Umuherwe w’Umuhinde yakoresheje akayabo ka miliyoni $74 mu bukwe bw’umukobwa we

Yanditswe na Kanamugire Emmanuel
Kuya 16 Ugushyingo 2016 saa 01:48
Yasuwe : XX
0

Uburakari bwuje bamwe mu gihugu cy’u Buhinde gifite abakene benshi, nyuma y’uko umucuruzi w’umuherwe wahoze ari na Minisitiri, Gali Janardhana Reddy, yakoreshaga miliyoni $74 mu bukwe bw’umukobwa we bwamaze iminsi itanu, bukanitabirwa n’ibyamamare muri filimi z’Abahinde.

Ubukwe Janardhana Reddy yateguriye umukobwa we Brahmani bivugwa ko bugomba gutwara ama-rupee asaga miliyari eshanu ni ukuvuga miliyoni 74 z’amadolari ya Amerika.

Reddy yakomeje kugarukwaho cyane ku mbuga nkoranyambaga, mu gihe uyu mugabo akoresheje amafaranga menshi mu bukwe bwe kandi igihugu kiri mu bihe bikomeye by’ubukungu.

Daily Mail yatangaje ko ubutumire bwagiye butangwa mu gasanduka ka zahabu, harimo ikirahuri gishobora gukina amashusho. Muri ayo mashusho, hakagaragaramo Brahmani witeguye kurongorwa yambaye amakanzu anyuranye by’akataraboneka, umugabo we Rajeev Reddy akazamo ahagaze iruhande rw’amafarashi atanu.

Janardhan Reddy n’umugore we nabo bagaragara muri ayo mashusho baririmba indirimbo yateganyirijwe ubwo bukwe budasanzwe.

Ubu bukwe bubaye mu gihe hari hashize iminsi 10 gusa guverinoma y’u Buhinde itangaje ko ikuyeho inoti y’ama-rupee 500 na 1 000, hagamijwe gukurikirana abantu batunze amafaranga mu buryo bunyuranije n’amategeko, batigeze bamenyekanisha.

Gusa ngo hari amakuru ko Reddy yaba yarafashe inguzanyo agatanga imitungo ye iri muri Bangalore na Singapore ngo abone amafaranga y’ubwo bukwe, ndetse ibintu byose byishyuwe mu mezi make mbere y’ubukwe.

Ubu bukwe bugomba kumara iminsi itanu, kuri uyu wa Gatatu akaba ari bwo haza kuba ibirori bikomeye muri Bangalore Palace, haraza kuba harinzwe n’abasore b’intarumikwa 3000 n’abapolisi 300 bafite imbwa zihunahuna ibisasu.

Muri ibi birori kandi abahanga mu gutegura ahakinirwa amafilimi nibo bahawe akazi ko gutegura ahagomba kubera ubukwe.

Uyu mugabo wahoze ari minisitiri, yahoze mu ishyaka rya Minisitiri w’Intebe w’u Buhinde, Narendra Modi, ryitwa Bharatiya Janata Party (BJP). Yaherukaga kumara imyaka itatu ari muri gereza ashinjwa ibyaha bya ruswa, ariko we yakomeje kubihakana kugeza ubwo yarekuwe by’agateganyo mu mwaka ushize.

Abanegura Janardhana Reddy baranashingira ku kamaro k’ayo mafaranga yashoye mu bukwe, bakavuga ko angana n’inshuro eshanu z’ingengo y’imari Mauritius ikoresha ku gisirikare cyayo mu mwaka.

Ubukwe bwa Brahmani bwanditse amateka mu Buhinde
Brahmani Reddy yashyingiwe na Rajeev Reddy, umuhungu w’umwe mu baherwe bakomeye mu Buhinde
Imyiteguro y'ubu bukwe yari ku rwego ruhambaye
Janardhana Reddy yakoreye umukobwa we Brahmani ubukwe bw'akataraboneka
Umukwe we Rajeev Reddy agaragara mu mashusho ari kumwe n'amafarasi atatu
Abaturage bagiye mu mihanda kwigaragambya bavuga ko uyu muherwe yakoresheje umurengera w'amafaranga mu bukwe bw'umukobwa we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza