Kumva indirimbo zishimishije bifasha kwagura intekerezo zo guhanga udushya

Yanditswe na Tombola Felicie
Kuya 28 Ukwakira 2017 saa 04:56
Yasuwe :
0 0

Abantu baryoherwa n’umuziki n’abakunda kumva indirimbo zinyura amatwi bibongerera amahirwe yo kubangukirwa n’ibitekerezo ku buryo babasha no guhanga udushya.

Abashakashatsi bo muri Kaminuza ya Radboud yo mu Buholandi n’abo mu y’Ikoranabuhanga ya Sydney muri Australie bacukumbuye isoko muzi yafasha umuntu kwigiramo ibitekerezo by’udushya nka kimwe mu by’ingenzi bitanga ibisubizo birambye muri sosiyete.

Mu makuru bakusanyije basanze kumva indirimbo zishimishije bigira uruhare mu gutuma ibyo bitekerezo by’udushya biza mu muntu atagombye gufata umwanya ngo abitindeho.

Ubu bushakashatsi bwakorewe ku bantu 155 bashyirwa mu matsinda atandukanye, harimo iryo kumva ubwoko bw’umuziki utaneza abawumva, ushimishije, urimo ishavu n’uvuga ibyo kwigunga.

Ababaga batangiye kumva indirimbo ishimishije ngo mu ntekerezo hahitaga hazamo igitekerezo gishya bagaragaza ko bashobora kugikora kandi mu gihe barimo kumva izo ndirimbo bagahita bagira ibitekerezo byinshi muri bo.

Abashakashatsi banyuze ku matsinda yose yari yakoreweho ubushakashatsi, bemeje ko iry’abumvaga umuziki ushimishije bahitaga bagira ibitekerezo byinshi kandi byagutse by’uburyo bashobora gukora ikintu mu buryo bwihariye kurenza uko byabaga bimeze ku bo mu yandi.

Uwari uyoboye ubu bushakashatsi, Simone Ritter, wo muri Kaminuza ya Radboud, yagize ati "Ubushakashatsi bwacu bwatweretse ko kumva umuziki ushimishije bifasha cyane umuntu kugira byihuse ibitekerezo byo guhanga udushya atagombye kwicara hasi ngo afate umwanya munini akoresha ubwonko. Bifasha kandi mu kugira ibitekerezo by’udushya haba muri muri siyansi, uburezi n’ibindi.”

Injyana z’amajwi n’uburyo zirema uburyohe mu matwi nabyo bikangura ababyumva mu kubasha gufungurira intekerezo zo guhanga udushya.

tombola@igihe.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza