Komisiyo y’amatora yakomoje ku mikoranire ikwiye Abadipolomate bari mu Rwanda

Yanditswe na Mathias Hitimana
Kuya 16 Nyakanga 2017 saa 09:20
Yasuwe :
0 0

Komisiyo y’Amatora (NEC) yashimangiye ko Abadipolomate bakorera mu Rwanda ari bamwe mu bafatanyabikorwa mu migendekere myiza y’amatora ariko ibibutsa ko batagomba kwivanga.

Ubwo Komisiyo y’Amatora yamaraga kwemeza abakandida b’agateganyo mu matora y’Umukuru w’Igihugu, Abadipolomate batandukanye babonanye na bamwe mu bifuzaga kwiyamamaza; Uhagarariye Umuryango w’Ubumwe bw’u Burayi, Michael Ryan, we yanditse kuri Twitter ubutumwa busaba NEC ko ikwiye gusobanura vuba impamvu hari imikono y’abashyigikiye kandidatire ya Shima Diane Rwigara itarahawe agaciro.

Iyi myitwarire y’Abadipolomate ntiyanyuze Perezida Kagame; mu kiganiro yarimo kuri Televiziyo y’u Rwanda kuwa 4 Nyakanga ubwo hizihizwaga ku nshuro ya 23 umunsi wo kwibohora, yavuze ko batagomba kwivanga, ko "bakwiye kureka Komisiyo y’Igihugu y’Amatora igakora akazi kayo".

Mu kiganiro n’abanyamakuru cyo kuwa 13 Nyakanga, Perezida wa Komisiyo y’Amatora, Prof. Kalisa Mbanda, yashimangiye ubutumwa bwa Perezida Kagame, avuga ko Abadipolomate batagomba kwivanga bikabije mu matora kuko "atari bo bayategura, atari bo bayacunga."

Ku mikoranire ya NEC n’Abadipolomate, Prof. Mbanda yagaragaje ko mu bwigenge bwayo izakomeza kujya ibabwira uko imigendekere y’amatora ihagaze ariko nabo bakirinda kwivanga.

Yagize ati "Bafite uburenganzira bwo kugira amakuru ku byo dukora mu bijyanye n’amatora ariko ntibabyivangemo ku buryo bukabije kuko bakeneye amakuru ariko ntabwo bakeneye kuza gutanga amabwiriza no gukurikirana abakandida ku buryo burenze, budasanzwe. Ni icyo twifuza ko cyahinduka ariko ubundi ni abafatanyabikorwa tugomba guhanahana amakuru ku buryo buhagije kugira ngo nabo bakurikirane amatora uko ahagaze, uko agenda mu Rwanda."

Perezida wa Komisiyo y’Amatora yeruye itangazamakuru ko mu migendekere myiza y’amatora, yagiye ikorana n’Abadipolomate. Yatanze urugero , avuga ko NEC yumvise ibyifuzo by’abadipolomate ku kirebana no gukoresha ikoranabuhanga mu kwiyamaza. Mbere Komisiyo yari yasabye abakandida ko ubutumwa bajya bajya gushyira ku mbuga nkoranyamabaga yajya ibanza kubuhabwa, ikabusuzuma, ntibyishimirwa, iyo mbogamizi iza kuyikuraho .

Ku wa Gatanu, tariki ya 14 Nyakanga abakandida batatu bahatana mu matora batangiye ibikorwa byo kwiyamaza. Paul Kagame watanzwe na FPR Inkotanyi yahereye mu Karere ka Ruhango ; Dr Frank Habineza wa Green Party atangirira mu Karere ka Rusizi naho umukandida wigenga Philippe Mpayimana yiyamamariza mu ka Bugesera.

Ibikorwa byo kwiyamamaza bizarangira ku wa 3 Kanama buri buke haba amatora. Amatora ateganyijwe ku wa 3 Kanama 2017 ku Banyarwanda baba hanze y’igihugu no kuwa 4 Kanama ku baba mu gihugu.

Perezida wa Komisiyo y’Amatora, Prof. Kalisa Mbanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza