Kwibuka27: IBUKA yasabye u Buholandi ubufasha mu kubaka urwibutso rwa Jenoside

Yanditswe na Mukahirwa Diane
Kuya 8 Mata 2021 saa 08:22
Yasuwe :
0 0

Umuryango uharanira inyungu z’abarokotse Jenoside, Ibuka mu Buholandi, wasabye iki gihugu ubufasha mu kubaka urwibutso rwazajya rwifashishwa mu bikorwa byo kwibuka rukaba n’ikimenyetso gitanga ubutumwa ku mateka ashaririye u Rwanda rwanyuzemo mu 1994.

Ku wa 7 Mata ubwo u Rwanda n’inshuti zarwo batangiraga iminsi ijana yo kuzirikana inzirakarengane zazize Jenoside yakorewe Abatutsi, Ambasade y’u Rwanda mu Buholandi nayo yateguye umuhango wo kwibuka ku nshuro ya 27.

Uyu muhango wabaye hifashishijwe ikoranabuhanga mu kwirinda ikwirakwira rya Coronavirus. Abawukurikiye bibukijwe kwibuka biyubaka kandi barwanya ingengabitekerezo n’abapfobya Jenoside.

Nyuma yo gufata umunota wo kuzirikana abazize Jenoside yakorewe Abatutsi mu 1994, hatanzwe ibiganiro bitandukanye byagarukaga ku kwibuka no kurwanya Jenoside.

Umuyobozi wa Ibuka mu Buholandi, Safari Christine, yashimiye abacitse ku icumu uburyo babashije kurenga amateka bakongera kugira icyezere cy’ubuzima kandi bakabaho.

Ati “Usanga abarokotse bariyubatse ndetse babayeho, iki ni igikorwa cy’indashyikirwa cyagezweho.”

Safari yakomeje asaba Leta y’u Buholandi kubafasha kubaka urwibutso rwa Jenoside bakajya babasha kurukoresha mu gihe cyo kwibuka.

Ati “Turasaba leta y’u Buholandi ko yazadufasha kubaka urwibutso twajya tujya kwibukiramo, ndetse turasaba buri wese kudufasha kurwanya abapfobya Jenoside yakorewe Abatutsi.”

Mu batanze ibiganiro harimo Perezida w’Urwego rwasigariyeho Inkiko Mpuzamahanga Mpanabyaha, IRMCT, Agius Carmel, wibukije Abanyarwanda bose ko badakwiye gucibwa intege n’abapfobya Jenoside.

Ati “Abantu bose ku Isi bari kwibuka inzirakarengane zazize Jenoside yakorewe Abatutsi, nubwo hari abapfobya ndetse bakanahakana jenoside ubona ko bikibangamiye ubumwe n’ubwiyunge ariko ntibikuraho ukuri kwabaye kuri jenoside.”

Ku ruhande rw’Umunyamabanga Mukuru muri Minisiteri y’Ububanyi n’Amahanga mu Buholandi, Paul Huijts, yagarutse ku kiganiro cyigisha abana amateka y’ibyabaye mu 1994 ndetse avuga ko igihugu cye kitazahishira abakoze jenoside.

Ati “Mu myaka 25 ishize u Buholandi bwagerageje gufasha u Rwanda mu bijyanye n’ubutabera, twagerageje guhugura urubyiruko kuri byo kuko ahazaza hari mu biganza byarwo. Navuga ko u Buholandi butazigera buha umutekano abasize bakoze Jenoside.”

Mu butumwa yageneye abari bitabiriye uyu muhango, Ambasaderi Olivier Nduhungurihe, yasabye Abanyarwanda n’abatuye Isi muri rusange kwirinda amacakubiri n’ikindi cyose cyaganisha kuri jenoside.

Ati “Ndasaba buri wese kwibuka yiyubaka, turwanya ivanguraruhu, ivangurakarere, ivanguramoko, no kwirinda ibyaha byose bijyanye n’ivangura bishobora kugeza abantu kuri jenoside.”

Ibihe byo kwibuka abazize Jenoside yakorewe Abatutsi mu 1994 byahuriranye n’icyorezo cya COVID-19 cyatumye uburyo byakorwagamo buhinduka.

Umuyobozi wa Ibuka mu Buholandi,Safari Christine yasabye iki gihugu ko cyashyiraho urwibutso ruzajya rubafasha mu bikorwa byo kwibuka abazize Jenoside yakorewe Abatutsi
Uwari uhagarariye Minisiteri y'Ububanyi n'Amahanga y'u Buholandi, Paul Huijts yavuze ko igihugu cye kitazigera gihishira abasize bakoze Jenoside mu Rwanda
Amb Olivier Nduhungirehe yasabye Abanyarwanda kwirinda amacakubiri yabageza kuri Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .