Gatsibo: Gitifu w’Umurenge arara mu ihema kuri buri kagari mu kwegera abaturage be

Yanditswe na David Eugène Marshall
Kuya 15 Werurwe 2018 saa 08:27
Yasuwe :
2 4

Umunyamabanga Nshingwabikorwa w’Umurenge wa Kabarore mu Karere ka Gatsibo, Mupenzi Leon Pierre, yakoze ibidasanzwe afata ihema ajya guca ingando mu baturage ngo yumve ibitekerezo byabo urugo ku rundi, intego ari ukuzenguruka utugali twose tugize uyu murenge.

Umuyobozi w’Akarere ka Gatsibo mu Ntara y’Iburasirazuba, Gasana Richard, yatangaje ko mu gihe cy’icyumweru, uyu muyobozi yiyemeje kwegera abaturage be ahereye mu Kagali ka Marimba, aho yifatanya n’abaturage mu muganda n’ibindi bikorwa, akanagirana inama nabo.

Mu kiganiro na IGIHE, Gasana yavuze ko bakimara kumva impanuro za Perezida Kagame mu mwiherero w’abayobozi wabereye mu karere ayoboye, biyemeje guca ingando mu baturage ngo bagende urugo ku rundi baganira nabo.

Yakomeje agira ati “[Kugira ngo] batubwire ibibazo bafite tubafashe kubikemura imbonankubone, kandi turabona biri gutanga umusaruro, mu rwego rwo kugabanya gukorera akazi mu biro”.

Gusa ngo Umunyamabanga Nshingwabikorwa w’Umurenge wa Kabarore we yakoze agashya, kuko n’ubwo gahunda yo gusanga abaturage mu Tugari ako karere kayisanganywe buri wa kabiri w’icyumweru.

Gasana yakomeje agira ati “Uyu we yagiye ahaca ingando, ararana n’abaturage irondo, akorana nabo siporo ya mu gitondo, agahita anahakomereza ibikorwa bye, kandi turabikurikiranira hafi. Mu bigaragara ni igikorwa cyiza cyo gushimwa”.

Umunyamabanga Nshingwabikorwa w’Umurenge wa Kabarore, Mupenzi Leon Pierre, yavuze ko muri uru rugendo hibandwa ku gushakisha abana bataye ishuri, abafite ikibazo cy’imirire mibi, gusuzuma uko amarondo akora, kureba uko Girinka yifashe, ubwiherero no kumenya ingo zitabanye neza.

Ibi bikorwa byose ngo bikorwa n’inzego zose z’Umurenge ziba zamanukiye rimwe harimo abaganga, DASSO, abarezi n’abandi.

Gitifu ngo yatunguwe n’abayobozi batagira ubwiherero

Nk’uko iki gikorwa kiri kuba urugo ku rundi, icyatunguranye ngo ni nk’aho bamwe mu bagize za Komite Nyobozi z’umudugudu n’Utugari byagaragaye ko batujuje ibisabwa abandi baturage nk’ubwiherero ndetse kurarana n’amatungo mu nzu babigize umuco.

Mupenzi yagize ati: “Urumva ko niba umuyobozi muri Nyobozi atumva ikibazo se, ntagire isuku, akararana n’amatungo, umuturage ashinzwe we bizagenda bite”?

Mu minsi ibiri iki gikorwa kimaze, imibare iri guhurizwa hamwe ku midugudu ine imaze kugenzurwa igaragaza ko abana 20 bo mu miryango 13 basanzwe barataye ishuri, ubuyobozi bugahita bukorana amasezerano n’imiryango yabo bagasubizwa kwiga.

Muri gahunda ya Girinka hasanzwe ibiraro 13 bidasakaye. Ba nyirazo basabwe kwihutira gusakara ibyo biraro, ab’ubwiherero nabo abishoboye bakabwubaka neza, abatishoboye bagahabwa inkunga yo kubwubaka byihuse kandi ntawuhutajwe.

Umunyamabanga Nshingwabikorwa w’Umurenge wa Kabarore yakoze ibidasanzwe afata ihema ajya guca ingando mu baturage
Aha Gitifu yiteguraga akazi mu gitondo abyutse mu ihema ku biro by'Akagari ka Marimba kamwe mu tugize umurenge ayobora
Mupenzi Leon Pierre yatangaje ko yizeye umusaruro wa gahunda yihaye yo kwegera abaturage

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza