Abanyarwanda baba muri Turikiya bizihije Umunsi w’Intwari bahabwa umukoro

Yanditswe na IGIHE
Kuya 8 Gashyantare 2018 saa 11:41
Yasuwe :
0 0

Abanyarwanda batuye muri Turikiya bizihije Umunsi w’Intwari, basabwa gukomeza kubungabunga iterambere igihugu kimaze kugeraho no kurwana urugamba rwo kurandura burundu ubukene.

Iki gikorwa cyahuriranye n’Inteko Rusange cyitabiriwe n’Abanyarwanda n’inshuti zabo 68, cyabereye muri Kaminuza ya EGE mu Mujyi wa Izmir ku ya 3 Gashyantare 2018.

Ambasaderi w’u Rwanda muri Turikiya, Nkurunziza Williams, yabibukije ko kugira ngo igihugu kigire umutekano hari abacyitangiye bagahara n’ubuzima.

Yagize ati “U Rwanda n’Abanyarwanda kugira ngo bagire umutekano umeze uko umeze ubu hari ababiharaniye ndetse bahara n’ubuzima bwabo mu ntambara yo kubohora igihugu. Tugomba guhora tubibuka kugira ngo bidufashe gusigasira ibyo tugezeho.”

Ambasaderi Nkurunziza yabasabye kurwana intambara yo gutsinda ubukene nayo isaba ubutwari no gukora cyane.

Ambasaderi Nkurunziza yasabye Abanyarwanda kurwana intambara yo gutsinda ubukene isaba ubutwari no gukora cyane

Umunsi w’Intwari watangiye kwizihizwa ku itariki ya 1 Gashyantare buri mwaka mu 1999. Guhera mu 1994 kugeza 1998 uyu munsi wahuzwaga n’uwo Gukunda Igihugu wabaga ku itariki ya 1 Ukwakira.

Insanganyamatsiko y’Umunsi w’Intwari wizihizwaga ku nshuro ya 24 yagiraga iti “ Dukomeze ubutwari, Twubake u Rwanda twifuza.”

Abitabiriye iyi Nteko Rusange yabaga ku nshuro ya gatanu basabwe guhagararira u Rwanda neza mu mijyi no mu mashuri bigamo, gukorana n’ ubuyobozi bwa Ambasade mu kurushaho kwegerezwa ibyo bakenera no gukurikirana amakuru yizewe ku Rwanda, gukaza ubukangurambaga bugamije kongera umubare w’abitabira gahunda zitandukanye no gutekereza ku byagirira u Rwanda akamaro mu byo biga.

Mu bayitabiriye harimo abanyeshuri 27 batangiye amasomo yabo yo mu byiciro bitandukanye muri Turikiya muri uyu mwaka binyuze muri Turkish Scholarships Program.

Gahunda zibahuza zirimo umuganda wa buri kwezi utegurwa na Ambasade y’u Rwanda, gushakira inkunga abatishoboye mu Rwanda no gushaka imikoranire mu by’ubushakashatsi na kaminuza zo mu Rwanda ku biga Ph.D.

Abanyamuryango bitabiriye Inteko Rusange batoye Komite nshya iyobowe na Kayijuka Idrissa wiga PhD mu Mibare muri kaminuza ya EGE; iyi yasimbuye iyari ihagarariwe na Bizimana Hussein wiga Ph.D mu bijyanye n’Ubwubatsi muri Istanbul Technical University.

Idrissa yijeje ihuriro ko bazakora uko bashoboye ngo barusheho gukomeza imikorere myiza y’ umuryango w’Abanyarwanda batuye muri Turikiya.

Umuryango w’Abanyarwanda batuye muri Turikiya barimo abahiga n’abakora ugizwe n’ abagera ku 168 babarizwa mu mijyi itandukanye ndetse ukaba ukunze kwifatanya n’Abanyarwanda biga muri Chypre.

Mu iterambere rusange ry’igihugu ukora ibikorwa bitandukanye birimo gukusanya inkunga yo gufasha abatishoboye mu Rwanda. Iki gikorwa cyatangiye mu 2017, Umuryango w’Abanyarwanda batuye muri Turikiya biganjemo abanyeshuri watanze inkunga y’amafaranga y’u Rwanda 732 000 mu Kigo cyigisha imyuga abafite ubumuga cya Nduhura Foundation gikorera mu Karere ka Muhanga.

Abanyarwanda baba muri Turikiya bifatanyije n'inshuti zabo kwizihiza Umunsi w'Intwari
Abitabirirye Inteko Rusange y'Umuryango w'Abanyarwanda baba muri Turikiya bafata ifoto y’urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza