Musanze: Barora wamaze imyaka 40 ahiga muri Pariki yasobanuye uko umutima w’inzovu unurira

Yanditswe na Nshimiyimana Gonzalde
Kuya 19 Mata 2017 saa 11:01
Yasuwe :
0 0

Léonidas Barora wahize inyamaswa zo mu mashyamba y’ahahinduwe Pariki y’Ibirunga mu Majyaruguru y’u Rwanda, yasobanuye imvo n’imvano ye muri uru rugendo yamazemo imyaka 40, ahishura n’uburyo umutima w’inzovu wamubereye ntagereranywa kubera uburyo unurira.

Uyu mugabo w’imyaka 65 akomoka mu Kinigi, mu Karere ka Musanze. Mu kiganiro cyihariye yagiranye na The Guardian yo mu Bwongereza, yatangaje amavu n’amavuko ye n’uko yaje kwigarurirwa n’umutima w’inzovu mu mafunguro ye ya buri munsi.

Barora ashize amanga yagarutse ku buhamya bw’uburyo yabaye mu ishyamba n’uburyo yatangiye gutungwa no guhiga.

Ati “Twabaye mu mashyamba igihe kirekire mbere y’uko yegukanwa na Leta. Icyo gihe twafatwaga nk’abarinzi bayo kandi yari avuze byinshi kuri twe. Muri iyo mibereho ntabwo nigeze menya icyitwa ishuri, kandi si njye gusa kuko ni na ko byari biri ku babyeyi n’abavandimwe banjye, bose imibereho yabo yari iy’ishyamba.

Mu myaka myinshi twabayeho dutunzwe n’umwuga w’ubuhigi, ibyo kurya byacu byari inyama ndetse n’imbuto zo mu ishyamba. Muri uyu mwuga twari abahanga mu buryo bushimishije kuko twabashaga kwica inyamaswa yose twifuza.

Natangiye guhiga mfite imyaka 15 gusa, akenshi ngakoresha imyambi ndetse rimwe na rimwe nkanifashisha imitego itega inyamaswa. Ntibyari kunkundira kubona imbunda. Inshuti zanjye twari dusangiye umwuga zarankundaga kuko zari zizi neza ko nta nyamaswa twahuraga ngo ishobore kumva mu nzara. Nishe inyamaswa nyinshi, nibura ndibuka ko nishe iz’inkazi zigera kuri 200 zirimo imbogo, impongo n’izindi nyinshi.

Twagurishije inyama nyinshi cyane kandi ku giciro gito kuko twashakaga kugura ibiribwa byagombaga kunganira ibyadutungaga birimo ifu y’ibigori n’ibindi byo kurya tutari dufite. Igihe nari maze kubaka urugo, ibi byaramfashije njyewe n’umugore wanjye n’abana bacu batanu.”

Uko yahize inzovu

Barora atangaza ko rimwe na rimwe bavumburaga inyamaswa z’inkazi bakabanza guhangana na zo.

Ati “ Hari igihe twagiraga amahirwe tukavumbura inyamaswa nini nk’inzovu. Yari imwe mu zigira amakare kuko yashoboraga kuturwanya ikatunaniza tugataha. Kandi wasangaga inzovu ari inyamaswa zibangutse. Twaranezerwaga cyane iyo twicaga inzovu kuko yashoboraga kudutunga iminsi myinshi ariko nakundaga cyane umutima n’umwijima wazo kuko wanuriraga kandi ukaba worohereye.

Twanashoboraga kandi kugurisha amahembe y’inzovu kugira ngo tubone ibindi byifashishwa mu gutegura amafunguro. Numvise abantu benshi ngo babigira ubucuruzi bikanabakiza ariko twe twayagurishaga twishakira ibyo kurya gusa.

Politiki ya Leta yatumye ava mu ishyamba

Uyu mugabo atangaza ko binyuze muri gahunda yo kubungabunga urusobe rw’ibinyabuzima baganirijwe berekwa ko bidakwiye kwica inyamaswa kuko bituma amadovize yinjira mu gihugu agabanyuka ndetse n’inyungu y’abaturage ikagenda nka nyomberi.

Muri gahunda yo gusaranganya abaturage umusaruro w’ubukerarugendo, 5% byawo agenerwa imishinga iteza imbere abatuye mu bice bituriye pariki.
Ikigo cy’Igihugu cy’Iterambere (RDB) cyakoze ibikorwa byinshi birimo kubaka ibigo nderabuzima, kugeza amazi meza ku baturage, kubaka amashuri, ibikorwa bifasha mu bucuruzi, ibyo byose bikaba byarakozwe mu mirenge 42 yo mu turere 12 kuva mu 2005.

Ati “ Umunsi umwe abayobozi baraje baratuganiriza batubwira ko kwica inyamaswa bitemewe, ko zikwiriye kurindwa maze ba mukerarugendo bakaza kuzisura bagasiga amadovize.

Ibi sinigeze mbyiyumvisha kuko nicaga gusa izigomba kuntungana n’umuryango wanjye. Nabayeho igihe kitari gito ndinda ishyamba kandi sinabihembewe, ubu sinabasha kumva ukuntu nyuma y’imyaka 40 ari bwo guhiga bibaye icyaha.

Si njye njyenyine wibwiye ibi ngibi kuko hari bamwe baje gufatwa barafungwa. Narababaye cyane ndibaza nti ‘ni gute wafungirwa ibyo kurya bisanzwe byagukujije? Nyamara naje kumenya ko bamwe mu bafunzwe harimo n’abafataga abana b’ingagi bakabagurisha n’abazungu bakajya kuzororera mu ngo, ibikorwa byakorwaga nk’ubushimusi.

Mu 2004, Sabuhoro Edwin yahawe inshingano zo kurinda inyamaswa mu gace k’ahahindutse Pariki y’Igihugu y’Ibirunga. We yari umugabo w’umuhanga cyane. Twahuye na we tugera ku ijana aratubwira ngo arashaka kutwereka uburyo tuzajya tubona amafunguro tutishe inyamaswa.

Nk’uko byangendekeye mbere, na bwo sinashoboraga kwiyumvisha ukuntu ibyo byashoboka, ariko yatubwiye ko afite umugambi. Yagerageje kumvisha Leta ko batagomba kudufunga igihe tuzaba twashakishije ubundi buryo twabonamo amafunguro.

Sebuhoro yatubwiye ko yabitse amafaranga ahagije ku mushahara we ko agiye gushaka urwuri rwe maze tukajya twororeramo amatungo mato ndetse tukabasha kubona inyama n’undi musaruro uturutse mu murima. Iki gitekerezo cyari kiza n’ubwo rwose tutari twarigeze tworora cyangwa ngo duhinge na rimwe mu mibereho yacu.

Urugendo rwo kuva ku gushimuta kugera ku kurinda inyamaswa

Barora yabaye umurinzi w’inyamaswa atangaza ko atarebera irihumye uwo ariwe wese wahungabanya inyamaswa.

Ati “Ubu nanjye ndi mu ruhando rwo guhangana n’umuntu wagerageza guhiga inzovu n’imbogo. Nahagaritse guhiga muri uwo mwaka Edwin yatugiragamo inama. Mu mezi atandatu gusa, twari tumaze kweza ibijumba, ibigori n’ingano byinshi twatungishaga ingo zacu ndetse tugasagurira n’amasoko. Abari barasigaye mu ishyamba barabyumvise bahita baza batwiyungaho.

Nyuma y’imyaka ibiri, Edwin yatangije Umudugudu ndangamuco uzwi nka ‘Iby’iwacu Cultural Village’ wubatse mu nkengero z’Ishyamba ry’Ibirunga ugizwe n’inyubako gakondo zigaragaza umuco Nyarwanda, zibumbatiye ibisigisigi bitandukanye by’amateka byashyiriweho kugaragariza ba mukerarugendo ishusho y’u Rwanda rwo hambere.

Ba mukerarugendo bamwe barishyura bakanamara igihe mu Rwanda, ubwo natwe tukaboneraho tukagurisha ibyo tuba twakoze by’ubugeni bakaduha amafaranga.

Barora atangaza ko kuri ubu bakataje mu gusigasira ubusugire bw’inyamaswa bicaga urusorongo.”

Ati “Ndakomeje kugerageza uko nshoboye gushakisha abahiga inzovu, ingagi n’imbogo. Mu by’ukuri nta n’umwe ndafata ariko narahiye ko ntazacogora mu rugamba rwo guhangana n’ushaka gushimuta inyamaswa mu gihe nzaba ngifite ubugingo, ati ‘niteguye gupfa ndinda inyamaswa.’”

Avuga ko ubushimusi ari bubi kandi ko umuntu wese ukigerageza kwica inyamaswa mu ishyamba akwiye gushaka ubundi buryo bw’imibereho.

Barora avuga ko yamaze imyaka 40 ari umuhigi w'inyamaswa zirimo n'iz'inkazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244