00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri ‘Sacred Ibis’, inyoni yashyirwaga mu misezero y’Abafarawo mu Misiri

Yanditswe na Nzabonimpa Jean Baptiste
Kuya 8 Kamena 2021 saa 07:41
Yasuwe :
0 0

Mu bihe byo hambere abantu bakigira ibyo batinya cyangwa bubaha bagiraga ibisiga n’inyoni baha agaciro ku buryo kubyica byabaga ari ikizira. Muri ibyo bihe mu Rwanda hari ubwoko bw’Abanyiginya bubahaga umusambi, na ho Abagesera bubahaga inyamanza. Ibyo kuba hari ibisiga cyangwa inyoni byahabwaga agaciro gakomeye ntabwo byari iby’i Rwanda gusa ahubwo n’ahandi henshi muri Afurika byarakorwaga.

Mu gihugu cya Misiri mu bihe bya kera bubahaga cyane inyoni yitwa ‘Sacred Ibis’. Ntabwo ari ukuyubaha gusa kuko baranayisengaga nk’imana yabo yitwaga Thoh.

Iyo mana yari ishinzwe gufasha igihugu binyuze mu kukirinda ibyago n’inzoka. Uburyo bayihaga agaciro birenze ibyo kuko byarakomezaga ku buryo iyo habaga hari umwami watanze bafataga iyi nyoni bakayitunganya neza maze igihe babaga bagiye gutabariza abami babo bitwaga ba Farawo na yo bayishyiraga mu musezero w’umwami.

Izi nyoni ziboneka hehe?

Sacred Ibis ziboneka cyane ku bwinshi muri Afurika yo Munsi y’Ubutayu bwa Sahara no muri Madagascar. Ntabwo ari aho gusa kuko no muri Iraq, Iran na Yemen zijya zihagaragara. Izi nyoni zikunda kwibera hafi y’amazi, ibishanga, mu mirima y’ubuhinzi, mu mashyamba mu birwa n’ahandi hatandukanye.

Muri Kigali ziraboneka cyane by’umwihariko ahantu hari amazi nko mu Gatsata ahahingwa umuceri. Muri iyi minsi hari igiti zihora zuzuyemo kuko zifitemo ibyana. Icyo giti kiri ku nzira haruguru y’inyubako zahoze ari iz’uruganda rwa Rwantexo. I Masaka ku ruganda rw’Inyange zirahaboneka n’ahandi.

Imiterere ya Sacred Ibis

Sacred Ibis igice kinini ku mubiri wayo ni umweru ariko ikagira umutwe n’igikanu byirabura. Ku murizo wayo hagaragaraho ibara ry’umukara kandi umunwa wayo ni muremure ndetse urahese. Iyo irimo kuguruka umuntu abasha kubona amababa y’umukara ku mpera z’amababa igurukisha.

Amano yayo arafatanye ariko by’igice. Ntabwo ameze nk’ay’imbata ahubwo yo afatanye igice gito. Uburebure bwa Sacred Ibis ni santimetero 75. Uburemere bwayo ni garama 1350. Ku bijyanye no kurama ishobora kumara imyaka 20.

Ibitunga Sacred Ibis

Izi nyoni zikunda gushaka ibyo kurya ziri hamwe ari nyinshi cyane. Ibyo kurya byazo ni udusimba duto, iminyorogoto, ibinyamunjonjorerwa n’ibindi bisimba by’ibiburangoro. Ntabwo ari byo gusa kuko na none zirya amafi, imitubu, ibikururanda, ibihore, imiserebanya, amagi y’ingona n’inyamabere ntoya ndetse zishobora no kurya ibisigazwa byavuye ku bisimba. Zikoresheje umunwa wazo muremure zishobora kuwinjiza mu byondo kugira ngo zikururemo iminyorogoto.

Imyororokere ya Sacred Ibis

Izi nyoni zororoka inshuro imwe mu mwaka. Iyo igihe cyo kororoka kigeze ziragenda zikarika mu giti kimwe ari nyinshi cyane. Ahantu zigiye kwarika habaye hari umwanya uhagije ushobora gusanga zisaga 1000 ziri mu gace kamwe. Ikindi zikunda kwarika hamwe n’ibindi bisiga bikunda gushakira ibyo kurya mu mazi nk’ibiyongoyongo, ‘African darter,’ ‘African spoonbill’ na ‘cormorants.’

Ingore itera amagi ari hagati ya rimwe n’atanu. Ingabo n’ingore zose zifatanya kuyararira mu gihe kingana n’iminsi 21-29. Iyo imishwi imaze guturagwa ingabo cyangwa ingore igumana n’imishwi mu cyari nibura icyumweru. Iyo imishwi imaze iminsi 35-40 iba imaze kumera neza amababa ariko kugira ngo ibe ikuze neza ku buryo yakwigendera bisaba iminsi 44-48. Ku myaka ine cyangwa itanu iyi nyoni iba ikuze ku buryo ishobora kororoka.

Muri iki gihe izi nyoni zimerewe bite?

Uretse mu gihugu cya Misiri izi nyoni zirimo gucika, muri rusange habarurwa nibura izigera ku bihumbi 10 ku isi. Ibyo bituma zifatwa nk’aho zihagije. Kimwe n’ibindi bisiga n’inyoni by’amoko atandukanye kwangirika kw’ibidukikije n’ibikorwa bitandukanye bya muntu biri mu bigira ingaruka nyinshi ku mibereho y’ibi biguruka.

Sacred Ibis ni inyoni iboneka no mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .