Gikondo: Umukobwa yaguye igihumure ubwo yasurirwaga rimwe n’abasore babiri yatendekaga

Yanditswe na Uwishyaka Jean Louis
Kuya 30 Kanama 2016 saa 02:31
Yasuwe : XX
142 71

Daouda Koné umuhanzi wamamaye mu myaka ya 1980 muri Coté d’Ivoire no ku Isi yose ni we waririmbye indirimbo’Mon Coeur Balance ‘aho agaragazamo ko yari yabuze amahitamo hagati y’umukobwa ufite umutima mwiza udafite uburanga ndetse n’undi w’uburanga ariko udafite umutima mwiza.

Abanyarwanda nibo bavuze ko umutego mutindi ushibuka nyirawo akiwureba; umukobwa yananiwe guhitamo hagati y’umusore ufite amafaranga ariko atari mwiza ku isura n’umusore twakwita Rwema ariko w’umukene maze rimwe bahahurira baje kumusura ahita agwa igihumure barorosa.

Ni inkuru imaze ibyumweru bibiri ibaye mu murenge wa Gikondo, mu karere ka Kicukiro, aho umukobwa w’imyaka 26 wiga muri kaminuza imwe yigenga mu mujyi wa Kigali yahuraga n’uruva gusenya agasurirwa rimwe n’abasore babiri yabwiraga ko akunda bikaba byaranamuviriyemo kubengwa n’abo yatendekaga.

Murekatete (amazina yahinduwe) umukobwa wigana n’uwahuye n’icyo kibazo, ni we wasobanuye uko byagenze.

Murekatete yavuze ko uwo mukobwa yatendekaga abasore babiri, umwe ngo yari afite amafaranga n’akazi keza ariko umukobwa akavuga ko ari mubi adashobora kubana na we ndetse ngo n’iyo bagendanaga mu nzira yabaga yumva afite ipfunwe.

Mu by’ukuri ngo uyu mukobwa ntabwo yakundaga uyu musore habe na mba, ahubwo impamvu atamurekaga ngo ni uko yamuhaga ibyo akeneye byose.

Murekatete yagize ati "Uriya muhungu yita ko ari mubi ni we wari udutunze hano,aduha ikintu cyose,akamugurira icyo yifuza ,yaduhaga n’ibirenze ibyo ababyeyi bacu baduha rwose".

Undi musore uyu mukobwa yatendekaga ari na we yakundaga ngo ni mwiza, ni umushomeri. Yarazaga akakirwa akigendera ntagire ikintu na kimwe ahasiga mu gihe undi we yazaga yikoreye impano zitandukanye.

Murekatete ati " Yewe ni mwiza uwo musore nanjye ndabikubwiye. Ariko yamuzizaga ko nta kintu agira ari uwo kwakirwa gusa mu byo uwo wundi aba yaduhaye .Yari yaranze kumureka kuko yari azi ko ari umushomeri wenda azageraho akabona akazi.”

Kera kabaye rero wa musore ufite ikofi iremereye, ngo yaje kugira ubutumwa bw’akazi hanze maze aza gusezera umukobwa yakundaga. Yaraje arakirwa mbese ibintu birashyuha barishimana karahava, gusa ngo ibyo byishimo ntibyaje gukomeza kuko igihe barebanaga akana ko mu jisho wa musore utagira amafaranga ariko akagira uburanga ngo yarinjiye.

Nyamukobwa ngo akibona uyu musore yinjiye ngo yahise agwa igihumure aradandabirana, abira icyunzwe yitura hasi, hanyuma abo basore bararebana bayoberwa ibibaye batangira kumuhungiza ngo agarure ubuyanja.

Uyu mukobwa ngo bashatse kumujyana kwa muganga aranga arabananira gusa ngo nta jambo yavuze kuko yari yabaye nk’ikiragi.

Murekatete ngo yahise atangira guhatwa ibibazo n’abo basore bamubaza impamvu mugenzi we arabiranye ariko ngo na we yabasabye ko bataha ikibazo bakazagisubiramo nyuma yabanje kwita ku murwayi.

Buri wese muri abo basore yashimangiraga ko uwo mukobwa ari inshuti ye.

Umwe muri aba basore wari waje gusezera umukunzi we kuko yari agiye kujya mu butumwa bw’akazi mu mahanga, ngo yasize yanditse urwandiko rurimo amagambo yo kumutuka no kumukomeretsa ndetse avuga ko ibyabo birangiriye aho.

Wa musore Rwema ngo yakomeje kujya asura umurwayi no kumubaza uko yaramutse ariko na we ngo yaje kumusezerera kuko ngo atashobora gukunda umukobwa w’indyadya ubwira abantu bose ko bazabana akaramata.

Kuri ubu ngo uyu mukobwa yabuze intama n’ibyuma kandi ngo yumva nta n’umwe wamubabarira bitewe n’uko abo basore basanze baziranye, baganira kuri gahunda buri wese yari afitanye n’uwo mukobwa barumirwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE