Nta gihugu tuzi cyitwa Hutu ngo kibe gifite Diaspora Hutu- Alice Cyusa

Yanditswe na Uwishyaka Jean Louis
Kuya 16 Ugushyingo 2016 saa 08:39
Yasuwe : XX
0

Abayobozi bahagarariye Diaspora Nyarwanda hirya no hino ku Isi bahuriye mu nama yari igamije gushakira hamwe uko barandura burundu amacakubiri ashingiye ku moko akigaragara hamwe na hamwe mu Banyarwanda baba mu mahanga.

Aba bayobozi bemeza ko bahangayikishijwe cyane no kubona uretse abakuru, usanga no mu rubyiruko harimo benshi bakibona mu ndorerwamo y’amoko.

Mu kiganiro IGIHE yagiranye na Alice Cyusa uyobora RDGN, Diaspora Nyarwanda ku rwego rw’Isi, yavuze ko ’inama yabaye taliki ya 12 Ugushyingo 2016, twaganiriye ku kibazo cy’amacakubiri muri Diaspora, kuko tubona gisa nkaho cyongera ubukana, aho kugenda gicika burundu’.

Aba bayobozi bamaganye ibikubiye mu cyiswe ’ubushakashatsi bwakorewe mu Bubiligi na Dr Claudine Kuradusenge, akabuha inyito igira iti: "Denied Victimhood and Contested Narratives: The Case of Hutu Diaspora", ugenekereje mu kinyarwanda "Kutemera ko warokotse no kugoreka amateka: Ikibazo cy’Abahutu bo muri Diaspora". Bemeza ko ubu bushakashatsi bugamije kwimakaza no gukwirakwiza amacakubiri ashingiye ku moko muri Diaspora Nyarwanda.

Alice yavuze ko banasomye kandi inyandiko yanditswe n’umwe mu banyeshuri yitwa "Hutu Diaspora", maze nayo bakayamaganira kure bavuga ko nta gihugu bazi cyitwa "Hutu" kugira ngo kigire iyo Diaspora.

Mu rwego rwo gushakira hamwe umuti ufatika wo kurandura ayo macakubiri burundu, biyemeje kurushaho kwigisha no gusobanura gahunda ya Ndi Umunyarwanda muri Diaspora kuko basanze hakwiye kurushaho kubaka ubumwe n’ubunyarwanda muri bo.

Abo bayobozi kandi biyemeje kujya habaho inyigisho ndetse na gahunda zo kurandura amacakubiri, bakazigenera umwanya uhagije muri gahunda z’ibikorwa za buri mwaka bakora mu mahuriro yabo.

Hemejwe kandi ko hagomba kujya habaho inyandiko (publications, articles) zamagana ibyo bikorwa bizana amacakubiri mu banyarwanda baba mu mahanga. Basanze hakwiye kujya habaho kuganirizwa guhoraho n’inararibonye mu mateka kugira ngo abana b’abanyarwanda batazayoba bagata indangagaciro n’umuco w’amahoro umaze kugerwaho mu gihugu, ibi bikazakomeza hifashishijwe gahunda ya “Ndi Umunyarwanda”.

Alice yakomeje avuga ko hemejwe kandi ko buri Diaspora Nyarwanda aho iri hose yajya ishyiramo imbaraga zose mu kurwanya amacakubiri badategereje ababasura baturutse mu Rwanda, nkuko muri bimwe zishinzwe harimo gutanga umusanzu w’amahoro n’ubumwe mu banyarwanda muri rusange no mu bakiri bato by’umwihariko.

Diaspora ifatanyije na za Ambasade z’u Rwanda ngo bazakomeza gukorera hamwe mu guhashya amacakubiri biciye mu buryo bw’ ibiganiro biganisha kuri gahunda ya Ndi Umunyarwanda.

Hatanzwe icyifuzo cy’uko, hakoreshwa uburyo bushya bw’ibiganiro mu mashusho “video conferences”, hagati y’inararibonye n’abanyarwanda baba mu mahanga, kandi ibiganiro bagirana bikaba inshuro nyinshi mu mwaka, kuko guhangana n’iki kibazo ngo ari uguhozaho.

Abayobozi ba Diaspora bemeje gukomeza gufatanya n’abakuru mu gutanga uburere bwiza ku bakiri bato kugira ngo bazagirire igihugu akamaro kuruta kugicamo ibice, kuko aho cyavuye ari habi kandi kikaba gifite icyerecyezo cyiza.

Bagize bati "Hagomba kwirindwa guhora hashakishwa uburyo ikibaye cyose kitirirwa abandi, urugero : abazungu, ibibazo dufite ni ibyacu, nitwe tugomba kwishakamo ibisubizo."

Aba bayobozi bifuje ko ku munsi wahariwe " Diaspora Homecoming Day" uzaba taliki ya 14 Ukuboza 2016, mbere y’Umushyikirano, hazabaho ibiganiro hagati y’Abayobozi ba Diaspora Nyarwanda, Abanyarwanda bakuru baba mu mahanga n’Urubyiruko ruzaba rurangije Itorero ry’Urungano, rizaba mu Ukuboza, kugira ngo bigire hamwe kandi bafate ingamba zikomeye zo kurandura ibisigisigi by’amacakubiri bikirangwa hamwe na hamwe mu bana b’u Rwanda baba mu mahanga.


Alice Cyusa agiye kumara imyaka ibiri ayobora Ihuriro rya Diaspora Nyarwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza