00:00:00 IGIHE NETWORK KN KINYARWANDA EN ENGLISH FR FRANCAIS

Imibereho y’ingamiya zimaze imyaka 25 mu Rwanda (Amafoto)

Yanditswe na Prudence Kwizera
Kuya 26 Gicurasi 2021 saa 07:17
Yasuwe :
0 0

Bimenyerewe ko Ingamiya ziba mu Butayu, ariko hashize imyaka igera kuri 25 mu Karere ka Huye mu mbago z’Ikigo cy’Igihugu gishinzwe iterambere ry’Ubuhinzi n’Ubworozi (RAB) ahazwi nko muri ISAR Songa haba ingamiya zigera ku munani kandi ubuzima bwazo bumeze neza.

Ubwo Umunyamakuru wa IGIHE yageraga muri ISAR Songa mu Murenge wa Kinazi ahasanzwe hakorerwa ubworozi bw’amatungo by’umwihariko inka z’icyororo, yahabonye Ingamiya agira amatsiko yo kumenya uko zahageze n’imibereho yazo.

Dr Uwumukiza Dianne uhagarariye Sitasiyo ya RAB ishami rya Songa, yavuze ko zahageze mu 1996 zivuye mu gihugu cya Libya cyazihaye u Rwanda zitangira kuhaba zityo. Zageze mu Rwanda zikiri nto ariko kuri ubu zamaze gukura kandi zimwe zarabyaye.

Yasobanuye ko ingamiya ari amatungo atungwa no kurisha ubwatsi agakunda no kunywa amazi.

Ati “Uko zibayeho, ubusanzwe zirarisha cyane cyane zikunze kurya amababi y’ibiti hejuru kubera ko ari ndende ariko zirya n’amatovu. Zikunze no kunywa amazi.”

Yakomeje avuga ko inshuro imwe ingamiya ishobora kunywa amazi menshi ikayabika mu gice cy’umugongo wayo gitumbye ku buryo ishobora kuyamaranamo ukwezi ayitunze.

Ati “Zinywa n’amazi kandi iyo ziyanyoye ziyamarana igihe, zishobora no kumara ukwezi zibitse amazi muri uriya mugongo wazo, zibikira amazi zo ubwazo azitunga.”

Dr Uwumukiza avuga ko ingamiya ari amatungo yororoka kandi iyo imbyeyi yimye ibyara hashize umwaka wose.

Yavuze ko kuri ubu muri Isar Songa bazifte ari ingamiya umunani zigizwe n’inyagazi enye, impfizi imwe nkuru n’udupfizi duto dutatu. Indi mpfizi nkuru yagize impanuka irapfa mu minsi yashize.

Asobanura ko kugeza ubu ziba aho gusa kuko batazibyaza umusaruro ngo bazitoze guheka abantu cyangwa kugira ikindi zikora nko kwikorera imizigo. Zifite abashumba bazitaho bakaziragira, bakazicyura zikarara mu biraro byazo.

Ati “Turazoza nk’uko buri cyumweru twoza amatungo tuyarinda indwara z’uburondwe, nazo ziroga kabiri mu cyumweru. Nazo ni amatungo dutera imiti yica uburondwe n’utundi dukoko twose.”

Dr Uwumukiza avuga ko ubusanzwe ingamiya zigira amata avura indwara zitandukanye. Gusa ngo izo boroye muri RAB ntabwo bajya bazikama.

Ati “Ingamiye uko tubisoma batubwira ko amata yayo ari meza cyane, ikamwa amata afashe ku buryo kuyanywa babanza bakayafungura. Ubundi bavuga ko litiro imwe y’amata yayo avangwa na litiro eshanu z’amazi kugira ngo anyobwe.”

Yavuze ko byagaragaye ko muri Isar Songa ari ahantu heza haba ingamiya n’ubwo ubusanzwe zikunze kwibera mu bihugu bifite ubutayu nka Misiri na Libya.

Ati “Hano zimaze kuhamenyera kuko zahageze mbere turazakira zimenyera ubuzima bwa hano. Hano urabona ko hadakonje cyane cyangwa ngo hashyuhe cyane, hari mu rugero.”

Abajijwe niba bajya baganira n’izindi nzego za Leta ku kuba babyaza umusaruro izo Ngamiye, yavuze ko batarabivuganaho ariko wenda igitekerezo kizaza kuko zikomeje kororoka neza.

Ingamiya ni amatungo atungwa no kurisha ubwatsi agakunda no kunywa amazi, izi zimaze imyaka 25 zigeze mu Rwanda
Dr Uwumukiza yavuze ko ingamiya ari amatungo yororoka kandi iyo imbyeyi yimye ibyara hashize umwaka wose
Ingamiya ishobora kunywa amazi menshi ikayabika mu gice cy'umugongo wayo gitumbye ku_buryo ishobora kuyamaranamo ukwezi ayitunze
Ingamiye izwiho kugira amata meza avura indwara zitandukanye
Mu byo abashumba bazo bashinzwe harimo no kuzoza kugira ngo zihorane isuku
Nta mahane zigira kuko iyo abantu bazegereye bashobora no kuzikoraho
Zifite abashumba bazitaho bakaziragira ndetse bakanazicyura mu biraro byazo
Zikunze kugendera hamwe ari itsinda
Zimaze kumenyera ku buryo zijya n'aho abantu bari ntacyo zikanga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .