Young Grace na Knowless bavuye muri PGGSS II, King James na Jay Polly barakomeza

Yanditswe na Dean Irak
Kuya 15 Nyakanga 2012 saa 08:05
Yasuwe :
0 0

Abahanzi Young Grace na Knowless ntibabashije kugera ku musozo w’irushanwa rya Primus Guma Guma Super Star II, nk’uko byatangajwe mu gitaramo cya Live cyabereye I Gikondo kuri uyu wa Gatandatu tariki ya 14 Nyakanga 2012.
King James na Jay Polly nibo bahanzi bakomeje bagera ku cyiciro cya nyuma (Final). Aba bahanzi biteganijwe ko bazahita bahabwa agashimwe k’amafaranga angana n’ibihumbi magana atanu y’u Rwanda, mu kubafasha kwitegura neza igitaramo cya Live bazagira kuwa 28 Nyakanga 2012. King (...)

Abahanzi Young Grace na Knowless ntibabashije kugera ku musozo w’irushanwa rya Primus Guma Guma Super Star II, nk’uko byatangajwe mu gitaramo cya Live cyabereye I Gikondo kuri uyu wa Gatandatu tariki ya 14 Nyakanga 2012.

King James na Jay Polly nibo bahanzi bakomeje bagera ku cyiciro cya nyuma (Final). Aba bahanzi biteganijwe ko bazahita bahabwa agashimwe k’amafaranga angana n’ibihumbi magana atanu y’u Rwanda, mu kubafasha kwitegura neza igitaramo cya Live bazagira kuwa 28 Nyakanga 2012. King James na Jay Polly bagaragarijwe ko bishimiwe cyane, by’umwihariko Jay Polly.

Young Grace, umwe mu bahanzi basezerewe, wakomeje gutungurana cyane muri iri rushanwa, we yashimiye abantu bose bamufashije kugera aho ageze. N’ubwo abasigayemo bombi yabifurije amahirwe, Young Grace yasabye abafana be gutora cyane Jay Polly kugira ngo abe ari we uzegukana igikombe.

Young Grace asezera, yasabye abafana gutora Jay Polly

Yagize ati:”Ndashima Imana cyane ikomeje kundinda no kunteza imbere, ndashimira abafana banjye bakomeje kumba hafi kuva ntangiye irushanwa, kunkura muri 20, 10, 7, 4 kugeza n’ubu. Bonne chance ku njyana ya Hip Hop mutore Jay Polly.”

King James waririmbye indirimbo “Nta Mahitamo” we yasabye abafana be kurushaho kumutora inshuro nyinshi kugira ngo abe ari we uzegukana iki gikombe, aheruka guhatanira akagera kuri Final umwaka ushize. Jay Polly wabanje gusubiramo amwe mu magambo y’indirimbo ze "Ndacyariho Ndahumeka" na “Umwami Uganje” zisa nk’izitunga agatoki abahanzi (n’abandi bantu) bamuvugaho ko ntacyo azageraho kandi we atari ko abibona.

King James hamwe n'ababyinnyi ba Jabba Junior, aririmba "Nta mahitamo"

Jay Polly yagize ati:”Havuzwe byinshi muri Hip-Hop ya kera ngo Jay Polly arazimye? Ko muyabarira ku ntoki, muri mwe ninde wanzanye? Imana ishimwe; hari abagabo benshi badufashije kandi twarababwiye ngo tuzahatana mpaka ku gikombe.”

Mu ndirimbo ye "Iwacu" Jay Polly yabyinnye kinyarwanda

Muri iki gitaramo ariko, umushyushyabirori Lion Imanzi ntiyigeze agira ijambo na rimwe atangaza rivuga ku kwegura kwe yaherukaga kumenyesha Abanyarwanda nyuma akaza kwisubiraho. Nta n’ijambo na rimwe yigeze avugana na Young Grace ku byavuzwe ko uyu mukobwa w’imyaka 18 yaherukaga gutangaza ko yababajwe n’ibibazo Lion Imanzi yaherukaga kumubariza mu gitaramo giheruka.

Knowless asezera muri PGGSS II

Mu kugaragaza amarangamutima yabo benshi mu bafana bari i Gikondo ahaberaga igitaramo bagaragaje ko bishimiye cyane gukomeza kw’umuhanzi Jay Polly aho bateruye intebe bazishyira mu birere n’urusaku rwinshi cyane.

PwC, inzobere zikurikirana iby’amajwi y’uko abahanzi baba batowe, ntizatangaje amajwi buri muhanzi yagize muri iki cyiciro nk’uko byari byasezeranyijwe abafana ubwo hatagazwaga amajwi abahanzi bagize mu gutora Top 7 na Top 4.

Igitaramo gisoza aya marushanwa kizaba kuwa 28 Nyakanga 2012, ubwo umuhanzi Jason Derulo azaririmbana n’aba bahanzi babiri bakomeje King James na Jay Polly azaba ari mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza