U Buhinde bugiye kumurika ikibumbano kirekire ku Isi

Yanditswe na Mukaneza M.Ange
Kuya 26 Ukwakira 2018 saa 12:22
Yasuwe :
0 0

U Buhinde bugiye kumurika ikibumbano cya Sardar Vallabhbhai Patel, impirimbanyi ya politiki yagize uruhare mu bwigenge bw’iki gihugu mu 1947.

Iki kibumbano kizaba ari cyo kirekire ku Isi aho gifite metero 182 , cyubatse ku mugezi wa Narmada muri Leta ya Gujarat. Kizamurikwa ku wa 31 Ukwakira.

Mu 2013, Minisitiri w’Intebe w’u Buhinde, Narendra Modi, yavuze ko abantu benshi bavuga ikibumbano cyo muri Amerika kizwi nka ‘Statue of Liberty’, bityo bifuza ko icya Patel kiba kirekire inshuro ebyiri ugereranyije n’iki gifite metero 93 z’uburebure.

CNN dukesha iyi nkuru ivuga ko umushinga wo kubaka iki kibumbano gikozwe muri bronze watangajwe na Modi mu 2010, icyo gihe yari akiri Minisitiri muri Leta ya Gujarat.

Biteganyijwe ko iki kibumbano cyiswe ’Statue of Unity’ kizarangira neza gitwaye agera kuri miliyoni 410 z’amadolari, yatanzwe na Leta ya Gujarat, Guverinoma y’u Buhinde ndetse n’abantu ku giti cyabo.

Uretse iki kibumbano, hafi yacyo hanubatswe inzu ndangamurage, ahakorerwa ubushakashatsi ndetse n’ikigo cy’imyidagaduro.

Hari bamwe ariko basanga kubaka iki kibumbano ari uburyo Modi n’ishyaka rye Bharatiya Janata bashaka gukoresha mu gushaka kwihisha inyuma y’izina ry’umuntu wamenyekanye cyane mu mateka y’u Buhinde.
Patel wabarizwaga mu ishyaka Congress Party kuri ubu ritavuga rumwe na leta, yagize uruhare mu rugamba rwo gusaba ubwigenge k’u Bwongereza, ariko bikozwe mu mutuzo.

Yabaye Minisitiri w’Intebe wa mbere wungirije ubwo igihugu cyabonaga ubwigenge na Minisitiri w’Umutekano. Yitabye Imana mu 1950 afite imyaka 75.

Ikibumbano cya Patel si cyo gusa cyitezweho guca agahigo, kuko u Buhinde buri no kubaka ikindi cya Shivaji Bhonsle wari indwanyi ikomeye yabayeho mu myaka ya 1600. Kizaba gifite uburebure bwa metero 212.

Mu bibumbano bya mbere ku Isi muri iki gihe hari Spring Temple Buddha kiri mu Bushinwa, kireshya na Metero 128. Muri Afurika ikirekire kiri mu Mujyi wa Dakar kizwi nka ‘Monument de la Renaissance Africaine’ kireshya na metero 49.

Abakozi bari mu mirimo ya nyuma ngo iki kibumbano kizamurikwe mu cyumweru gitaha
Ikibumbano cya Sardar Vallabhbhai Patel gifite uburebure bwa metero 182
Ni cyo kibumbano gisumba ibindi biri mu bihugu bitandukanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza