Kigali: Umuzamu yanze ko Umuyobozi w’Ishuri asohoka mu kigo adasatswe

Yanditswe na Mugabo Jean d’Amour
Kuya 21 Werurwe 2018 saa 08:12
Yasuwe :
1 0

Ibibazo biri mu Rwunge rw’Amashuri APERWA ruri i Kabuga mu Karere ka Gasabo byatumye umuzamu w’ikigo ategeka Umuyobozi wacyo kumuha ikigapu cye akagisaka mbere y’uko asohoka ku mugoroba wo ku wa Kabiri.

APERWA ivugwamo ibibazo bishingiye ku micungire mibi y’umutungo byatumye abakozi batabona imishahara n’abanyeshuri bataha badakoze ibizamini byo gushyira mu ngiro kandi biga mu mashami y’ubumenyingiro bitewe n’uko nta gikoresho na kimwe ikigo gifite mu bikenewe.

Ubwo umunyamakuru wa IGIHE yageraga kuri GS APERWA ahagana saa kumi n’imwe z’umugoroba yangiwe kwinjira maze umuzamu amubwira ko mu kigo hatari umwuka mwiza (hari ibibazo) bityo ko nta muntu wemerewe kuhagera nyuma y’amasaha y’akazi.

Umunyamakuru yahise ahamagara Umuyobozi w’Ikigo, Mbiteziyaremye Jérôme, kuri telefone na we ahageze umuzamu amubwira ko yahawe amabwiriza n’Ukuriye Inama y’Ubutegetsi y’Ikigo na Komite y’Ababyeyi ko nta muntu ugomba kucyinjiramo.

Mbiteziyaremye yasubiye gufata igikapu cye ngo asohoke hanze ariko mu kugaruka ari kumwe n’abandi bakozi b’ikigo barimo Umucungamari n’Umunyamabanga bategekwa n’umuzamu kumuha ibyo bafite byose akabasaka.

Umuzamu ati “Zana ibyo bikapu byawe mbanze mbisake. Ntimusohoka ntabasatse, ntabwo ejo mwagaruka hano.”

Umucungamari ati “Ibikapu byanjye ariko kabiri kangahe wowe unsaka? Wowe uransaka? Nta soni!” Mbiteziyaremye ati “Reka mbereke, nimuze adukurikire.”

Bose bava mu marembo basubira mu kigo naho umuzamu ati “Ntabwo munyura mu gituri (inzira z’ubusamo zatobowe mu ruzitiro), ntaho munyura rwose.”

Bahise bagaruka ku marembo bakomeza kujya impaka, abashakaga gusohoka bagira bati “Mwafashe umwanzuro wo kutwambura no kudukingirana!”

Umuzamu ati “None se nzi ibintu mutwaye ubu?” Mbiteziyaremye ati “None se njyewe ibyo nazanye urabizi ku buryo wansaka? Ninjira hano waransatse?

Umuzamu ati “Njyewe nahawe akazi, wowe baza umukoresha wawe, aragukoresha nanjye akankoresha.” “Ndabeshya wa mugabo we? (Abwira umunyamakuru).”

Mbiteziyaremye ati “Manzi, nkufunguriye igikapu ukabona ibintu birimo wabikoraho iki?”

Umuzamu ati “Ntacyo nabikoraho.” Mbiteziyaremye ati “Nonese wakabimenye. Na

Uturutsemwabo Michel ‘representant’ (Ukuriye Inama y’Ubutegetsi y’Ikigo na Komite y’Ababyeyi) ntashobora kumpagarara imbere. Fungura aha ngaha rero.”

Manzi yahise afungura maze bamwe bamuha inkwenene bagira bati ese ko wahawe amategeko none ukaba uyishe? Abasubiza ati “Njyewe nishe amategeko kubera Umuyobozi w’Ikigo twaruhanye hano, ndabyibutse. Ariko nubwo nkoze iryo kosa ntabwo ejo nzongera kurikora.” Ni impaka zamaze iminota igera ku 10.

Umuyobozi w’Ikigo n’Ukuriye Inama y’Ubutegetsi baritana ba mwana

Mu ibaruwa IGIHE ifitiye kopi, Mbiteziyaremye yandikiye inzego zitandukanye mu cyumweru gishize yavuze ko abanyeshuri badafite “igikoresho na kimwe cya “pratique”, abakozi bo mu biro twatangiranye mu Ukwakira 2017 ntabwo bigeze bahembwa, abarimu twatangiranye umwaka w’amashuri wa 2018 nta n’umwe urahembwa kugeza ubu banze kujya mu ishuri.”

Ni ibirarane by’amafaranga agera kuri miliyoni eshatu n’ibihumbi 475 y’abakozi bavuga ko batangiye akazi mu Ukwakira 2017 mu gihe ikigo ubu gifite abanyeshuri 45 gusa mu mashami ane abarizwa muri GS APERWA; abanyamuryango b’ikigo biyemeje gutanga imisanzu izafasha mu mirimo y’ikigo mu ntangiriro mu gihe abanyeshuri bakiri bake.

Mbiteziyaremye yongeyeho ko kuba ikigo kiri mu bibazo atari uko amafaranga yabuze ahubwo ayo abanyeshuri bishyuye agera kuri miliyoni ebyiri n’ibihumbi 500 akoreshwa nabi.

Yavuze ko Komite y’Ababyeyi imaze gutsinda mu rukiko abari barihaye ikigo kuva mu 1995 kugeza mu 2017 yamwitabaje nk’umuntu ufite uburambe bw’imyaka 19 mu burezi kugira ngo abafashe gutangiza ikigo cya GS APERWA maze gitangira gifite urwandiko cyahawe n’Akarere ka Gasabo ariko kigitegereje uruhushya rwo gukora rutangwa n’Ikigo gishinzwe Imyuga n’Ubumenyingiro (WDA).

Mbiteziyaremye avuga ko yasabye kenshi abayobozi ba komite y’ababyeyi ko barekura amafaranga agakoreshwa mu bikorwa by’ikigo ariko abanyeshuri bakaba basoje igihembwe cya mbere bataragurirwa imyambaro y’ishuri kandi barayishyuye mu gihe Uturutsemwabo ari we ugura buri kintu cyose mu kigo harimo n’ibiribwa.

Uturutsemwabo wabanje kwanga kugira icyo atangariza IGIHE avuga ko igihe gihenze kandi ari amafaranga kuri we, yaje kwisubiraho avuga ko amasezerano y’umwenda bamaze kuyasesa kandi ko uwandikiye inzego zinyuranye yashatse kubaharabika ndetse ko Umuyobozi w’Ikigo yaba yarahawe utuntu (ruswa) n’abari barigaruriye ikigo mu myaka 22 ishize bakaba baratsinzwe bityo akaba arimo kubafasha guharabika ikigo.

Yavuze ko bahaye akazi Mbiteziyaremye bazi ko azabagirira akamaro ariko baje gusanga ari umuntu udashobotse kandi umaze gusenya ibindi bigo by’amashuri yisumbuye bitatu.

Abajijwe niba koko yahaye umuzamu amategeko yo gusaka abakozi bose b’ikigo igihe batashye, Uturutsemwabo yagize ati “Eeeh ubwo witonde noneho uzabare inkuru umaze kumenya amaherezo yazo.”

Yongeyeho ko Mbiteziyaremye yashyize mu kazi abakozi barenze abakenewe kandi akabagenera imishahara uko yishakiye.

Uturutsemwabo yavuze ko abanyeshuri bakoze ibizamini byose kandi ko atumva ukuntu abakozi bo mu buyobozi bw’ikigo basaba imishahara yo guhera mu Ukwakira 2017 kandi ishuri ryaratangiye muri Mutarama 2018.

Yagize ati “Nonese ko bitwa ‘aba-staff’, ibihuru byarimo, umwanda wari urimo ni bo babikuyemo? Bari abafundi kandi bakaba ‘aba-staff’? Bari abanyesuku se? Mu Ukwakira bakoraga iki ko umwana wa mbere bamwanditse muri Mutarama? Ubwo urumva abo bantu atari ibisambo?”

Ibi bibazo byamenyeshejwe ubuyobozi bw’Umurenge wa Rusororo, Akarere ka Gasabo n’inzego z’igihugu zishinzwe uburezi.

Umugenzuzi Mukuru w’Amashuri mu Kigo cy’Igihugu gishinzwe Uburezi (REB), Kageruka Benjamin yavuze ko bamaze kumenya ibibazo biri muri GS APERWA kandi ko batangiye kwigisha mu buryo butemewe kuko badafite ibyangombwa, maze atubwira ko WDA ari yo yagira byinshi isobanura kuri iki kigo.

Turacyagerageza kuvugana na WDA kuri iki kibazo.

Urwunge rw’Amashuri APERWA ruherereye i Kabuga mu Karere ka Gasabo
Iri shuri rivugwamo ibibazo by'imicungire mibi y'umutungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza