Uburyo buboneye bwo kwihanagura igihe umaze kwiherera mu musarani

Yanditswe na Dufitumukiza Salathiel
Kuya 12 Gashyantare 2021 saa 11:31
Yasuwe :
0 0

Isuku ni isoko y’ubuzima bwiza! Biragoye ko umuntu yabaza undi ati “Ese uzi kwihanagura urangije kwiherera?” kuko ni ikibazo gishobora kugaragara nk’igiteye isoni kuri bamwe cyane ko birinda kuvuga ibyerekeranye nabyo, ndetse abenshi bakibwira ko kuko ari igikorwa cy’ingenzi buri wese azi kugikora.

Nyamara abahanga mu by’ubuzima berekana ko hari ababikora nabi batabyitayeho, ibintu bishobora kubagiraho ingaruka mu buryo bumwe cyangwa ubundi, harimo nko kuba bagira uburwayi mu myanya isohora inkari, kugira ibisebe mu kibuno ndetse n’uburwayi bwa hémorroïdes .

Hari uburyo buboneye abashakashatsi bagaragaza ko icyo gikorwa cyagakozwemo, ku buryo byatuma intego y’isuku igerwaho kandi ntihagire ingaruka mbi zikugeraho.

Koresha urupapuro rworoshye

Kugira ngo igikorwa cyo kwihanagura kigende neza bisaba ko ugikora wifashishije urupapuro rw’isuku (papier hygiénique) rworoshye kandi rumeze neza. Rukwiye kuba ari umweru nta mabara cyangwa andi marangi aruriho, ndetse rukaba nta mpumuro runaka irurimo.

Gukoresha urupapuro rukomeye, ururimo impumuro runaka, cyangwa urwongeye gukoreshwa bwa kabiri rudafite umwimerere, bishobora gutuma uribwa mu kibuno cyangwa ube wanafuruta.

Birashoboka ko waba warakoresheje urupapuro rutari urwavuzwe haruguru rubigenewe ukabona nta ngaruka bikugizeho. Ni byo birashoboka nk’uko abashakashatsi babivuga, ntabwo abantu bose bibagiraho ingaruka kimwe. Icy’ingenzi ugirwaho inama ni uko ukwiye gukoresha urupapuro ruboneye mu kwirinda izo ngaruka mbi zishobora kukugeraho.

Wihanagure uturutse imbere werekeza inyuma

Hari ababikurikiza kuko babibwiwe kuva bakiri abana hakaba n’abatabyitaho, ariko abashakashatsi basobanura ko kwihanagura uturutse imbere werekeza inyuma ari ingenzi cyane.

Mu gihe wituma “hari udukoko tuba turi mu kibuno ku buryo kwihanagura werekeza imbere bishobora gutuma utwo dukoko tujya mu myanya isohora inkari.” Ibyo bizakugiraho ingaruka zirimo uburwayi bw’imyanya isohora inkari zirimo no kuribwa igihe wihagarika.

Bikore uhagaze cyangwa wicaye

Kuba wahitamo kwicara cyangwa ugahagarara mu gihe wihanagura nta kibazo byateza. Hagaragazwa ko uburyo wumva butakugoye ari bwo ukwiye kubikoramo mu gihe ubona bitarabangama.

Genzura neza ko umwanda wose washizemo

Inama yo kuba wahagarara cyangwa ukicara ndetse ugakoresha urupapuro rworoshye kandi ruhagije wihanagura, igamije kuba wahanagura mu kibuno ukamaramo umwanda wose.

Aho bishoboka “runguruka urebe ko umwanda washizemo, aho bidashoboka ukoreshe urupapuro ruhagije kugeza igihe nawe wumva ko washizemo wose”. Iki ni cyo kintu kigaragazwa nk’icy’ingenzi kurusha ibindi ukwiye kwitaho umunsi ku munsi kugira ngo isuku yawe ikubere isoko y’ubuzima bwiza.

Bikore woroshya udashyizemo imbaraga

Nanone kandi si byiza gukoresha imbaraga mu gihe wihanagura. Hatangwa inama ko kubikora neza ari ukubikora woroshya kugira ngo utikomeretsa. Ku bafite uburwayi bwa hémorroïdes usanga bigorana kwiganagura, bagirwa inama yo gupanga amasaha yo kujya mu bwiherero.

Igihe bafashe ifunguro rya mu gitondo rigomba guherekerekezwa n’ikawa yo kubyoroshya bisohoka, ndetse bamara kurifata bakabanza kujya mu bwogero mbere yo gukora ibindi byose ngo kuko byabafasha kwihanagura neza no kwirinda uburibwe bukabije bahura nabwo babikora.

Ubundi buryo bushoboka babwirwa bwabafasha, ni ukuba bakwifashisha amazi bayashyira mu kibuno hagatoha maze bikaborohera kubikora.

Hatangwa inama ko mu gihe ugize ibibazo bitandukanye bifite aho bihuriye no kwihanagura, nko kuva amaraso mu kibuno, kwangirika kw’udutsi n’ibindi, ukwiye kwegera muganga akabigufashamo.

Iyi nkuru ishingiye ku bushakashatsi bwakozwe n’inzobere mu kuvura indwara zibasira imyanya myibarukiro y’abagore yo muri Kaminuza ya Westchester County, Alyssa Dweck; inzobere mu by’indwara z’igifu n’amara yo muri Kaminuza yigisha iby’ubuzima ya Northshore, Monica S. Borkar, na Kaminuza y’ubuvuzi ya Johns Hopkins.

Umuntu ashobora kwihanagura yicaye cyangwa ahagurutse
Kwihanagura nyuma yo kwiherera, ni byiza gukoresha urupapuro rw'isuku rworohereye kandi rw'ibara rimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .