Menya iby’ingenzi abashakashatsi boherejwe mu isanzure bitwaza

Yanditswe na Dufitumukiza Salathiel
Kuya 11 Gashyantare 2021 saa 10:00
Yasuwe :
0 0

Iyo wumvise cyangwa ugasoma ibijyanye n’ubushakashatsi bubera mu isanzure ushobora gutekereza ko ari ubushakashatsi nk’ubundi bwose, ariko hari umwihariko kuko budakorerwa kuri uyu mubumbe ikiremwamuntu gisanzwe kimenyereye.

Mu mibumbe ibarirwa muri miliyari iba mu isanzure, kugeza ubu Isi ni yo yonyine ikiremwa muntu gituyeho, nubwo abashakashatsi bagisuzuma ko hari indi mibumbe nka Mars ubuzima bwa muntu bushobora gukomerezaho.

Birumvikana inyigo zose zikorwa n’ibigo bitandukanye birimo iby’Abarusiya, Amerika n’u Bushinwa, hari abantu boherezwa mu isanzure bakajya gushaka amakuru yifashishwa mu kureba imiterere y’isanzure n’uko ibikorwa bya muntu bizahagera, byarimba akahimukira.

Muri urwo rugendo usanga akenshi rumara amezi, hari iby’ingenzi baba bagomba kwitwaza kugira ngo bazahagere banagaruke amahoro.

Ikigo cy’Abanyamerika gikora ubushakashatsi mu isanzure,NASA, gisobanura ko iby’ibanze ugiye mu isanzure yitwaza ari ibintu bisanzwe ari nkenerwa cyane ku buzima bwa muntu. Ibyo ni ibiryo, amazi, umwuka n’icumbi.

Birazwi ko umuntu akenera kurya buri munsi. Ibyo bituma igihe umushakashatsi agiye koherezwa mu isanzure hatekerezwa ku kizamutunga muri urwo rugendo.
Amafunguro bitwaza kuyategura nabyo bishyirwamo inyurabwenge kuko aba ari menshi bijyanye n’igihe bazamarayo, ndetse hagategurwa uburyo bunoze bwo kuyabikamo ku buryo atakwangirika.

Hambere abashakashatsi bahabwaga ibiryo bikozwe mu ifu nk’imitsima n’imigati ariko byakaranzwe ku buryo bizamara igihe kinini. Ibyo byaje guhinduka kuko abenshi muri bo bagiye babyinubira bavuga ko bikomera, bityo kubirya bikagorana.

Ubu abagiye mu isanzure bategurirwa ibiribwa byiganjemo imbuto n’imboga bibisi, ndetse n’ibindi byatetswe ariko ku buryo biba bifite ubuhehere bitarakomera cyane, kubirya bikabasaba kongeraho amazi make cyangwa bakabishyushya.

Nubwo abari bujyeyo bashobora kuvuga ibyo bifuza gutegurirwa, usanga ahanini bakunze gutekerwa amagi, inyama z’inkoko n’iz’inka, amakaroni, foromaje, isupu y’ibihumyo, ndetse bagahabwa n’agasembuye kazabyururutsa.

Bahabwa kandi ikawa, icyayi, imitobe bitunganyijwe nk’ifu bazifashisha bakora ibinyobwa bidasembuye.

Uburyo bwo kubibika bwo buracyagoranye kuko nta byuma bikonjesha bajyana, ahubwo ibyakwangirika vuba bagirwa inama yo kubirya mu minsi ya mbere.

Ibisaba kubirya bibanje gushyirwamo amazi nabyo bigirwa bike, kuko amazi baba bafite aba atari menshi.

Mu mezi atanu mbere yo kujya mu isanzure, ubwoko bw’amafunguro bazajyana arabanza agakorwaho inyigo, hakarebwa igihe yamara atarangirika n’uko uburyohe bwayo bwaba bumeze ageze ahantu hatandukanye no ku Isi.

Ingano yabyo yo akenshi ntabwo isaba imibare myinshi kuko abashakashatsi bavuga ko iyo bagezeyo badashaka kurya kenshi.

Uburyo amazi bakoresha abonekamo, ntibisaba ko bayatwara mu cyogajuru ahubwo uburyo bw’ingufu icyogajuru gikoresha kigenda ni nabwo bubyara amazi, habayeho guhura kwa hygrogène na oxygène. Ayo mazi ntabwo amenwa ahubwo arongera agatunganywa (recycling) agakomeza gukoreshwa, gutyo gutyo kugeza igihe bazavirayo.

Icumbi bagenda baryitwaje aho bahabwa ibisa n’ibikapu bashobora kwifubikamo bagasinzira, cyangwa bakaryubaka bagezeyo, mu rwego rwo kubona aho baruhukira no kwirinda ikindi kintu gishobora kubahungabanyiriza umutekano mu isanzure.

Umwuka bahumeka mu isanzure nawo barawuhabwa mbere yo kwerekezayo, kuko nta kirere isanzure rigira nk’icy’Isi kibamo OXygène. Ushyirwa mu cyogajuru kugira ngo abakirimo babashe guhumeka nk’abakiri ku Isi.

Abashakashatsi bagiye mu isanzure bitwaza ibintu nkenerwa cyane ku buzima bwa muntu birimo ibiryo, umwuka, amazi n'icumbi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .