Abanyafurika baba mu Bubiligi bibumbiye mu ihuriro rigamije ishoramari ku ivuko

Yanditswe na Karirima A. Ngarambe
Kuya 30 Ugushyingo 2017 saa 10:27
Yasuwe :
0 0

I Bruxelles mu Bubiligi haherutse guteranira inama igamije guteza imbere ishoramari hagati y’Umuryango w’Ubumwe bw’u Burayi n’Umugabane wa Afurika.

Ni inama ibaye ku nshuro ya mbere yateguwe n’ihuriro ry’abanyafurika baba ku mugabane w’u Burayi “Brussels Africa Hub” aho basangira ibitekerezo ku iterambere ry’umugabane bavukamo.

Komite Nyobozi y’iri huriro irimo abaturutse muri Guinée, RDC, u Bubiligi, u Burundi ndetse n’u Rwanda.

Mu kiganiro IGIHE yagiranye n’Umunyarwanda Gilles Bazambanza, ushinzwe ibikorwa muri Brussels Africa Hub, yavuze ko bafite intumbero yo guteza imbere abikorera ku giti cyabo mu bihugu bakomokamo bya Afurika.

Ati “Dufite ibintu bibiri by’ingenzi navuga twiyemeje harimo gushaka abashoramari bihariye ku mishinga itandukanye muri Afurika no gushaka ku ruhande rwa Afurika ibigo byaza gushaka abafatanyabikorwa mu Burayi. »

Abibumbiye muri iri tsinda bamwe bakora ibikorwa by’ikoranabuhanga, abakora mu rwego rw’amabanki, mu bucamanza n’ahandi.

Bazambanza yakomeje atangaza ko mu nama iherutse guhuza aba banyafurika, hari hatumiwemo abantu b’ingeri zitandukanye zirimo abafite ubunararibonye mu bijyanye n’ubwubatsi bw’amashuri baturutse muri Afurika y’Epfo, abo muri Angola n’u Bwongereza bubaka inzu z’ubucuruzi.

Hari n’abandi bakora iby’ubwubatsi hagati ya Côte d’Ivoire na Nigeria. Ati “hari kandi n’uwaturutse muri Congo Kinshasa, bose bakaba batanze ibiganiro mu buryo butandukanye bujyanye n’ubumenyi bwabo mu bihugu bakoreramo n’uburyo ki byafasha abandi kubigeraho no guhabwa izo serivise aho baba bari hose ku Isi cyane ariko muri Afurika.”

Gilles Bazambanza ati “Iki ni igikorwa kimwe mu byo twiyemeje kuko dushaka guhindura imyumvire ya bamwe mu Banyaburayi babona Afurika ukundi.”

Iyi nama yasoje abari bayitabiriye basobanuriwe ko Afurika atari igihugu ahubwo ari umugabane ugizwe n’ibihugu 54, gifite umwihariko w’ubukungu n’umuco wacyo, kandi ko bitandukanye kubikoreramo kubera ko buri igihugu cyihariye.

Umunyarwanda Gilles Bazambanza, ushinzwe ibikorwa muri Brussels Africa Hub aganira na IGIHE

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza