bagiye batanga ubwisungane mu kwivuza. Mu 2017 babwishyuriye abarokotse Jenoside yakorewe Abatutsi batishoboye bo mu Karere ka Nyanza, mu 2018 bishyurira mituweri abatishoye 100 bo mu karere ka Rubavu.

Abanyarwanda baba muri Botswana ubwo bibukaga ku nshuro ya 25 Jenoside yakorewe Abatutsi
Umwaka ushize Abanyarwanda baba muri Botswana bishyuriye mituweri abatishoboye 100 bo mu karere ka Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza