Nyabugogo: Yabeshye abantu ko agonzwe n’imodoka ngo ahabwe amafaranga (Amafoto)

Yanditswe na Uwishyaka Jean Louis
Kuya 10 Nzeri 2016 saa 11:54
Yasuwe : XX
0

Ubutekamutwe bugamije kubona indonke muri Kigali bumaze gufata indi ntera mu duce dutuwemo n’abantu benshi nka Gitega, Kimisagara, Remera, Muhima, Nyamirambo ho bikaba akarusho, kuko ngo hari n’abiba kumanywa izuba riva.

Ubwo butekamutwe busigaye butuma hagaragara abantu batandukanye barimo abana n’abakuru baba bagerageza guhimba imitwe kugira ngo babeshye abaturage babahe amafaranga.

Ibyo byatumye umugabo witwa Ndizihiwe bakunda kwita Nyinya wikorera imizigo Nyabugogo wari wanyoye inzoga, atungura benshi muri Gare ya Nyabugogo mu Karere ka Nyarugenge, yigusha hasi abeshya ko hari umuturage umukubise igipfunsi anamusunikira ku modoka itwara abagenzi ya Trinity Express bituma imugonga.

Ahagana Saa yine n’igice zo mu gitondo zo ku wa Gatanu tariki ya 9 Nzeri 2016, ni bwo uyu Ndizihiwe utuye mu Mudugudu wa Kimisagara, mu Kagari ka Kimisagara yigushije imbere y’imodoka yari muri gare ya Nyabugogo ahita abeshya ko imugonze kugira ngo abone amafaranga.

Ndizihiwe cyangwa se Nyinya, akimara kugwa hasi yahise avuza induru anataka ngo imodoka iramugonze , ku buryo bamwe mu bagenzi bari muri iyo gare byatumye bahurura baza kureba icyo abaye.

Ndizihiwe yabwiye IGIHE ko agonzwe n’imodoka ndetse ko kugira ngo agongwe byaturutse ku muturage wamunyuzeho aramuhirika.

Yagize ati “ Yoo yooo! Ndi kubabara hano, Hoya sinzi ingonze mbonye ngwa hano gusa, Ni umuntu nyuzeho aransunika mpita ngwa mu modoka.”

Uyu mugabo yakomeje arira cyane anataka agaragariza abari bamushungereye ko yavunitse ukuboko ndetse akeneye ko abamugonze bamujyana kwa muganga.

Gusa icyatunguye benshi mu baturage bari bashungereye uwo Ndizihiwe, ni uburyo nyuma yo guhabwa amafaranga 500 yo kujya kugura umuti w’imvune yahise ahaguruka nk’umuntu muzima yisubirira mu kazi ke ko kwikorera imizigo nk’ibisanzwe.

Umwe mu baturage bari baje gushungera yavuze ko atangajwe n’ibyakozwe n’uyu mugabo wari umaze kubeshya ko yagonzwe.

Bizimukiza Emmanuel yagize ati “ Ndumiwe kuko nari nzi ko bamugonze ahubwo nidutinda kumujyana kwa muganga ashobora gupfira aha, gusa ntangajwe n’uburyo abaturage bamuzi bavugaga ko nabona amafaranga ahita ahaguruka, bamara kuyamuha koko agahita atangira guseka kandi yari ari kurira."

Yavuze ko yagonzwe n'imodoka asaba guhabwa amafaranga yo kwivuza
Hagobotse Umupasiteri ashyiraho ake aramusengera azi ko yagonzwe
Abantu muri Gare bateranyije amafaranga 500 yo kujya kugura umuti ayakubita umufuka asubira mu kazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE