Impanuka z’ubwato zahitanye abantu benshi mu myaka 10 ishize

Yanditswe na Mukaneza M.Ange
Kuya 24 Nzeri 2018 saa 09:33
Yasuwe :
0 0

Kuri iki Cyumweru nibwo muri Tanzania batangiye gushyingura abantu basaga 200, bahitanywe n’impanuka y’ubwato yabereye mu kiyaga cya Victoria.

Ubu bwato buzwi nka MV Nyerere, bwarohamye ku wa Kane buri mu rugendo ruhuza ibirwa bya Ukara na Bugolora.

Amakuru aturuka muri Tanzania avuga ko kugeza ubu hamaze kuboneka imirambo y’abantu 224, bashobora kwiyongera kuko bivugwa ko ubu bwato bwari butwaye abagera kuri 500.

Nyuma y’iyi mpanuka Ibiro Ntaramakuru by’Abafaransa, AFP byagerageje gukora urutonde rwa zimwe mu mpanuka z’ubwato zikomeye zabayeho mu myaka 10 ishize, zigahitana abantu benshi.

The MV Princess of the Stars

Ku mwanya wa mbere haza ubwato The MV Princess of the Stars bwarohamye mu kirwa cya Sibuyan muri Philippines ku wa 21 Kamena 2008, mu bantu 805 barimo harokotse 57 gusa.

Muri Philippines kandi habarurwa abantu 120 bikekwako bapfuye kuko batigeze baboneka nyuma y’uko hagati ya tariki 16-17 Kanama 2013, ubwato St Thomas Aquinas bwari butwaye abantu 830 bugonganye n’ubwari butwaye imizigo mu gace ka Cebu.

The Sewol

Ku itariki ya 16 Mata 2014, ubwato The Sewol bwerekezaga ku kirwa gikunze gufatirwaho ibiruhuko muri Koreya y’Epfo bwararohamye buhitana abantu 304 biganjemo abanyeshuri.

Mu Ugushyingo 2014 uwari ukuriye itsinda ryari ritwaye ubu bwato yakatiwe gufungwa imyaka 36, nyuma y’uko rishinjwe uburangare no gusiga abagenzi bari baburimo aho kubatabara.

Teratai Prima

Indi mpanuka yahitanye abantu benshi n’iyabaye ku wa 11 Mutarama 2009, ubwo ubwato bwa Teratai Prima bwarohamaga mu gace kari hagati y’ibirwa bya Sulawesi na Borneo muri Indonesia.

Habarurwa abagera kuri 235 bahaburiye ubuzima, mu gihe 35 gusa aribo babashije kurokoka.

U Buhinde

Mu Buhinde naho habarurwa abantu 203 bapfuye cyangwa baburiwe irengero, nyuma y’uko ku wa 30 Mata 2012 ubwato bwari butwaye abantu basaga 300 burohamye mu mugezi wa Brahmaputra muri leta ya Assam.

Spicy Islander

Impanuka yo ku wa Kane w’icyumweru gishize siyo gusa ishegeshe Tanzania kuko hari n’izindi zagiye zibera muri Zanzibar zigahitana abatari bake.

Muri zo hari iyabaye ku wa 10 Nzeri 2011 yahitanye abagera kuri 203 abandi 600 bakabasha kurokoka, ubwo ubwato bwa Spicy Islander bwarohamaga hagati y’ibirwa bibiri byo muri Zanzibar.

Ku wa 18 Nyakanga 2012 kandi abantu 145 barapfuye, nyuma y’uko ubundi ubwato burohamye muri Zanzibar.

Sudan y’Epfo

Ku itariki 14 Mutarama 2014, abasivili 200 baguye mu mpanuka y’ubwato yabereye mu mugezi wa White Nile, ubwo bagerageza guhunga imirwano yaberaga mu mujyi wa Malakal hagati y’ingabo za leta ya Sudani y’Epfo n’inyeshyamba.

Shariatpur 1

Indi mpanuka yabaye muri iyi myaka 10 ishize igahitana abantu benshi n’iy’ubwato Shariatpur 1 yaguyemo abagera ku 123.

Iyi mpanuka yabereye mu mugezi wa Meghna muri Bangladesh ku wa 13 Werurwe 2012.

The MV Rabaul Queen

Ku itariki ya 2 Gashyantare 2012, abantu bagera ku 120 barapfuye abandi baburirwa irengero, nyuma y’uko ikirere kitari cyifashe neza gitumye ubwato twa MV Rabaul Queen burohama muri Papua New Guinea.

Mu mpanuka z’ubwato zabayeho ku Isi, iyahitanye abantu benshi n’iyabereye mu gace ka Tablas Strait muri Philippines ku wa 20 Ukuboza 1987, yaguyemo abagera ku 1 565.

Iyi mpanuka yabaye ubwo ubwato bwa The MV Doña Paz bwagonganaga na MT Vector yari itwaye utugunguru dusaga ibihumbi 8000 bwa peteroli.
Hari abavuga ko abapfuye bashobora kuba bagera ku 4000 kuko The MV Doña Paz yari itwaye abantu benshi, kandi muri bo hari abari bagiyemo batabanje kubarurwa.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza