Indorerezi za EAC zatunguwe n’uko nta mwuka w’ubwoba uri mu Rwanda mbere y’amatora

Yanditswe na Tombola Felicie
Kuya 28 Nyakanga 2017 saa 01:20
Yasuwe :
0 0

Indorerezi 30 mu matora ya Perezida w’u Rwanda, ziturutse mu bihugu bine byo mu Muryango wa Afurika y’Uburasirazuba(EAC),zatangaje ko zatunguwe ndetse zikishimira cyane ukuntu mu Rwanda ubuzima bumeze neza, abantu bose bari mu byabo barindiriye gusa ko itariki igera ngo bahitemo uwo bumva ubereye kuyobora igihugu cyabo.

Ubwo hatangizwaga amahugurwa yo kuzifasha kumenya neza igihugu, amateka yacyo, amazina akoreshwa mu buyobozi nk’utugari, imirenge n’uterere, uyoboye itsinda ry’indorerezi zo muri EAC, Moody Awori, wabaye Visi Perezida wa Kenya,yabwiye itangazamakuru ko yiteze ko amatora azaba mu mucyo kuko ibikorwa biyabanziriza bibigaragaza.

Yagize ati “ Ndishimye cyane kubona uko bantu barimo kwitwara muri ibi bihe, mvugishije ukuri ntushobora kumenya ko hari gutegurwa amatora mu Rwanda. Abantu baratuje, barishimye ntabwo ndimo kubona abantu biremye udutsiko tw’abantu 10, 100 bongorerana. Umuntu wese ari mu bye yumvise ibyo abakandika biyamamaza bavuga na we aricecekeye ategereje itariki ngo yitorere ukwiye.”

Yakomeje agira ati “Biragoye kumenya niba ibikorwa byo kwiyamamaza birimo gukorwa, ubundi twakabaye twumva urusaku impande zose, kuri njyewe icyo ni ikintu cyiza, biragagaza uburyo amatora azakorwamo.”

Abajijwe ku ndorerezi zijya zivanga mu matora, Moody yagize ati “Amatora ni ay’Abanyarwanda, abandi ntibibareba.”

Uretse izi ndorerezi za EAC n’abandi basesengura imigendekere y’amatora mu Rwanda berekana ko ari ubudasa.

Ibyo uhagarariye izi ndorerezi yagaragaje bihuye n’ibyo Senateri Prof. Karangwa Chrysologue wayoboye Komisiyo y’Amatora yagaragaje ubwo yari yatumiwe kuri Radio Rwanda mu kiganiro Isesenguramakuru.

Yagize ati “Ikimenyetso cya mbere ni umutekano mu gihugu cyacu. Ubundi ahandi iyo amatora yegereje usanga hari imvururu, usanga abantu badatekanye, ndavuga muri Afurika cyane cyane, usanga bamwe batangiye gufata inzira zo kujya hanze y’igihugu, hano mu Rwanda uretse kubivuga mu itangazamakuru n’abantu bakabiganiraho ubundi ubona ko nta cyahindutse.”

“Hari umutekano usesuye, Abanyarwanda bari mu mirimo yabo isanzwe nta kibahungabanyije, ntabwo bafite kuvuga ngo turapfuye, ahubwo barifuza ko yaba vuba.”

Indorerezi za EAC ziri mu Rwanda ni 30 zirimo 11 zaturutse muri Tanzania, 11 zo muri Uganda, esheshatu zo muri Kenya n’ebyiri zaturutse muri Sudani y’Epfo.

Ziri mu Rwanda kuva tariki ya 26 Nyakanga aho zikurikirana ibikorwa byo kwiyamamaza zikamenya n’uduce tw’igihugu. Zizasoza akazi ku itariki 6 Kanama bahure n’itangazamkuru bagaragaza ibyo babonye.

Indi nkuru wasoma: Ibimenyetso bigaragaza ko amatora y’Umukuru w’Igihugu azagenda neza mu mboni za Senateri Chrysologue

Moody Awori uyoboye itsinda ry'indorerezi za EAC mu matora yo mu Rwanda
Itsinda ry'indorerezi n'abandi baturutse mu bunyamabanga bwa EAC

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza