Ese urugo rwaramba nta mibonano mpuzabitsina?

Yanditswe na Umutoni Rosine
Kuya 26 Kamena 2019 saa 03:54
Yasuwe :
0 0

Nubwo ingo zibana zidakora imibonano mpuzabitsina zidakunze kuganirwaho cyane, ariko zirahari ku bwinshi ndetse birenze uko benshi babitekereza.

Umushakashatsi Seth Stephens-Davidowitz mu 2015 yatangaje ko mu ishakiro rya ‘Google’ ingingo y’ingo zitarangwamo imibonano mpuzabitsina bakubye inshuro eshati n’igice abashakisha ingingo y’ingo zitishimye.

Yakomeje agaragaza ko abashakisha amakuru ku ngo zitarangwamo imibonano mpuzabitsina bakubye inshuro umunani abashaka amakuru y’ingo zitarangwamo urukundo.

Nubwo nta gisobanuro gihamye gihari, abahanga bavuga ko iyo abashakanye bakora imibonano mpuzabitsina munsi y’inshuro icumi ku mwaka, urwo rugo rubarwa nk’aho nta mibonano mpuzabitsina irurangwamo.

Birashoboka ko urugo rwabaho nta mibonano mpuzabitsina

Ubushakashatsi bwakozwe mu 2015, Abanyamerika 61% bubatse ingo bavuga ko imibonano mpuzabitsina ari ngenzi ku bashakanye.

Inzobere bijyanye n’imibonano mpuzabitsina, Irene Fehr avuga ko abantu benshi baha inyito nyinshi imibonano mpuzabitsina zirimo kuba ifasha mu kuryoherwa n’urukundo, kumva uri hafi y’uwo mwashakanye n’ibyiyumviro udashobora gukura ku bandi.

Umujyanama mu bijyane n’imibonano mpuzabitsina, Celeste Hirschman, yavuze ko kuba abantu babana badakora imibonano mpuzabitsina bitavuze ko baba babanye nabi.

Yagize ati “Urugo rushobora kuramba nta mibonano mpuzabitsina irurangwamo mu gihe nta n’umwe ubangamiwe haba umugabo cyangwa umugore. Hari abantu badafata imibonano mpuzabitsina nk’igikorwa cy’ibanze, mu gihe hari abandi bagiha agaciro kanini”.

Umujyanama mu bijyanye n’imibobonano mpuzabitsina muri Los Angeles, Nazanin Moali we agira ati “abashakanye bahuje gushaka guke ko gukora imibonano mpuzabitsina cyangwa ku rwego rungana kuburyo bayikora munsi y’inshuro icumi ku mwaka, umubano wabo ushobora kuba mwiza cyane nk’uwabayikora buri munsi”.

Umwe mu bashakanye ashobora kugira ikibazo cyagira ingaruka mu gikorwa cy’imibonano mpuzabitsina

Kanseri, diyabete, umuvuduko w’amaraso ndetse n’agahinda gakabije biri mu bigabanya ubushake ndetse n’ubushobozi bwo gukora imibonano mpuzabitsina.

Ibi bibazo bishobora kuba iby’igihe gito cyangwa iby’igihe kirekire. Abashakanye nibo bahitamo nimba inyo bazabyihanganira nkuko inkuru dukesha Huffington Post ibisobanura.

Moali avuga ko iyo abashakanye batahuye ko impavu ituma badakora neza imibonano mpuzabitsina ishobora kuvurwa igakira, bashobora kwihanganira kubaho ntayo bakora by’igihe gito. Ariko iyo basanze ikibazo kitazakira, bishobora kubatera guhangayika gukomeye.

Hari abashakanye baha agaciro kuba babana kurusha imibonano mpuzabitsina

Moali avuga ko abashakanye bashobora kubana neza nta mibonano mpuzabitsina mugi he bafite intego runaka bahuriyeho cyangwa indagagaciro. Bashobora kuba bahujwe no kuba bakorana ubucuruzi, kurera abana babo cyangwa kuzamurana mu bijyanye n’imari.

Hari ingo nyinshi zishobora kuramba mu gihe imibonano mpuzabitsina bayifata nko kwishimisha. Ibi bishobora gutuma bishimira ibindi n’imibonano mpuzabitsina ikazamo ariko Atari yo shinganwa ku mubano wabo.

Impuguke mu bijyanye n’imibonano mpuzabitsina, Fehr, avuga ko urugo rutarangwamo imibonano mpuzabitsina ruramba mu gihe abashakanye baguje ubushake n’imyumvure kuri icyo gikorwa. Bitabaye ibyo, bitera umubabaro n’uburakari hagati yabo.

Moali avuga ko mu gihe umwe mu bashakanye agira ubushake bwinshi kurusha undi, bitabagwa neza.

Ibyo wakora kugira ngo wongere ubuzima bwo gukora imibonano mpuzabitsina

Niba wowe n’uwo mwashakanye mudashimishijwe n’ibihe byo kubaho mudakora imibonano mpuzabitsina, wita ibyiringiro. Hari bimwe wakora mu gihe impande zombi mubyumvikanaho.

Isuzume: Banza usubize amaso inyuma urebe igiye ubushake buke mu mibonano mpuzabitsina bwatangiriye.

Uzibaze niba nta myitwarire, ibikorwa cyangwa ibiganiro byatumye habaho impinduka. Ni byiza nanone gusubira inyuma ugatekereza ku nzira wigeze gukoresha mu gukemura kibazo.

Ganira n’uwo mwashakanye : Akenshi usanga abashakanye bataganira cyane ku bihe barimo byo kudakora imibonano mpuzabitsina nkuko bikwiriye. Nyamara ni byiza kuganira n’uwo mwashakanye mukabwizanya ukuri ku mpamvu ituma nta mibonano mpuzabitsina ibaho.

Si byiza kandi gushinja cyangwa guharabika uwo mwashakanye ko ari we utera ikibazo.

Sohokana uwo mwashakanye: Tegura ijoro ry’urukundo n’uwo mwashakanye mwicare ahantu musangire. Ushobora no kwirambika ku buriri, mukumva uturirimbo, mukaganira byashoboka mukaba munarebana filimi.

Gerageza gushyiraho ingengabihe yo gukora imibonano mpuzabitsina: Wowe n’uwo mwashakanye mushobora gushyiraho iminsi cyangwa itariki muzajya mukoreraho imibonano mpuzabitsina. Si ngombwa ko uwatangiye igikorwa uyu munsi ari we uzanatangira ku yindi nshuro.

Gerageza kuganira n’abajyanama ku mibonano mpuzabitsina: Niba wumva utakigira ubushake bwo gukora imibinano mpuzabitsina, gerageza uganire n’abajyanama ku byerekeye imibonano mpuzabitsina cyangwa izindi mpuguke kugira ngo ibintu bisubire mu buryo.

Moali avuga ko mu gihe hashize amezi atandatu ubona hari icyahindutse mu buryo mwakoragamo imibonano mpuzabitsina, ni byiza kugana impuguke.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza