Abanyamuryango ba FPR Inkotanyi mu Bwongereza bakoze umwiherero (Amafoto)

Yanditswe na Karirima A. Ngarambe
Kuya 12 Ugushyingo 2017 saa 01:39
Yasuwe :
0 0

Abanyamuryango b’Umuryango FPR Inkotanyi basaga 300 kuri uyu wa Gatandatu bakoze umwiherero mu Bwongereza.

Uwo mwiherero wabereye mu mujyi wa Conventry, witabiriwe n’abayobozi batandukanye barimo Umuyobozi wa Komisiyo y’Igihugu y’Itorero, Edouard Bamporiki; Ambasaderi w’u Rwanda mu Bwongereza, Yamina Karitanyi n’abandi.

Umunyamuryango wa FPR Inkotanyi utuye mu Bubiligi, Bwitare Eulade, yashishikarije abanyamuryango kurangwa n’imyitwarire ikwiriye, asobanura ko iyo myitwarire myiza ari yo yatumye uwo muryango utsinda urugamba rwo kubohoza u Rwanda.

Bamporiki mu kiganiro yatanze, yasobanuye ukuntu Umuryango FPR Inkotanyi wabohoye abanyarwanda, ukarandura burundu politiki y’amacakubiri ashingiye ku ivanguramoko, ukimakaza umuco ushingiye kuri "Ndi Umunyarwanda".

Bamporiki yavuze ko "Ndi Umunyarwanda" ariyo na we yamufashishije gukira ibikomeye yasigiwe n’amateka mabi yaranze u Rwanda.

Yakomeje asaba abanyamuryango ba FPR Inkotanyi gufatanya no kubaka umuryango ukomeye mu Bwongereza, cyane cyane bakangurira urubyiruko gukura bakunda igihugu cyabo.

Ambasaderi Yamina Karitanyi yavuze ko Umuryango FPR Inkotanyi mu Bwongereza ugeze ahashimishije kuko nta munyamuryango ugiterwa isoni cyangwa ubwoba byo kugaragara ko ashyigikiye FPR Inkotanyi.

Yagize ati “Nta gutinya, RPF muri iki gihe ihagaze neza pe. RPF si ishyaka gusa ahubwo ni amahame ngenderwaho y’ubuzima bwa buri munsi buri wese yagombye kugendereho."

Muri uwo mwiherero, Umuryango FPR Inkotanyi wungutse abanyamuryango bashya 11 biyemeje kugendera ku mahame yawo.

Edouard Bamporiki aganiriza abanyamuryango ba FPR Inkotanyi mu Bwongereza
Abanyamuryango ba FPR Inkotanyi barenga 300 bahuriye mu mwiherero
Umunyamuryango wa FPR Inkotanyi utuye mu Bubiligi, Bwitare Eulade atanga ikiganiro
Egide Ruhashya uyobora Abanyamuryango ba FPR batuye mu Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza