Kwamamaza

‘Urwanya ubutegetsi aba arwanya icyo Imana yagennye’: Icyo Bibiliya ivuga kuri politiki

Yanditswe kuya 15-09-2016 saa 13:17' na IGIHE


Mu bihugu bitandukanye, abakuru b’ibihugu no mu zindi nzego iyo barahirira gutangira inshingano nshya bifashisha Bibiliya, ndetse no mu nkiko abatangabuhamya hari aho bayirahiriraho bashimangira ko bagomba gushyira imbere ukuri mu byo bavuga byose.

Nko muri Leta Zunze Ubumwe za Amerika, abaperezida bazamura ukuboko kw’iburyo bagashyira ukw’ibumoso kuri Bibiliya.

Mu 1789, Bibiliya yakoreshejwe na George Washington arangije aranayisoma, Harry Truman na Dwight Eisenhower babikora batyo, kereka Theodore Roosevelt mu 1901. Gusa Harry Truman, Dwight Eisenhower, Richard Nixon na Barack Obama bo bakoresheje Bibiliya ebyiri.

Nubwo amateka atagaragaza neza aho ibi bikorwa byatangiriye, hari byinshi Bibiliya igarukaho ku butegetsi, guhera ku mategeko 10 y’Imana atanyuranya n’ay’ibihugu bigenda byihariye, kugeza ku buryo bw’imiyoborere n’ibikwiye kuranga umuyobozi abaturage bakeneye.

Imana igarukwaho mu mpande zinyuranye z’Isi, kugeza no mu Rwanda mu bayobozi mu nzego zitandukanye kugeza kuri Perezida wa Repubulika, basoza indahiro bavuga bati “Nintatira iyi ndahiro nzabihanirwe n‟amategeko”…“Imana ibimfashemo.”

Ubutegetsi bwose butangwa n’Imana

Mu ibaruwa Mutagatifu Pawulo Intumwa yandikiye Abanyaroma (13: 1-7) iboneka muri Bibliya Ntagatifu, ivuga ko ubutegetsi bwose bukomoka ku Mana kandi bugomba kubahwa no gutinywa.

Pawulo agira ati “Umuntu wese yumvire ubutegetsi bumusumbye, kuko nta butegetsi budaturuka ku Mana kandi n’uburiho bukaba bwarashinzwe n’Imana. Bityo urwanya ubutegetsi aba arwanya icyo Imana yagennye, kandi ababurwanya baba bikururira urubanza. Kuko ugira neza si we utinya abatware, ahubwo ni ugira nabi.’’

“Mbese urashaka kudatinya ubutegetsi? Kora icyiza, nabwo buzagushima. Kuko Imana ibukoresha kugira go ugere ku cyiza. Ariko niba ukoze ikibi, utinye: ntabwo bwitwaza inkota ku busa. Kuko Imana ikoresha ubutegetsi ngo ibuhanishe ugira nabi. Niyo mpamvu ari ngombwa kuyoboka ubutegetsi, bidatewe no gutinya Umujinya wabwo gusa, ahubwo ubibwirijwe n’umutima nama.”

“Ni nayo mpamvu burya mutanga imisoro: abayakirana ubwitonzi baba bakorera Imana. Mujye muha buri muntu ikiri icye: Uwo mugomba umusoro, mumuhe umusoro; uwo mugomba ihazabu muyimuhe’ ugomba gutinywa mumutinye; ugomba kubahwa mumwubahe.”

Bibiliya ishishikariza abaturage gutanga umusoro

Uretse Pawulo uvuga ko ugomba guhabwa umusoro agomba kuwuhabwa, Ivanjili ya Matayo (22:17-21) wifashishije Bibiliya Yera, igaragaza uko Yesu yageragejwe abazwa niba gutanga umusoro ari ngombwa.

Iyo mirongo igira iti “Maze Abafarisayo baragenda bajya inama yuko bari bumutegeshe amagambo. Bamutumaho abigishwa babo bamwe b’Abaherode bati ‘mwigisha, tuzi yuko uri inyangamugayo kandi ko wigisha inzira y’Imana by’ukuri, nturobanura abantu ku butoni kuko utita ku cyubahiro cy’umuntu wese. Nuko tubwire, utekereza ute? Amategeko yemera ko duha Kayizari umusoro, cyangwa ntiyemera?”

“Ariko Yesu amenya uburiganya bwabo, arababaza ati “Mungeragereje iki, mwa ndyadya mwe? Nimunyereke ifeza y’umusoro.”

Bamuzanira idenariyo. Arababaza ati “Iyi shusho n’iri zina ni ibya nde? Baramusubiza bati “Ni ibya Kayisari.” Maze arababwira ati ‘Nuko rero ibya Kayisari mubihe Kayisari, iby’Imana mubihe Imana”.

Kwihesha agaciro

Mu ibaruwa ya mbere Pawulo Intumwa yandikiye abanya Tesaloniki, (1 Abanyatesaloniki 4 :10-12), agaragaza ko imirimo y’abantu no kwita kubibareba ari byo bakwiye kwibandaho.

Ati ‘‘Bavandimwe, turabasaba kujya mbere ; nimwihatire gutuza, mwibande ku bibareba, kandi mukoreshe amaboko yanyu, nk’uko twabibategetse. Bityo muzihesha agaciro muri rubanda, kandi ntawe muzakenera.’’

Bibiliya kandi yibutsa abantu gusabira abantu bose harimo n’abayobozi babo. Mu ibaruwa ya mbere ya Timote (1 Timote 2:1-2), agira ati ‘‘Ndasaba rero nkomeje ko mbere ya byose mwakwambaza Imana, mukavuga amasengesho, mugatakamba kandi mugashimira Imana, mubigirira abantu bose. Dukwiye gusabira abami n’abandi bategetsi bose, kugira ngo tubone kubaho mu ituze n’amahoro, turangwa n’ubusabane ku Mana kandi dutunganiwe.’’

Kubaho mu bwigenge

Bibiliya ivuga ko abantu bagomba kubaho mu Bwigenge, ariko ubwigenge bwabo ntibube impamvu yo gusuzugura abayobozi.

Mu ibaruwa ya mbere ya Petero (1 Petero 2 :13-14), agira ati “Nimuyoboke rero ubutegetsi bwose bw’abantu ku mpamvu ya Nyagasani : yaba umwami mu mwanya we w’Ikirenga, baba abatware batumwe na we kugira ngo bahane abagira nabi kandi bashime abakora neza ; kuko icyo Imana ishaka ari uko mwacubya ubujiji bw’abantu b’ibiburabwenge, kubera ibikorwa byanyu byiza.’’

(1 Petero 2,16-17), ‘‘Nimubeho nk’abantu bigenga, ariko ntimukoreshe ubwo bwigenge muhishira ubugome bwanyu, ahubwo mubeho nk’abagaragu b’Imana. Nimwubahe abantu bose, mukunde abavandimwe bamyu kandi muhe umwami icyubahiro.’’

Ubutegetsi ni ubw’abaturage, bugatangwa n’Imana

Mu gitabo cy’ivugururamategeko (17, 14-15), hagira hati ‘‘Numara kugera mu gihugu uhoraho Imana yawe aguhaye, ukakigarurira, ukagituramo, maze ukibwira uti ‘‘Ndashaka umwami untegeka nk’uko ayandi mahanga yose ankikije ameze’’, umwami uzimika ngo agutegeke agomba kuba ari uwo Uhoraho Imana yawe yitoreye ubwe. Umwami uzimika ngo agutegeke uzamushake mu bavandimwe bawe ; uramenye ntuzimike umunyamanahanga utari umuvandiwe wawe.’’

Mu ibaruwa ya mbere ya Timote (1 Timote 3 :5), we agaragaza ko umuyobozi ukwiye rubanda aba ari indakemwa, kandi ubushobozi bwe bugahera mu muryango we akabona kubasha kuyobora imbaga.

Avuga ko umuntu ukwiye kuyobora abandi agomba kuba ari inyangamugayo ahereye iwe mu rugo, ‘‘ntagire inda nini, agacisha make, akagira ubupfura, akamenya kwakira neza abamugana, ntabe umunywi cyangwa umunyamahane, akazira gushotorana kandi ntabe umunyabugugu.’’

Akomeza agira ati ‘‘None se koko umuntu utazi gutegeka urugo rwe bwite yashobora ate kwita kuri Kiliziya y’Imana ?’’

Ibihugu bitandukanye cyane biracyafite ko mu mategeko yabyo indahiro z’abayobozi ndetse n’abaregwa kimwe n’abatangabuhamya mu nkiko, barahira bashyize ikiganza kimwe kuri Bibiliya.

Bibiliya ivuga ko igihe ugiriye ‘Uhoraho’ Umuhigo ntuzatinde kuwuhigura, kuko iyo utabikoze “awukuryoza, bikagukururira icyaha.’’

Gusa nko mu Bwongereza, abanyamategeko baheruka gusaba ko kurahiza abatangabuhamya n’abakurikiranweho ibyaha hifashishijwe Bibiliya byakurwaho, nyuma y’uko abenshi mu babikora byafatwaga nk’aho batakibiha agaciro gakwiye, ahubwo bazajya babwirwa ko ubesya ahita ashyirwa mu buroko.

Barack Obama yarahiriye kuri Bibiliya ebyiri ziri mu biganza by'Umugore we Michelle Obama

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved