Amashimwe kuri Kagame uvugwa imyato kubera ibyo yakoreye Nyamasheke

Yanditswe na Rabbi Malo Umucunguzi
Kuya 29 Nyakanga 2017 saa 12:54
Yasuwe :
0 0

Abaturage bo mu Karere ka Nyamasheke mu Ntara y’Iburengerazuba, bashimira Paul Kagame, ku bikorwa bikomeye yabakoreye mu myaka irindwi ishize, birimo umuhanda munini usigaye ubahuza n’ibindi bice bisigaye by’igihugu.

Kuri uyu wa Gatandatu, tariki ya 29 Nyakanga 2017, umukandida wa FPR Inkotanyi, Paul Kagame, yakomereje ibikorwa bye byo kwiyamamaza mu Karere ka Nyamasheke, ari nako yasorejemo urwo rugendo mu Burengerazuba bw’igihugu.

Ni ibikorwa bibanziriza itora ryo kuwa 4 Kanama, ubwo Abanyarwanda bazaba bihitiramo umuyobozi ubereye kubayobora mu yindi myaka irindwi iri imbere.

Rugemintwaza Jean Nepo wo mu Murenge wa Nyabitekeri we yavuze ko mu bikorwa bikomeye Kagame yabahaye harimo umuhanda uhuza Rusizi na Karongi, watumye babasha kujya bagera i Kigali byoroshye.

Yagize ati“Kuri twe kuva hano i Nyamasheke ujya i Kigali byaroroshye. Kuva hano Nyamasheke ujya i Kigali ni 3500 Frw ariko kuva Rusizi ujya i Kigali ni 5200 Frw, kandi abantu b’i Nyamasheke mbere byadusabaga kujya gutegera i Rusizi tukanyura muri Nyungwe.”

“Ubu dufite ibigo nderabuzima, amavuriro, nibura buri murenge ufite ibigo nderabuzima bibiri. Ibigo by’amashuri naho uretse kwigira ubuntu, amashuri yariyongereye, abadamu bafashwe neza, buri kagari gafite inganda zitunganya kawa, mbese imiyoborere ye myiza niyo soko y’amajyambere.”

Yavuze ko mu myaka iri imbere icyo bakeneye ari ugusigasira ibyagezweho, kuzamura imyumvire y’abaturage no kongerera ubushobozi inzego z’ibanze ngo zirusheho gufasha abaturage kuko ibyinshi “byamaze kwikora.”

Mfizi Claver w’imyaka 72 utuye mu Murenge wa Kagano, Akagari ka Ninzi, Umudugudu wa Gikuru, avuga ko ari byinshi Paul Kagame yabagejejeho birimo VUP, imihanda, amashanyarazi n’ibindi.

Yagize ati “Igikomeye ni uko yadutoje no kwambara ibirato. Yaduhaye umuhanda ugana ahitwa ku Murwa, hari uyu wa hano ugera i Kamembe ubu urimo kaburimbo kimwe n’indi mihanda yo mu midugudu. Mu myaka irindwi ni uko yakomeza kudufasha buri muturage agatura ahantu heza, ubu dufite umutekano.”

Nyiranzeyimana Marie Chantal w’imyaka 33, avuga ko ikintu cya mbere Kagame yabakoreye ari amashuri abana bigiramo ku buntu, amazi meza, akarwanya nyakatsi, ati “Nta cyatuma tutamutora.”

Yakomeje agira ati “Abagore yaduhaye ijambo ubu dufite ifaranga ku mufuka, ntitugikandamizwa n’abagabo, nkanjye ubu nshobora gufata ifaranga nkajya mu isoko nkacuruza. Ntitugisabiriza abagabo cyane, yaduhaye ijambo kuko mbere nta mugore wacuruzaga n’iyo yabonaga amafaranga umugabo yarayamwakaga, ariko ubu dusigaye dufatanya icyo atazanye nanjye nkakigura.”

Yavuze ko icyo yifuza ari uko yakomeza kubafasha gutera intambwe ngo barusheho kwiteza imbere.

Paul Kagame aganiriza abaturage bo mu Karere ka Nyamasheke
Paul Kagame yavuzwe imyato n'ab'i Nyamasheke uko yabateje imbere mu nzego zose
Ibihumbi by'abaturage baturutse mu mirenge 15 igize Akarere ka Nyamasheke bitabiriye ibikorwa byo kwiyamamaza kwa Paul Kagame
Nyamasheke bishimira ko Kagame yabahaye umuhanda woroshya ubuhahirane n'utundi turere
Benshi bakoraniye mu Murenge wa Kagano muri Nyamasheke bacinya akadiho bitegura kwakira umukandida wa FPR Inkotanyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza