Malaria ishobora kujya ipimirwa mu mwuka umuntu ahumetse

Yanditswe na Evariste Nsengimana
Kuya 8 Ugushyingo 2017 saa 10:49
Yasuwe :
0 0

Abashakashatsi bo muri Leta Zunze Ubumwe za Amerika bari gusuzuma agakoresho kazajya kifashishwa mu gupima umwuka w’umuntu, kagaragaza niba arwaye cyangwa atarwaye malaria.

Aba bashakashatsi bagaragaje icyizere gikomeye bafitiye ako gakoresho mu gupima indwara ya malaria cyane cyane ku bana, gusa ngo hari ibindi bikenewe gukorwaho kugira ngo karusheho kugira ubushobozi buhambaye.

Nk’uko BBC dukesha iyi nkuru yabitangaje, Prof Audrey Odom John, wo muri Kaminuza ya Washington n’abandi bakoranye ubwo bushakshatsi avuga ko ako gakoresho kitezweho kuzaba ari uburyo bumwe buhendutse kandi bworoshye mu gupima Malaria.

Ako gakoresho gafite ubushobozi bwo gutandukanya impumuro esheshatu z’umwuka umuntu ahumetse; kageragerejwe ku bana 35 bo muri Malawi barimo abarwaye n’abatarwaye malaria, kerekana ko 29 muri abo bana ibipimo byabaye byo, ku kigero cya 83%.

Abashakshatsi batangaje ko gupima malaria mu maraso bisanzwe bikoreshwa bihenze kandi rimwe na rimwe bisaba ubuhanga budasanzwe kugira ngo hatagira ubyibeshyaho.

Umwarimu mu Ishuri ryigisha iby’isuku n’ubuvuzi mu Bwongereza, Prof James Logan, yavuze ko uburyo bwo gupima malaria mu maraso rimwe na rimwe bugorana bikaba inzitizi mu kuyikumira.

Yagaragaje ko ako gakoresho kazagira uruhare rukomeye mu kuyikumira, asaba abo bashakashatsi gushyira umuhate mu bikorwa byo kunoza imikorere yako.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza