00:00:00 IGIHE NETWORK KN KINYARWANDA EN ENGLISH FR FRANCAIS

Tinder yahinduye isura y’uburaya mu Rwanda

Yanditswe na IGIHE
Kuya 18 Ukwakira 2021 saa 01:12
Yasuwe :
0 0

Uribuka uburyo mu myaka ishize wafataga umuntu ukubwiye ko atuye cyangwa agiye mu Migina na Sodoma! Benshi iyo babonaga umuntu utuye muri utu duce batangiraga kumukeka amababa.

Ibi byaterwaga n’uburyo hari indiri y’uburaya kuko mu masaha y’umugoroba wahasangaga abakobwa b’ikimero bitunganyije bihagije ndetse bambaye imyambaro iha abagabo karibu, ibizwi nko gutega.

Hirya no hino mu gihugu utu duce twahozeho si mu Mujyi wa Kigali gusa nk’abazi Umujyi wa Muhanga bazi ahitwa mu Ruvemera habarizwaga indaya no mu Rutenga habarizwa iza make.

Ahandi hamenyekanye ni mu Karere ka Rusizi ahitwaga ku Kabasazi habaga indaya zambukiranya imipaka kuko no muri Repubulika Iharanira Demokorasi ya Congo zari zizwi.

Covid-19 yahinduye isura y’uburaya kuko mu masaha aba bakobwa bategeragaho abantu baba bageze mu ngo ku buryo batabona umukiliya.

Abatazi ibibera ku mbuga nkoranyambaga iyo bageze ahategerwaga ntibahasange aba bakobwa bashima Imana bavuga ko batagitega, nyamara ntibazi ibiri kuba kuko gutega byimukiye ku mbuga nkoranyambaga.

Ubu hari imbuga zitandukanye abagore n’abakobwa b’ibizungerezi bashyiraho amafoto, yagwa mu jisho ry’abagabo bafite agatima karehareha bagashora akayabo.

Muri izo mbuga harimo na tinder (application ya telefone) yakozwe mu 2012 bikozwe n’Umunyamerika. Intego yari ugushakiraho abakunzi kandi abasaga miliyoni 50 ku Isi yose bamaze kuhahurira.

Uru rubuga rutangaza ko rufite abantu basaga miliyoni 57 bamaze kurukoresha kuva 2021 yatangira kandi ko 13% by’abahuriyeho bakoze ubukwe.

Mu Rwanda uru rubuga naho rurakoreshwa ariko usanga rudakoreshwa cyane n’abantu bashaka guhura ngo bakundane bazashinge urugo. Oya! Ahubwo rukoreshwa n’abashaka abo baryamana.

Covid-19 itaraza abantu bakijya mu kabari bagakesha wasangaga mu masaha akuze abari mu tubyiniro, batangira gushyiraho tinder ngo barebe ko hari umuntu ubari hafi batahana.

Uru bigenda umuntu ubikeneye ashyira iyi porogaramu muri telefoni ye cyangwa mudasobwa agashyiramo imyirondoro ashaka gukoreshaho, agashyiraho amafoto y akagaragaza abantu ashaka kujya areba niba ari abagabo cyangwa abagore.

Ikoze ku buryo ubasha kubona abantu bari hafi yawe byibuze mu bilometero bitatu, ibi nibyo bituma abantu babasha guhura mu buryo bworoshye.

Kuri ubu mu Rwanda usanga abakobwa benshi barayobotse uru rubuga aho bashyiraho amafoto, cyane cyane agaragaza bimwe mu bice by’umubiri wabo bikurura abagabo ubundi abagabo cyangwa abasore bakabashaka kubabona bakabandikira.

Iyo bamaze kwandikirana bahana nimero bakumvikana ibiciro n’aho guhurira bagamije kuryamana.

Murenzi ni izina ryahinduwe uyu musore akoresha tinder, mu kiganiro yagiranye na IGIHE yavuze ko amaze hafi imyaka itatu akoresha uru rubuga ,ko umenyanaho n’umuntu mukaba mwahuza mukaba inshuti ariko ziganisha ku kuryamana.

Yagize ati “Tinder nayimenye mu myaka itatu ishize ubwo nabaga Mwanza, muri Tanzania usanga bayikoresha cyane ku buryo benshi baba bayitunze. Nayikoresheje icyo gihe kuko nabaga mu gihugu ntazimo umuntu n’umwe ngira ngo ndebe ko nabona umara irungu kandi naramubonye.”

Yakomeje avuga ko yaje kuva aho yabaga akaza mu Rwanda kandi uru rubuga n’ubu arukoresha ariko usanga mu Rwanda abarukoresha baba bafite ipfunwe.

Yagize ati “Tanzania iteye imbere cyane, ho usanga gukoresha tinder ari ibisanzwe ariko inaha usanga abayiriho bafite ipfunwe ntibanagaragaze amafoto yabo neza n’imyirondoro nyakuri.”

“Ariko baba bahari, hari ubwo ndebaho nkabona umukobwa uri hafi yanjye nkamwandikira akaba yandeba cyangwa njye nkamureba, tukaryamana bikarangira. Iyo muhuye mukishimana mukomerezaho ubushuti ariko mbere muba mwumvikanye ibiciro.”

Abahurira kuri Tinder bavuga ko ibiciro byaho biri hejuru y’ibihumbi 50Frw bitewe n’umuntu uwo ariwe ndetse n’uwo bumvikana.

Ibyo naboneye kuri tinder

Inkuru mbarirano iratuba! Mu gushaka kureba ko Tinder ikora koko nayishyize muri telefoni yanjye, nshyiraho imyirondoro mihimbano n’ifoto nakuye kuri murandasi.

Hashize iminota 30 batangira kunyereka abantu bari hafi yanjye bari no kunkunda’Like’! Imihini mishya itera amabavu; nabanje gutinya kubasubiza ariko nibuka ko ndiho by’akazi ntangira kurukoresha.

Naje kwandikirwa n’umugabo wari hafi yanjye ambaza icyo bisaba ngo duhure mubwira ko ari amafaranga dutangira kujya mu biciro. Uwari wampaye amakuru yarwo mbere yambwiye ko iyo uhenda utabona abakuvugisha.

Nagerageje koroshya ibiciro kugira ngo adahita agenda nkabura amakuru nashakaga, namubwiye ko ari amadorali 100$, ambwira ko byasaba ko tumarana iminsi ibiri.

Kugira ngo abone ko nkomeje naramuretse nti ni ijoro rimwe gusa, twakomeje kumvikana aza kwemera ariko ansaba ko namuha nimero yanjye ndetse n’amafoto yanjye.

Icyo nashakaga kwari ukumenya koko niba uru rubuga rukora rutya. Nahise nikuriramo akanjye karenge ndarusiba, ubu yibaza aho amafoto na nimero byaheze.

Ubu buraya bushya benshi babuhuza n’imibereho ya zimwe mu nkumi nziza ziba i Kigali zidakora yewe zidafite n’imirage y’ababyeyi ariko zibayeho mu buzima bwiza kandi buhenze.

Abakurikiranira hafi bavuga ko aba bakobwa birirwa bifotoza bagashyira kuri uru rubuga n’izindi, abagabo bakabandikira bityo umukobwa agasohoka iwe agiye kuryamana n’umugabo akamuha ifaranga, akagaruka iwe abadasobanukiwe bakabona abaho batazi ikimutunze.

Muri iyi minsi indaya ijya gutega ku muhanda ni imwe bita iciriritse naho abasilimu ubu bayobotse uru rubuga. Ikibabaje muri ibi ni uko n’abana bato barujyaho batazi ibiberaho bakaba bahahurira na barusahuriramunduru bakangiza ubuto bwabo.

Usibye tinder kandi n’izindi mbuga nkoranyamabaga nka instagram hari abasigaye barazigize imbuga zo kwicururizaho cyangwa gucururizaho abakobwa.

Aha akaba ari ho haturuka ijambo ‘Slay Queen’ bakoresha bashaka kugaragaza abamikazi b’ubwiza ariko bashoboye kurya amafaranga y’abagabo bakoresheje ubwiza n’ikimero cyabo.

Imbuga nkoranyambaga ni kimwe mu bintu byoroheje ubuzima bw’abatuye Isi kuri ubu. Zifasha byinshi ariko kuzikoresha bisaba ubwitonzi buhagije kuko habaho n’ibindi bibi byinshi byakwangiriza ubuzima udashishoje.

Ibi bikaba bitanga umukoro ku babyeyi n’abarezi muri rusange wo gukurikirana ibyo abana bakorera ku mbuga nkoranyambaga kuko bashobora guhuriraho n’ibishuko byinshi bikaba byabangiriza ubuzima.

Tinder irakoreshwa mu bice bitandukanye by'isi harimo no mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .