00:00:00 IGIHE NETWORK KN KINYARWANDA EN ENGLISH FR FRANCAIS

Ibitangaje kuri ba Kamoso bagorwa no kuba mu Isi yihariwe n’abakoresha ukuboko kw’indyo

Yanditswe na Ndahayo Emmanuel
Kuya 13 Kanama 2021 saa 10:41
Yasuwe :
0 0

Buri tariki 13 Kanama buri mwaka, abarimo Barack Obama, Papa Francis, Umwamikazi w’u Bwongereza, Elizabeth II, Bill Gates, Oprah Winfrey, Lionel Messi, Lebron James, njye wanditse iyi nkuru n’abandi barenga 10% by’abatuye Isi, bizihiza Umunsi Mpuzamahanga wahariwe abantu bakoresha ukuboko cyangwa ukuguru kw’ibumoso.

Igitekerezo cyo kwizihiza Umunsi w’Abakoresha ukuboko kw’ibusomo cyatangiye gututumba mu 1976, bigizwemo uruhare na Dean R Campbell washinze Umuryango wita ku nyungu z’abantu bakoresha imoso witwa ’Lefthanders International Inc.’ ugamije gushishikariza abatuye Isi kubaha no kwemera kubana n’abakoresha imoso.

Icyakora mu 1992, uyu munsi watangiye kwizihizwa bihoraho, nyuma y’ivuka ry’itsinda ry’abantu bakoresha imoso, bavuze bifuza ko uwo “Munsi wizihizwa buri mwaka ku Isi hose mu rwego rwo kwizihiza umwihariko w’abantu bakoresha imoso, no kumenyekanisha ibyiza n’ingorane abakoresha imoso bahura nazo mu buzima bwa buri munsi.”

Kimwe mu bintu bikomeye iri tsinda ryagezeho, ni ugusaba inganda n’ibindi bigo bikora ibikoresho bitandukanye, kudakora gusa ibikoresho bigenewe abantu bakoresha ukuboko kw’indyo ahubwo hagakorwa n’ibikoresho byakorohereza abakoresha ukuboko kw’ibumoso.

Kuri ubu, inganda zisigaye zarahagurukiye gukora ibikoresho birimo nka guitar zifashishwa n’abakoresha ukuboko kw’ibumoso, ibintu bitahozeho, icyakora hari ibindi bikoresho birimo nka camera, umukasi, ‘mouse’ za mudasobwa, ibikoresho byifashishwa mu gukina imikino yo kuri mudasobwa (playstation) n’ibindi bitandukanye, usanga bigenewe abakoresha ukuboko kw’indyo gusa, ndetse n’ibigenewe kwifashishwa n’abakoresha ukuboko kw’ibumoso ugasanga birahenze cyane.

Gukoresha imoso byahoze ari ikizira

Hirya no hino ku Isi, mu miryango itandukanye y’abantu, irimo n’Umuryango Nyarwanda, gukoresha ukuboko kw’ibumoso byafatwaga nko gusuzugura. Benshi mu bakoresha imoso barakubiswe, abandi bakorerwa ihohotera rigamije kubabuza gukomeza gukoresha ako kaboko.

Nko mu Butaliyani, bishingiye cyane ku icengezamatwara ryatangijwe na Cesare Lambroso, wari umuhanga mu byo kurwanya ibyaha, yakunze kuvuga ko abantu bakoresha imoso biganje mu bakora ibyaha byinshi kandi bikomeye.

Uyu mugabo yavugaga ko ‘umunyabyaha ashobora kugaragarira mu buryo ateye’, ndetse akavuga ko “abanyabyaha bakomeye bakunze kuba bakoresha ukuboko kw’ibumoso.”

Imitekerereze nk’iyi ni yo yatumye abantu bakunda kwishisha umuntu ukoresha imoso, bamwe bakamufata nk’umuntu utameze neza mu mutwe, cyangwa ufite ikindi kibazo cy’ubuzima, ndetse akaba ari yo mpamvu hirya no hino ku Isi, gukoresha imoso byakunze gufatwa nk’ikimenyetso cy’intege nke.

Uku kunena abakoresha imoso kandi binashingira ku myemerere, nk’aho Bibiliya yakunze kugaragaza uruhande rw’iburyo nk’uruhande rwiza, mu gihe uruhande rw’ibumoso, rwagaragajwe nk’uruhande rubi.

Muri Bibiliya, abantu bakoresha akaboko k’ibumoso bagaragazwa inshuro 25, kandi zose zikaba mu buryo butari bwiza, mu gihe abakoresha ukuboko kw’iburyo bagaragazwa inshuro zirenga 100, kandi buri gihe bakagaragazwa neza.

Nta kabuza rero ko ibi byagize uruhare mu gutuma bamwe mu bantu bemera Bibiliya barenga miliyari ebyiri, bagira imyumvire itesha agaciro abakoresha ukuboko kw’ibumoso.

Birumvikana ko iterambere ryahinduye ibintu, kuko abantu bize kubaho badahutaza uburenganzira bwa bagenzi babo badafite ibyo bahuriyeho, ariko imitekerereze yo kwamagana no gutesha agaciro abakoresha ukuboko kw’ibumoso, iracyahari cyane na magingo aya.

Mu mwaka ushize, ubwo byamenyekanaga ko Papa Francis akoresha ukuboko kw’ibumoso, bamwe mu Bakirisitu b’Idini Gatolika biraye mu mihanda bamagana Papa, ndetse bamwe bamusaba kwegura kuko nta muyobozi w’Idini ryabo ugomba gukoresha imoso.

Ibintu byarakomeye kugeza ubwo Papa Francis yiregura nk’aho kuba yaravutse akoresha imoso, akaza kuba Umuyobozi wa Gatolika ari isanganya; ahera aho yibutsa abantu ko ari bwo buryo yavutsemo bityo ko adakwiye kubizizwa.

Yaragize ati “Abantu bavuka gutya nyine [bakoresha imoso], ntabwo mubyumva? Kuki abantu batakwemera ko [kuvuka ukoresha imoso] ari nko kuvuka ukoresha ukundi kuboko?”

Abahanga mu by’ubuzima bavuka ko gukoresha imoso ari ibintu karemano umuntu avukana, uretse ko iyo ababyeyi bombi bakoresha imoso, baba bafite amahirwe angana na 25% yo kuzabyara umwana ukoresha imoso, kurusha ababyeyi bakoresha indyo.

Ku rundi ruhande, abana b’impanga bakunze kuvuka bakoresha imoso, icyakora bijya bibaho ko impanga zishobora gukoresha amaboko atandukanye, ari nayo mpamvu abahanga mu by’ubuzima, bemeza ko nta karemangingo kamwe gatuma umuntu akoresha imoso, ahubwo ari uruhurirane tw’uturemangingo 40 dushobora gutuma umuntu akoresha imoso.

Abagabo bakunze kuba bakoresha imoso ku kigero cya 23% ugereranyije n’abagore. Nubwo abahanga mu by’ubuzima batarasobanukirwa neza impamvu yatuma umuntu akoresha imoso, hari inyigo zitandukanye zerekanye ko bishobora guterwa n’ibibazo by’umunaniro cyangwa agahinda gakabije umubyeyi ashobora kugira mu gihe atwite, cyangwa ari kubyara.

Ni mu gihe kandi ubushakashatsi bwakorewe muri Suède mu 2008, bwerekanye ko abana bavutse bafite ibiro bike cyangwa se bakavuka ku bagore babyaye bakuze, na bo bashobora kuvuga bakoresha imoso. Icyakora ibi byose nta na kimwe cyari cyemezwa ku rwego mpuzamahanga, kuko hari n’abandi bana benshi bavukana ibiro bike, bakavuka ku babyeyi bakuze cyangwa bagize ibibazo by’umunaniro ukabije ndetse n’agahinda, ariko bakavuga bakoresha ukuboko kw’indyo.

Perezida Barack Obama ni umwe mu baperezida batanu muri barindwi baherutse kuyobora Leta Zunze Ubumwe za Amerika, bakoreshaga imoso cyangwa amaboko yombi

Nta tandukaniro ry’abakoresha indyo n’imoso

Kuva mu myaka yo hambere, hari imyumvire n’ubushakashatsi bwakunze kwerekana ko abantu bakoresha imoso barusha imbaraga z’umubiri abakoresha ukuboko kw’indyo, icyakora ibi ntabwo bihuye n’ukuri, kuko nta bimenyetso bifatika byagaragajwe.

Gusa nanone, abantu bakoresha imoso bitwara neza mu mikino ibahuza n’abandi bantu nka tennis, box n’indi. Impamvu yemerwa n’abashakashatsi benshi ni uko abantu bakoresha imoso bakunze kwitozanya n’abantu bakoresha indyo, ku buryo bamenyera guhangana n’abakoresha uko kuboko.

Ku rundi ruhande, abantu bakoresha indyo ntibakunze guhura n’abakoresha imoso cyane, ku buryo mu gihe basakiranye mu mikino, abakoresha imoso bashobora kubarusha kuko bakoresha ukuboko abandi badakunze guhura nako, bityo bagakunda gutungurwa mu gihe cy’ihangana.

Byakunze kuvugwa kandi ko abantu bakoresha imoso bapfa vuba ugereranyije n’abakoresha indyo, icyakora ibi nabyo si ukuri. Gusa ubushakashatsi bwakorewe mu Bwongereza, bwerekanye ko abagore bakoresha imoso, baba bafite ibyago byo kwandura kanseri kurusha abagore bakoresha indyo.

Mu myaka ya za 1970, byakekwaga ko abantu bakoresha imoso bashobora kuba bafite ubuhanga budasanzwe, icyakora ibi ntabwo ari ukuri kuko ubuhanga budashingira ku kuboko k’umuntu, nubwo hari ubushakashatsi bwerekanye ko abantu bakoresha imoso bakunze kugira ubushobozi bwo guhanga udushya, bagakunda ibihangano ndetse ntibakunde kugira inshuti nyinshi.

Abakoresha imoso kandi bakunze gushinjwa gukunda agatama, bakanengwa gutwara gukora imodoka nabi no gukora impanuka nyinshi, gusa ubushakashatsi bwa vuba bwerekanye ko ibi birego nta shingiro bifite.

Icyakora nanone abantu bakoresha imoso bakunze kugaragarwaho no kugira ibibazo byo mu mutwe kurusha abantu bakoresha indyo, ndetse bagakunda kugira ibibazo mu gihe cyo kuryama, birimo no kubura ibitotsi.

Muri rusange, ubushakashatsi bugezweho ntibwemeza ko gukoresha imoso bigira umwihariko biha nyirabyo, yaba mu buryo bwo kugira ubuhanga budasanzwe cyangwa kugira ubushobozi bucye ugereranyije n’abandi.

Gukoresha imoso kandi ntabwo ari ikimenyetso cy’ibibazo by’ubuzima birimo nko kugira ubudahangarwa budahagije, nk’uko bamwe bakunze kubigarukaho.

Bamwe mu bantu bakomeye bakoresha imoso

Abakoresha imoso bagize uruhare rufatika mu iterambere ry’Isi, kuko bagize hafi 40% by’abashakashatsi b’Ikigo cy’Abanyamerika gishinzwe gukora ubushakashatsi NASA ndetse na Neil Armstrong wabaye umuntu wa mbere wakandagiye ku Kwezi, akoresha imoso.

Mu bandi bamenyekanye cyane harimo nka Aristotle, umwe mu bahanga bakomeye babayeho ku Isi, Napoleon Bonaparte wabaye Umwami w’u Bufaransa, akaba n’umwe mu ndwanyi zikomeye zabayeho ku Isi, Leonardo da Vinci wari uzwiho kwandika avana mu ruhande rw’iburyo aganisha ibumoso, aho kuvana ibumoso ajyana iburyo.

Hari kandi Marie Curie n’umugabo we Pierre Curie, bari mu bahanga babayeho muri siyansi, Charlie Chaplin ufatwa nk’umukinyyi w’ibihe byose wa filime zisekeje, zakunzwe kurusha izindi ku Isi. Hari kandi Kimi Hendrix wari uzwiho gucuranga guitar ayicuritse, akaba afatwa nk’umuhanga w’ibihe byose mu gucuranga guitar.

Mu bandi kandi harimo Jack The Ripper, Sir Isaac Newton, Mahatma Gandhi, Mutagatifu Teresa, Albert Einstein, Pablo Picasso,Julius Caesar, Amadeus Mozart (wari umuhanga cyane mu bijyanye n’amanota y’umuziki) Henry Ford na Maradona.

Harimo kandi Narendra Modi, Justin Bieber, Angelina Jolie na Brad Pitt wahoze ari umugabo we, Tom Close, Morgan Freeman, Keanu Reeves, Sylvester Stallone, Celine Dion, Eminem, Lady Gaga, Pele, Mark Zuckerberg, Steve Jobs n’abandi benshi, bagize uruhare mu iterambere ry’Isi kuva yabaho.

Bill Gates, ufite umutungo urenze miliyari 130$, akaba yarashinze ikigo cya Microsoft, akoresha ukuboko kw'ibumoso
Marshall Bruce Mathers uzwi nka Eminem, umwe mu bahanzi bakomeye babayeho mu njyana ya Rap, ndetse akaba n'umwe mu banditsi bakomeye babayeho mu muziki wa Amerika, akoresha imoso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .