Yaretse uburaya nyuma y’imyaka 15, atinya kwanduza benshi SIDA

Yanditswe na Thamimu Hakizimana
Kuya 16 Ukwakira 2017 saa 08:54
Yasuwe :
0 0

Umubyeyi w’imyaka 35 utuye ahitwa i Matimba mu Murenge wa Rwezamenyo, Akarere ka Nyarugenge yamaze imyaka igera muri 15 ari indaya, yanduriramo SIDA aza guhitamo kubuvamo yanga kuzakomeza kwanduza abagabo benshi.

Uyu mubyeyi ufite umwana w’umukobwa w’imyaka 18 y’amavuko, avuga ko yatangiye uburaya mu 2000, abuhagarika burundu mu Ukwakira 2015.

Mukamusoni izina (ryahinduwe) yemeza ko yafashe icyemezo cyo gutangira kwicuruza nyuma y’aho umwarimu wamuteye inda ayihakanye; yinjiye mu buraya nk’ imfubyi ishaka imibereho ye n’umwana.

Yagize ati "Nta yandi mahitamo nari mfite kuko umwarimu wari waranteye inda ubwo nari mu wa Kabiri i Kabgayi yari yayihakanye."

Yakomeje agira ati "Njye sinagiye mu buraya kubera gukunda ibintu cyangwa se irari nk’uko bamwe bakunze kubivuga, njye byari ukugira ngo mbone uko nirerera umwana kubera ko nta n’umubyeyi nari mfite wo kumfasha.”

Ashimangira ko mu myaka yamaze mu buraya nta cyiza na kimwe yakuyemo urete no kwanduriramo SIDA.

Yagize ati "Uragira ngo se ni iki cyiza cy’uburaya? Ni bangahe uzi se bamaze kubaka inzu byibuze bakesha ubwo buraya? Ahubwo njye nkeka ko amafaranga ava mu buraya yavumwe kuko nta kintu na kimwe ajya afasha."

Uyu mubyeyi yahisemo kureka uburaya nyuma yo kumenya ko yanduye agakoko gatera SIDA mu gihe abona hari abagabo benshi bajya mu buraya bakunda imibonano mpuzabitsina idakingiye.

Yakomeje avuga ko yanahisemo kubihagarika amaze kubona ko umukobwa we amaze gukura kandi bikamubabaza kubona aho nyina akura amafaranga.

Ashimangira ko nyuma yo kureka uburaya, yahise yiyegurira Imana anaboneraho gusaba abagiraneza kujya bamufasha kugira ngo abone aho kuba n’icyo gutunga umukobwa we.

Yagize ati “Sinakubeshya muri iki gihe mbayeho mu buzima bukomeye kubera ko ncumbitse mu bagiraneza kandi birumvikana ko atariho nzakomeza kuba ku buryo nsaba abagiraneza babishoboye kumfasha cyane cyane ko nabaruriwe mu cyiciro cya gatatu kandi nta n’inzu cyangwa akazi ngira."

Abacumbikiye uyu mugore bahamya ko yahindutse by’ukuri, uburaya yabusezereye.

Uyu mubyeyi asaba abakobwa kwirinda ingeso zo kwishora mu busambanyi kuko gutwarariramo inda zitateguwe cyangwa kuhandurira indwara, uko bimeze kose igihe kiragera bakicuza.

Umubyeyi wamaze imyaka 15 ari indaya akanduriramo SIDA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza