Ibyiza byo kugenda n’amaguru ku buzima bwa muntu

Yanditswe na Dufitumukiza Salathiel
Kuya 17 Mutarama 2021 saa 04:52
Yasuwe :
0 0

Abantu benshi iyo babonye ugenda n’amaguru intera ndende atari muri siporo babifata nk’ubukene, uwabikora agaragara nk’ufite amikoro we agafatwa nk’udasirimutse. Muri make bumva ko abakora ingendo zifashisha ibinyabiziga ari bo basirimu, ariko ubushakashatsi bwerekana ko kugenda n’amaguru bigirira umubiri akamaro harimo kugabanya ibyago byo gupfa muri rusange.

Hari abakora urugendo rurerure n’amaguru ku bushake, hakaba n’abarukora nta yandi mahitamo bafite. Gusa Healthline igaragaza ko iyo umuntu afashe umwanya akagenda n’amaguru bigira umumaro ku buzima bwe mu buryo butandukanye.

Umumaro wa mbere kugenda n’amaguru bigira ku buzima bw’umuntu, ni uko bifasha umubiri kubyaza ingufu ibyo wariye, bikagufasha kugira umubyibuho uri mu rugero cyangwa kuwugabanya igihe ukabije.

Bisobanurwa uko kubyaza ingufu ibyo wariye bigenda neza bitewe n’ibintu byinshi birimo umuvuduko wagendeyeho, intera wagiye(uburebure), imiterere y’aho wagiye(ahazamuka cyangwa ahashashe), ndetse n’ingano y’umubiri wawe.

Uwagiye ahantu hazamuka n’uwagiye ku muvuduko wihuta, umubiri we ubyaza ingufu ibyo arya kurusha uwagiye ahashashe n’uwagiye buhoro.

Icya kabiri kugenda birinda indwara z’umutima. Ubushakashatsi bwerekana ko kugenda nibura iminota 30 n’amaguru ku munsi, ukabikora iminsi itanu mu cyumweru bigabanya ibyago byo kurwara umutima ku kigero cya 19%.

Byumvikane ko icyo kigero gishobora no kurenga bitewe n’uko igihe ugenda cyangwa intera ugenda ku munsi byiyongereye.

Nanone kandi hagaragazwa ko urwo rugendo iyo rukozwe nyuma yo gufata ifunguro bifasha umubiri kugabanya isukari yo mu maraso ishobora gutera Diabetes.

Aho bishoboka, abashakashatsi batanga inama ko umuntu yari akwiye gukora urugendo rw’iminota 15 n’amaguru buri uko amaze gufata ifunguro: mu gitondo, saa sita na nimugoroba, ngo kuko byafasha mu icyo gikorwa kurusha uko wagenda iminota 45 icyarimwe ku munsi.

Kugenda intera ndende n’amaguru binavugwaho gukomeza amahuriro y’amagufa nko mu mavi no mu rukenyerero, kubera ko bituma imikaya ishyigikiye izo ngingo yoroha ndetse ikagira ingufu.

Kugenda intera iri hagati ya kilometero umunani n’icyenda byo bikurinda indwara zifata mu ihuriro ry’amagufa (arthritis), bikanagabanyiriza uburibwe usanzwe ayirwaye.

Ubushakashatsi kandi bwerekana ko kugenda n’amaguru byongerera umubiri ubudahangarwa, bikagabanya ibyago byo kugira ubukonje cyangwa kurwara ibicurane.

Ibyo byagaragajwe n’inyigo yakozwe na British Journal of Sports Medecine ku bantu igihumbi mu bihe by’ubukonje, aho byagaragaye ko abantu bagenda n’amaguru hagati y’iminota 30 na 45 ku munsi bari bafite amahirwe angana na 40% yo kurwara igihe gito ndetse no kutagira ibibazo mu myanya y’ubuhumekero ya ruguru; n’igihe barwaye bakagaragaza ibimenyetso bidakanganye.

Undi mumaro umubiri ukura mu rugendo rw’amaguru ni ukugira imbaraga. Ubushakashatsi bwerekana ko kugenda intera ndende n’amaguru byongera uburyo Oxygène itembera mu mubiri, bikaba byawongerera imbaraga, ndetse bikongera ubushobozi bw’imisemburo igira uruhare mu kugena ingano y’imbaraga mu mubiri.

Ku bakunda kugira umunaniro, agahinda gakabije no kumva batameze neza, bagirwa inama ko kugenda n’amaguru igihe kinini bizabafasha guhindura iyo mitekerereze n’ubuzima bwo mu mutwe. Bizatuma kandi barushaho kwigirira icyizere, binabarinde kwiheza mu bandi.

Mu gihe hari ababona ugenda n’amaguru bakakubwira ko bizatuma asaza vuba ngo kuko yinaniza, ubushakashatsi bwerekana ko kugenda n’amaguru ku muvuduko uringaniye bigabanya ibyago byo gupfa muri rusange ku kigero cya 20%.

Byagaragajwe na BMJ mu nyigo yari igamije gusuzuma ihuriro riri hagati yo kugenda wihuta n’impamvu zitera impfu muri rusange nk’uburwayi bw’umutima na kanseri; aho hanagaragajwe ko umuntu ugenda nibura kilometero esheshatu mu isaha bimugabanyiriza ibyago byo gupfa muri rusange ku kigero cya 24%.

Uretse ibyo, kugenda n’amaguru binakomeza imikaya yo mu maguru akarushaho gukomera. Kugira ngo amaguru arusheho gukomera ariko ngo bisaba kugenda ahazamuka, cyangwa mu nzira zikomeye. Icyakora herekanwa ko no kunyonga igare, kugenda makeri, ndetse no kwiruka bisanzwe bishobora gukomeza imikaya yo mu maguru.

Icya cumi kigaragazwa, ni uko kugenda n’amaguru bishobora kuruhura ubwonko bigatuma ubasha gutekereza mu buryo bwiza kurushaho.

PsycNet mu 2014 yerekanye ubushakashatsi bwakorewe ku bantu bane hagenzurwa uko umuntu agira ibitekerezo bishya yicaye cyangwa agenda, by’umwihariko agenda mu nzira. Hanzuwe ko iyo umuntu arimo kugenda n’amaguru byumwihariko mu nzira, ari bwo agira ibitekerezo bishya cyane ndetse bikaba byanamworohera gupanga icyo gukora.

Siporo ikozwe umuntu agenda n'amaguru igira akamaro ku buzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .