U Burusiya: Leta yatangiye iperereza ku cyahinduye umugezi wa Dalydkan nk’amaraso

Yanditswe na Ishimwe Israel
Kuya 8 Nzeri 2016 saa 06:04
Yasuwe :
0 0

Ubwoba ni bwose mu mujyi wa Norilsk uherereye hafi y’umugezi wa Dalydkan aho biri gukekwa ko haturitse impombo zakoreshwaga n’uruganda, Norilsk Nickel rutunganya ibikoresho by’ubutabire bukozwe mu butare bwa nickel bikaba ari na byo byateye amazi y’uyu mugezi guhinduka umutuku.

Urwego rushinzwe kurengera ibidukikije mu Burusiya rwatangaje ko bohereje inzobere gukora iperereza mu rwego rwo gushaka amakuru mpamo y’imvano y’iryo sanganya.

Ku wa kabiri ni bwo hatangiye gucicikana amafoto ku mbuga nkoranyambaga no mu binyamakuru byo mu Burusiya agaragaza amazi y’umugezi wa Dalydkan yahindutse umutuku.

Si ubwa mbere uyu mugezi uhinduye ibara kuko no muri Kamena byigeze kubaho nk’uko bamwe babitangaje.

Ikinyamakuru cya Leta, Rossiiskaya Gazeta cyatangaje ko uruhombo rutwara imyanda ituruka mu ruganda rw’umuherwe Oligarch Vladimir Potanin ruza ku isonga ku isi mu zikora ibyuma byo mu butare bwa nickel na palladium arirwo rushobora kuba rwaratobotse, bigatuma uyu mugezi uhinduka umutuku.

Minisiteri y’Umutungo kamere n’ibidukikije mu Burusiya kuwa Gatatu yavuze ko iri gukora iperereza ngo hamenyekane iby’ubutabire byaba byanduje uyu mugezi aho bikekwa ko byaba byatewe n’iturika z’impombo zo muri Norilsk.

Norilsk Nickel yo yahakanye yivuye inyuma ko hari ibituruka mu ruganda rwabo byaba byagiye muri uyu mugezi bavuga ko ngo ari ryo bara n’ubundi wari usanganywe nk’uko byatangajwe n’Ibiro Ntaramakuru, RIA Novostiki.

Gusa na none kandi abayobozi b’uru ruganda bavuze ko babaye bagabanyije by’agateganyo uburyo bw’imikoreshereze yarwo bakimara kumenya iki kibazo.

Umuyobozi wa Norilsk yavuze ko ibijya muri uwo mugezi bifite ahandi bikomoka atari mu ruganda rwabo.

Umushakashatsi Denis Koshevoi , uri gukorera impamyabumenyi y’ikirenga mu ishuri rikuru ry’ubumenyi bw’isi n’ubusesenguzi mu bijyanye n’ubutabire rya Vernadsky we yabwiye The Guardian ko bijya bibaho mu buryo bw’impanuka mu gihe runaka izo mpombo zigaturika hanyuma ibyacagamo bigatembera muri uwo mugezi ngo nayo ishobora kuba intandaro yo kuba wahinduye ibara.

Umwe mu batuye muri Norilsk witwa Yekaterina Basalyga yashyize amafoto abiri y’uyu mugezi ku rubuga rwe rwa Instagram aho yanditseho ngo “Mugira ubwoba mugahinda umushyitsi iyo mubonye ibi ariko kandi abandi na bo bakomeza kwisarurira ibihumyo ndetse n’inkeri.”

Norilsk ni agace k’inganda gafatwa nk’ankanduza ikirere mu buryo bukomeye kubera izo nganda zigaherereyemo,kakaba kandi karangwamo guhindagurika kw’ibihe kudasanzwe aho hashobora kumara amezi agera kuri abiri ari mu gicuku.

Umugezi wa Dalydkan wahindutse umutuku

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza