U Buhinde: Inyoni ifunzwe ikekwaho ubutasi

Yanditswe na Uwishyaka Jean Louis
Kuya 4 Ukwakira 2016 saa 08:49
Yasuwe : XX
0

Inyoni ikekwaho kuba intasi ya Pakistan, yafunzwe na Polisi yo mu Buhinde nyuma yo gufatwa ijyanye mu Buhinde urwandiko ruriho ubutumwa butera ubwoba.

Ku mugoroba w’itariki ya 3 Ukwakira 2016, ni bwo Polisi yo mu Buhinde ikorera ku mupaka ugabanya ibihugu byombi yataye muri yombi inyoni yari ifite ubutumwa bwanditse mu rurumi rwa Ourdou rukoreshwa mu Buhinde ndetse no muri Pakistan, bwari buziritswe ku kuguru kwayo.

Iyi nyoni ngo yavumbuwe mu mujyi wa Pathankot muri Punjab, mu burengerazuba bw’u Buhinde.

Muri Mutarama 2016,aka gace kafatiwemo iki gisiga, habereye imirwano hagati y’abasirikare b’u Buhinde ndetse n’inyeshyamba zo muri Pakistan, abantu barindwi bahisa ubuzima.

Ubwo butumwa iyo nyoni yari ifite, ngo bwari bugenewe Minisitiri w’Intebe mu Buhinde, Nerandra Modi bugira buti “Modi, ntitukiri ba bantu bo mu 1971, ubu buri wese ndetse n’umwana yiteguye kurwanya u Buhinde.”

Umwaka wa 1971 ni wo wanyuma uheruka kubamo intambara mu buryo bweruye hagati y’ibihugu byombi, aho byarwanaga bipfa agace ka Pakistan y’u Burasirazuba, ubu ni muri Bangladesh.

Rakesh Kumar, Umuyobozi wa polisi mu Buhinde yatangaje ko ubwo butumwa bwari bwasinyweho n’umutwe w’inyeshyamba wa Lashkar-e-Taiba ukorera muri Pakistan, uwayanditse yari yiyise ’ibitero bya Mumbai mu 2009’ .

Rakesh Kumar aganira n’Ibiro Ntaramakuru by’Abafaransa,AFP, yagize ati " Ubu Ibikorwa by’iterabwoba tubifata nk’ikintu gikomeye cyane."

Umwuka si mwiza hagati y’u Buhinde na Pakistan

Ngo si ubwa mbere inyoni zifashishwa mu gukora ubutasi hagati y’ibi bihugu.

Muri 2015, u Buhinde bwafashe inyoni nk’iyo ikekwaho ubutasi na ho muri 2013 polisi y’iki gihugu na bwo yari yafashe inyoni yapfuye iziritsweho camera nto.

Ibi bikorwa kandi bije mu gihe ibihugu byombi birebana ay’ingwe, bipfa intara ya Kashmir byose byiyitirira kuva kera.

Iki gisiga ngo kizaguma mu buroko kugeza igihe iperereza rizarangirira.

Iyi nyoni yafashwe ijyanye ubutumwa butera ubwoba Leta y' u Buhinde

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza