Kagame yasoje ibikorwa byo kwiyamamaza mu Burengerazuba aho yagaragajwe nk’udasanzwe (Amafoto)

Yanditswe na Philbert Girinema, Rabbi Malo Umucunguzi
Kuya 29 Nyakanga 2017 saa 09:59
Yasuwe :
0 0

Umukandida wa FPR Inkotanyi, Paul Kagame, yasoje ibikorwa byo kwiyamamaza mu Ntara y’Iburengerazuba, muri iki cyumweru akaba yarazengurutse uturere twa Musanze, Nyabihu, Rubavu, Karongi, Rusizi na Nyamasheke.

Kuri uyu wa Gatandatu, tariki ya 29 Nyakanga 2017, ibihumbi by’abaturage bari bakoraniye ku kibuga cy’umupira munsi ya Paruwasi St Paul ya Nyamasheke mu Murenge wa Kagano, aho Kagame yabwiye abaturage ko mu myaka iri imbere iterambere ry’aka karere rizihuta, hakongerwa ibikorwaremezo ndetse ikiyaga cya Kivu kikarushaho kubyazwa umusaruro ahanini ushingiye ku bukerarugendo.

Kagame yabwiye aba baturage ko ku itariki ya 4 Kanama ari ukuzindukira mu itora, ibindi bakabiharira abashinzwe kubarura amajwi ari nabo batangaza intsinzi.

Paul Kagame aganiriza abaturage bo mu Karere ka Nyamasheke
Kagame yavuze ko Twagiramungu yamusabye ko ariwe uba Perezida ariko nyuma akabihindura
Paul Kagame na Madamu bishimana n'abaturage b'Akarere ka Nyamasheke

UKO IKI GIKORWA CYAGENZE UMUNOTA KU WUNDI

14:00: Paul Kagame asoje ijambo rye ashimira abaturage ba Nyamasheke aho abijeje ko nyuma y’itariki enye ibikorwaremezo bigomba kuziyongera mu karere kabo, ubukerarugendo bukaba ku isonga ry’iterambere ry’abaturage bityo imibereho myiza y’abaturage igakomeza kuba ku isonga.

13:35: Paul Kagame niwe uhawe umwanya kugira ngo ageze ijambo ku baturage b’Akarere ka Nyamasheke bitabiriye ibikorwa bye byo kwiyamamaza. Atangiye abashimira ku bwitabire anashimira abandi bafashe ijambo mbere ye.

Akomeje agira ati “Makuza we yagize n’uburenganzira bwo kudutwara inyuma ya 2024 ariko tube turetse turebe itariki enye z’ukwa munani n’imyaka irindwi iri imbere tuzaba tureba ibyo Makuza yavugaga.

Ibikorwa turimo byatuzanye aha uyu munsi byo kuzatora itariki enye z’ukwezi kwa munani, byose bifitanye isano n’ibyo Makuza yatubwiraga, ibyo Bamporiki yatubwiraga, bo bagiye mu mateka ya kera abandi mu y’ejo bundi ariko byose bifitanye isano.

Imyaka 23 ishize tuyimaze mu mpinduka mu gihugu cyacu zo kubaka u Rwanda rushya. Ayo mateka rero batubwiye, arafasha kumva aho tugeze n’aho tujya n’abo turibo nk’Abanyarwanda. Itariki enye z’ukwezi kwa munani icyo gikorwa cy’amatora nacyo kiratwibutsa byinshi muri aya mateka yavuzwe, kikabwibutsa ko turi mu nzira yo kubaka igihugu bundi bushya, twubake ubumwe, twubake umutekano mu Banyarwanda, twubaka amajyambere. Twubaka uburenganzira bw’Abanyarwanda aribwo bakwiriye kuba bagenderaho, ntabwo ari uburenganzira bw’abandi. Iby’abandi birabareba.

Igikorwa cya demokarasi turimo ubu ngubu ni igikorwa gishyira mu maboko y’Abanyarwanda uburenganzira bwo guhitamo, kwihitiramo uburyo bayoborwa, uburyo baba bayobora, guhitamo bya bindi navugaga by’ubumwe Abanyarwanda kongera kuba igihugu bakaba umwe.

Hari umudamu watubwiye ko ari mu bari barasigajwe inyuma n’amateka. Iyo ntabwo yari demokarasi. Demokarasi twebwe ku Munyarwanda nta wusigara inyuma. Buri Munyarwanda wese akagira amahirwe, akagira uburenganzira bwe, akagira guhitamo uko ashatse. Rero, itariki enye ukwa munani ni ukongera guhitamo gukomeza inzira nziza Abanyarwanda uko bayishaka.”

13:30: Depite Bamporiki Edouard niwe uhawe umwanya aho avuze amateka yaranze Akarere ka Nyamasheke guhera mbere ya Jenoside, avuze ko aka karere kari muri Zone Turquoise ariko abazungu baje kuhava abaturage bagasigara amahoro kubera Kagame n’Inkotanyi yari ayoboye.

13:20: Makuza asoje ijambo rye agira ati “Ndareba kandi nziko ibyo mvuga mbisangiye na benshi niba atari bose. Iyi myaka irindwi iri imbere twayitangiye kabaye. Turanyuramo nkuko mwabivuze. Ariko muri bwa bwisanzure, turareba n’indi, turareba n’indi irenze myinshi tunahereye kuri ya yindi itanu inshuro ebyiri twashyize mu Itegeko Nshinga. Nyabuneka, aho aho!!!! Ubundi dukataze mu majyambere kuko tubafite.

-  “Iyo umuntu atashoboraga kuva Rubavu atabanjije kunyura mu Majyepfo ngo akoreshe igihe cyihuta akanyura aha ngaha Rubavu-Rutsiro-Karongi-Nyamasheke - Rusizi nta handi anyuze, ubwo muba muri kumwe. Ubwo ni ubudasa […] ibyo rero kimwe n’ibindi twese tuzi, impinduka zabaye muri iki gihugu ni ishyano ryose […] n’abanyamahanga uwabashyira hariya ngo batore nabo bagutora”

12:55: Perezida wa Sena, Bernard Makuza, niwe uhawe umwanya aho atangiye agira ati:

“Ndagira ngo mbashimire n’Umuryango wa FPR Inkotanyi kuri uyu mwanya mumpaye, ntabwo njya nirarira ndabashimira iki cyubahiro mumpaye n’ishema binteye.

Kimwe n’abandi Banyarwanda bose bari hano n’abatari hano hirya no hino, turashima impinduka mwazanye muri iki gihugu uhereye ku miyoborere myiza itavangura mushyira imbere ubumwe bw’abanyarwanda bwasandaye mugashyira imbere gukorera mu mucyo ndetse mugaha ijambo buri Munyarwanda wese apfa kuba afite igitekerezo cyubaka.

Ibyo ngibyo nibyo Abanyarwanda hirya no hino twakomeje kuvuga ko byubatse ubudasa bwanyu ndetse ko muri n’umuntu udasanzwe. Ntusanzwe. Ndahamya neza ko n’ababazi mukibyiruka mukiri bato bagomba kuba hari ibyo bababonagamo by’ubudasa by’umuntu udasanzwe no muri icyo gihe.

Ariko reka njye ngira aho mpera kuko niho nashyikira. Twese tuzirikana ko icya mbere, ubwo byari bimaze kugaragarira Abanyarwanda twese ko u Rwanda rwahejeje ishyanga bamwe mu bana b’iki gihugu, FPR Inkotanyi yafashe icyemezo cyo kugira ngo Abanyarwanda batari barishwe babashe gutaha […] muri icyo gihe mwari mu mashuri muri Amerika kubera icyo gihe uko byari bigenze, mu buyobozi bw’ingabo za APR mwafashe icyemezo cyo kureka ayo mashuri no kuza ku rugamda bigaragaza ko uri umugabo udatinya urugamba ahubwo usuma arusanga.

Ubwo ni ubudasa ubundi mu bisanzwe kandi byoroshye mwari kwigumira aho ngaho mukarangiza amashuri mukayakomeza ariko ibyo ntabwo byari kuba ari Kagame Paul. Ntabwo mutinya aho rukomeye. Aho rukomeye muhagurukana ibakwe maze mukerekana ubushobozi mukerekana inzira y’uko ibintu bigomba kugenda kandi gutsindwa ntabwo ari ibyanyu. Ibyo ni ubudasa."

Makuza yavuze ko Kagame yakoreye byinshi Abanyarwanda ku buryo n’amahanga abibona

12:40: Vestine Nyiratebuka uvuka mu Murenge wa Nyabitekeri niwe uhawe umwanya kugira ngo avuge ibyo yagezeho ku buyobozi bwa Paul Kagame. Atangiye agira ati “Ndi uwasigajwe inyuma n’amateka ba bandi bitaga abatwa, ndagushimira agaciro natwe waduhaye twe abasigajwe inyuma n’amateka [...] ngushimiye ukuntu watwubakiye inzu, ukuntu abana bacu bari kwiga, njye nize nabi niga inzara indya.”

Avuze ko yahawe inka muri gahunda ya girinka mu minsi ishize ikaba yarabyaye ikimasa akakigurisha hanyuma aguramo matelas yo kuraraho. Avuze ko aribwo bwa mbere yari araye kuri matelas mu buzima bwe.

12:30: Umukandida wa FPR Inkotanyi, Paul Kagame, ageze i Nyamasheke aho ibikorwa bye byo kwiyamamaza ku mwanya wa Perezida wa Repubulika bikomereje ari naho asoreza ibyo mu Ntara y’Uburengerazuba.

Perezida Kagame yakirijwe amashyi n'impundu i Nyamasheke
Paul Kagame yabwiye abaturage ko igikwiye gushishikaza abantu uyu munsi ari itora ry’Umukuru w’igihugu riteganyijwe kuya 4 Kanama

-  Ibyo wamenya kuri Nyamasheke

Ni akarere kagizwe n’imirenge 15, kakagira ubuso bwa kilometero kare 1174, aho gatuwe n’abaturage bagera ku 405 217. Mu bikorwa by’iterambere bimaze gukorwa guhera mu 2010 kugeza uyu mwaka ni uko hegitari 51 525 z’ubutaka bumaze guhuzwa, inyongeramusaruro zahawe abahinzi ziva kuri toni 960 zigera zigera ku 11 566, inka zatanzwe muri gahunda ya Girinka ziva kuri 98 zigera ku 3579 ndetse na 93.3% by’abaturage bose bafite ubwisungane mu kwivuza.

12:00: Mu kanya gato, Umukandida wa FPR Inkotanyi araba ageze i Nyamasheke mu Murenge wa Kagano ku kibuga cy’Umupira kiri munsi ya Paroisse St Pierre Nyamasheke ahakomereje ibikorwa bye byo kwiyamamaza.

-  Abayobozi batandukanye bamaze kugera ku kibuga cyo munsi ya Paroisse ya St Paul i Nyamasheke. Minisitiri w’Ubutegetsi bw’Igihugu, Francis Kaboneka; Umunyamabanga Mukuru wa FPR Inkotanyi, Ngarambe Francois; Minisitiri w’Umuco na Siporo, Uwacu Julienne; Vice Chairman wa FPR Inkotanyi, Bazivamo Christophe n’abandi barahari.

Minisitiri w’Ubutegetsi bw’Igihugu, Francis Kaboneka n'uwa Siporo n'Umuco, Uwacu Julienne, ubwo bageraga mu Murenge wa Kagano muri Nyamasheke
Umunyamabanga Mukuru w'Umuryango wa FPR Inkotanyi, Ngarambe François, agera i Nyamasheke ahabereye ibikorwa byo kwiyamamaza
Abo mu Karere ka Nyamasheke bashimiye Paul Kagame ibikorwa bikomeye yabakoreye mu myaka irindwi ishize
Vice Chairman wa FPR Inkotanyi, Bazivamo Christophe mu bikorwa byo kwiyamamaza i Nyamasheke

11:15: I Nyamasheke naho amashyaka umunani yashyigikiye umukandida wa FPR Inkotanyi naho ntiyasigaye. Kuva kuri PSD, PPC, PL n’andi yose arahari.

Perezida w'Ishyaka Riharanira Demokarasi ihuza Abanyarwanda (PDC), Mukabaranga Agnès n'uw'Ishyaka Ntangarugero muri Demokarasi (PDI), Sheikh Musa Fazil Harerimana bashyigikiye Paul Kagame
Umuyobozi w'Ishyaka ry'Ubwisungane n'Iterambere (PSP), Kanyange Phoebe n'Uyobora Ishyaka Riharanira Ubumwe bw'Abanyarwanda na Demokarasi (UDPR), Nizeyimana Pie
Perezida w'Ishyaka riharanira Demokarasi n'Imibereho myiza y'Abaturage (PSD) , Dr Vincent Biruta (ibumoso) i Nyamasheke
Perezida w'Ishyaka ry'Iterambere n'Ubusabane (PPC), Dr. Alvera Mukabaramba inyuma ya Kagame batanze nk'umukandida mu matora yo kuwa 4 Kanama 2017

11:00: Abahanzi bose bari gufasha Paul Kagame mu bikorwa bye byo kwiyamamaza kuri uyu munsi bari i Nyamasheke babukereye. Muri aka kanya nibo bari gususurutsa abaturage. Riderman niwe ubimburiye abandi aho aririmbye indirimbo ze zakunzwe zirimo Bombori bombori n’izindi. Urban Boys nabo baririmbye indirimbo zabo zakunzwe zirimo nk’iyitwa Adamu na Eva.

Abahanzi bari inyuma ya Paul Kagame basusurutsa abaturage b'i Nyamasheke
Mu Karere ka Nyamasheke bishimiye bidasanzwe kwakira Paul Kagame

-  Hagati aho, kuri Twitter naho hakomeje kuvugirwa byinshi. Imwe mu mafoto yavugishije abantu nyuma y’umukobwa wafotowe ari kurira kubera urukundo afitiye Paul Kagame harimo n’iyi:

Izi nkweto zagarutsweho cyane n'abakoresha imbuga nkoranyambaga

- Minisitiri Louise Mushikiwabo ngo ashaka izi nkweto

Minisitiri w'Ububanyi n'Amahanga, Louise Mushikiwabo, yashimangiye ko na we azishaka

- Hari n’amazi meza...

-  Aho ujishe igisabo…

10:25: Akanyamuneza ku maso y’abaturage bateraniye ku kibuga cy’umupira cyo mu Murenge wa Kagano munsi ya Paroisse St Paul Nyamasheke.

Ufite ubumuga bw'ingingo yizihiwe abyinana n'abandi bakecuru
Paul Kagame yavuzwe imyato n'ab'i Nyamasheke uko yabateje imbere mu nzego zose
Ibihumbi by'abaturage baturutse mu mirenge 15 igize Akarere ka Nyamasheke bitabiriye ibikorwa byo kwiyamamaza kwa Paul Kagame
Nyamasheke bishimira ko Kagame yabahaye umuhanda woroshya ubuhahirane n'utundi turere
Benshi bakoraniye mu Murenge wa Kagano muri Nyamasheke bacinya akadiho bitegura kwakira umukandida wa FPR Inkotanyi

10:00: Abaturage mu nzira berekeza aho iki gikorwa kigiye kubera, bari kugenda babyina bishimira ibyo bagezeho ku buyobozi bwa Paul Kagame.

Abaturage bo mu Murenge wa Mahembe baserutse mu gitondo cya kare berekeza mu bikorwa byo kwiyamamaza

- Aba mbere bamaze kugera aho iki gikorwa kigiye kubera

Aho igikorwa cyabereye ni hafi ya Paruwasi St Paul ya Nyamasheke
Abaturage ba Nyamasheke bashyigikiye Umukandida wa FPR Inkotanyi bazindutse baririmba indirimbo z'iterambere Kagame yabagejejeho
Abaturage bakoze imiteguro igaragaza ibyo bagezeho

- Aho iki gikorwa cyabereye ni hafi y’ibigabiro by’Umwami Rwabugiri

Amafoto: Mahoro Luqman na Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza