Igishushanyo cya Loti n’abakobwa be cyibwe n’Aba-Nazi cyabonetse

Yanditswe na Dufitumukiza Salathiel
Kuya 2 Mata 2021 saa 04:32
Yasuwe :
0 0

Igishushanyo cyasahuwe n’Ingabo z’Aba-Nazi ubwo zigaruriraga Umujyi wa Poitiers uri mu Burengerazuba bw’u Bufaransa mu ntambara ya kabiri y’Isi, cyasubijweyo nyuma yo kuzenguruka mu Burayi gica mu maboko y’abacuruzi batandukanye.

7sur7 yatangaje ko icyo gishushanyo cyitwa “Loti n’abakobwa be babiri bamuha icyo kunywa” cyakozwe na Nicolas Poussin ufatwa nk’umwe mu Bafaransa b’abahanga bo ha mbere bari bazi gushushanya. Mu kinyejana cya 17 ni bwo yagikoze yifashishije amavuta.

Cyashyizwe mu nzu ibishushanyo bibikwamo mu buryo bwemewe n’amategeko i Poitiers, maze mu 1944 abasirikare ba Hitler bahageze baracyiba. Nyuma y’imyaka ibiri cyatangiye gushakishwa, bigeze mu 1947 gishyirwa ku rutonde rw’imitungo yibwe muri icyo gihugu mu ntambara y’Isi ya Kabiri.

Amakuru avuga ko mu 2017 cyagiye gihererekanywa mu bacuruzi b’Abataliyani bagura ibihangano by’ubugeni bimaze imyaka myinshi; mu 2019 cyerekanwa mu iserukiramuco ryabereye mu Buholandi ari naho umwe mu Badage bakizi yakibonye aracyibuka, ubwo urubanza rwacyo ruratangira.

Mu 2020 ni bwo iperereza ryo gushakisha aho icyo gishushanyo cyaba kiri ryubuwe, kubera ikirego cyari cyatanzwe n’Umusuwisikazi w’imyaka 98 n’Umunyamerika w’imyaka 65 “bazakizungura”.

Hahise hashyirwaho itsinda ryo mu mutwe w’abasirikare batorejwe kurinda ibirango by’umuco rigomba gushaka icyo gishushanyo mu Butaliyani, kiza kuboneka mu Majyaruguru y’icyo gihugu.

Mu itangazo Polisi y’u Butaliyani yageneye abanyamakuru ku wa 1 Mata 2021, yavuze ko icyo gishushanyo cyagarujwe kikanasubizwa ba nyiracyo, ariko ntiyatangaza igihe n’aho byabereye.

Hagaragazwa ko mu ntambara ya kabiri y’Isi, Aba-Nazi bibye cyangwa bagurana ibishushanyo bigera ku bihumbi 600 mu Burayi, byiganjemo iby’Abayahudi. Hitler wari ukuriye izo ngabo ngo yari agamije kugira inzu ndangamurage yuzuye ibishushanyo n’ibihangano by’ubugeni bihenze.

Mu 1998 ibihugu 44 byahuriye i Washington D.C bigamije kwigira hamwe uko ibyo bishushanyo byasubizwa aho byibwe, ariko kugeza mu 2019 hari hakibarurwa ibirenga ibihumbi 100 bitaramenyekana aho biherereye.

Umupolisi w'Umutaliyani ibumoso n'igishushanyo cyari cyaribwe iburyo / Ifoto: Artnews

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .