Amerika: Urubyiruko rw’u Rwanda mu bukangurambaga bwo gushyigikira ‘HeForShe’

Yanditswe na Ishimwe Israel
Kuya 29 Nzeri 2016 saa 06:53
Yasuwe : XX
0

Umuyobozi w’Urubyiruko n’Umuco muri Diaspora Nyarwanda muri Midwest, Rutsobe Nsengiyumva yasabye abitabiriye Rwanda Day iheruka kubera i San Francisco ko bagomba kongera imbaraga mu gushyigikira gahunda ya ‘HeForShe’ mu rwego rwo gushimangira ihame ry’uburinganire n’ubwuzuzanye bimaze kugera ku ntambwe ishimishije mu Rwanda.

Rutsobe yagaragaje ko u Rwanda rufite amahirwe menshi yo kwesa umuhigo ndetse rukegukana umwanya wa mbere mu bihugu byimakaje ihame ry’ubwuzuzanye hagati y’umugabo n’umugore ku Isi.

Mu kiganiro yagiranye n’urubyiruko rwitabiriye Rwanda Day, yabereye mu Mujyi wa San Francisco kuwa Gatandatu w’icyumweru gishize, tariki ya 24 Nzeri 2016 yasabye ko ubufatanye hagati yabo na Leta y’u Rwanda bukwiye gushingirwaho mu kurushaho gushyigikira gahunda ya ‘HeForShe’ .

Yagize ati “Diaspora yacu isanzwe igaragara kandi ikanashyigikira ibikorwa bitandukanye by’igihugu. Urubyiruko rwa Diaspora ya Amerika ku bufatanye na Minisiteri yUmuryango n’Iterambere ry’Umugore (MIGEPROF) rwafashe iya mbere rwiyemeza gufatanya gukora ubukangurambaga hakoreshejwe cyane imbuga nkoranyambaga rukangurira Abanyarwanda batuye muri Amerika ndetse nabo mu zindi Diaspora kugira ngo bashyigikire gahunda ya ‘HeForShe.’”

Yakomeje agira ati “Turifuza ko mwakomeza guha amahirwe u Rwanda ruhanganye n’ibindi bihugu mu kwesa umuhigo wo kuba urwa mbere mu biyoboye ibindi muri iyi gahunda”.

Rutsobe ashimangira ko kubera ubukangurambaga bukomeje gukorwa muri iyi Diaspora, Abanyarwanda benshi bamaze kumenya iby’iyi gahunda bityo nta kabuza imibare izakomeza kuzamuka.

HeForShe ni gahunda y’Umuryango w’Abibumbye igamije gushyigikira uburinganire hagati y’abagore n’abagabo hagamijwe iterambere ryabo.

Perezida wa Repubulika y’u Rwanda, Paul Kagame ari mu bakuru b’ibihugu 10 watoranyijwe nk’umwe mu bayobozi bateje imbere abari n’abategarugori, anahiga kongera umubare w’abagore bitabira ikoranabuhanga, kwitabira amashuri y’imyuga n’ubumenyingiro ndetse no kurandura burundu ihohoterwa rishingiye ku gitsina.

Perezida Kagame yari yemereye Umuryango w’Abibumbye ko u Rwanda ruzagaragaza abagabo ibihumbi ijana basinya bashyigikira iyi gahunda, intego yamaze kugerwaho kuko ubu ruyoboye ibindi bihugu, aho abasaga 156,668 bemeje ko bayishyigikiye.

Leta Zunze Ubumwe za Amerika iza ku mwanya wa kabiri ifite112,981, igakurikirwa na Mexique, u Bwongereza na Equateur.

Gushyigikira iyi Gahunda kanda hano www.HeForShe.org

Uherereye iburyo, Rutsobe Nsengiyumva uhagarariye urubyiruko muri Diaspora, King James, Meddy na Masamba bashyigikiye gahunda ya 'HeForShe'
Umuhanzi Kitoko ari muri Peace Concert mu Mujyi wa Indianapolis muri Leta ya Indiana ari kumwe na Rutsobe
Umuhanzi Kitoko Bibarwa mu bashyigikiye 'HeForShe'
Urubyiruko ruba muri Diaspora muri Amerika mu bukangurambaga bwo gushishikariza abantu gahunda ya 'HeForShe'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE