Kwamamaza

Icyihishe inyuma yo kuba abakobwa benshi basigaye bashyingirwa batwite

Yanditswe kuya 6-09-2016 saa 10:33' na Marie Ange Mukaneza


Kuri ubu ntibigitungurana ko hari abashyingirwa nyuma y’ukwezi kumwe cyangwa abiri ukumva inkuru nziza ngo abageni bibarutse maze abategura ibihembo bakaba ari bo basigarana umukoro.

Ni mu gihe hambere ubukwe bwatahaga abageni bakamara amezi icyenda bategereje kwibaruka imfura yabo, ubyaye mbere yayo bakamufatank’uwakoze amahano cyangwa wataye umuco.

Hari n’abatebya bakavuga ko gutwita bisigaye ari kimwe mu birongoranwa umukobwa aba atagomba kwibagirwa gutahana mu rugo rushya aba agiyemo.

Ese ni izihe mpamvu zituma abakobwa benshi bashyingirwa batwite?

Iyo bigeze ku mpamvu zitera abakobwa gushyingirwa batwite, abantu benshi ntibabivugaho rumwe dore ko nubwo hari ababifata nk’amahano hari n’abandi bumva ko ari ibintu bisanzwe bitagize icyo bitwaye.

Bamwe mu bakobwa n’abagore baganiriye na IGIHE bagiye bagaragaza impamvu zitandukanye zirimo kuba abasore b’ubu batinya gufata icyemezo cyo gushinga urugo, gukurikira ubutunzi ndetse no kuba ubusambanyi bumaze gufata indi ntera.

Umwe muri bo yagize ati” Ahanini abasore b’ubu gufata icyemezo cyo gushaka ntibibarimo, keretse iyo abonye umukobwa atwite akamutwara wenda kugira ngo atamukoza isoni. Ikindi abakobwa b’ubu iyo abonye umusore uwo ari we wese afite ku butunzi ho gake, n’iyo abona ko nta rukundo ruhari ashakisha uburyo bwose amwifunga akiteza inda.”

Undi na we yagize ati” Njyewe mbona urukundo rwarabaye ruke, ni gake cyane umuhungu agukunda mukamara imyaka nk’itanu mukabona kubana. Urukundo rw’ubu rwabaye gukora imibonano mpuzabitsina wagira ngo ni byo byemeza ko umuntu mukundana.”

Undi mugore umaze imyaka irenga itanu ashinze urugo we yagaragaje ko kuba umubare w’abahungu ari muto kuruta abakobwa bituma bemera kuryamana na bo batinya kubengwa bakazahera ku ishyiga.

Abasore n’abagabo baganiriye na IGIHE na bo ntibanyuranyije cyane n’ibyavuzwe n’abakobwa, aho bashimangiye ko gushyingirwa umukobwa ari hafi kubyara bituruka ku kuba igitekerezo cyo gushaka kiba kitarabazamo neza kandi abakunzi babo bo baba babyifuza.

Umwe utarifuje ko amazina ye atangazwa yagize ati” Usanga akenshi umukobwa ashaka gushyingirwa kandi akabona umusore nta gahunda afite yo kuba yakora ubukwe, akigira inama yo kuba babikora agatwita kugira ngo umuhungu afate umwanzuro. N’iyo nta gahunda waba ufite iyo uteye inda umukobwa ukunda, wemera byose ukamushyira mu rugo.”

Nubwo benshi muri aba basore twaganiriye bahuriza ku kintu cy’uko abakobwa bemera gutwara inda ari nk’umutego babateze, hari na bagenzi babo babikora kugira ngo bamenye neza ko igihe bazaba bamaze kubana bazabasha kubona urubyaro.

Ese nta ngaruka bigira mu mibanire y’abashakanye?

Nubwo bigoye guhita wemeza ko gatanya ziterwa no kuba abantu barafashe umwanzuro wo kurushinga biturutse ku kuba umukobwa yari atwite, na none ntiwahakana ko ari imwe mu mpamvu ibitera nk’uko byemezwa n’umwe mu bo twaganiriye.

Ati” Kuko akenshi ubukwe buba buvuye ku bushake bw’uruhande rumwe, usanga mu rugo hahora amakimbirane.”

Undi mugore watandukanye n’uwo bashakanye nyuma y’uko bari barabanye atwite, na we yashimangiye ko iriya ari yo mpamvu yatumye bashwana kuko ikibazo cyose cyavukaga umugabo yahitaga atangira kumucyururira amubwira ko n’ubundi yamushatse atarabiteganyaga kandi ko nta kimwizeza ko umwana ari uwe.

Hari n’abandi basanga ariko gatanya zituruka ku kuba mbere yo gushyingiranwa abantu baba batarafashe umwanya uhagije ngo bamenyane ku buryo bafata umwanzuro wo kubana bamaze kwiyemeza kuzihanganirana kuko nta zibana zidakomanya amahembe nk’uko umugani wa Kinyarwanda ubivuga.

Hamwe mu ho twabashije kubona imibare y’ibirego bisaba gatanya byakiriwe, ni mu rukiko rw’ibanze rwa Kacyiru aho igaragaza ko amadosiye 191 yakiriwe mu 2015 asaba ubutane, na ho amadosiye 69 asaba gatanya yari amaze kwakirwa mu gihembwe cya Mbere cya 2016, ni ukuvuga kuva muri Mutarama kugera muri Werurwe.

Abakobwa benshi basigaye babyara mbere y'amezi icyenda bashatse abagabo

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved