Bwa mbere u Burayi bwemeje agasimba kameze nka nkongwa nk’ikiribwa

Yanditswe na Muhonzire Sylvine
Kuya 18 Mutarama 2021 saa 11:22
Yasuwe :
0 0

Ku wa Gatatu w’icyumweru gishize, Ikigo Gishinzwe Ubuziranenge bw’Ibiribwa i Burayi (EFSA) cyemeje agasimba ko mu bwoko bw’ibikururanda, nk’ikiribwa kitagira ingaruka k’ubuzima bw’umuntu, kandi kifitemo intungamubiri nyinshi.

Aka gasimba ubusanzwe kitwa mealworm mu Cyongereza, kameze nka Nkongwa iba mu bigori byo mu Rwanda bivugwa ko iyo ukariye uba wumva kameze nk’ubunyobwa, kazajya kabanza kumishwe kabone kuribwa. Nyuma yo kukumisha gashobora gukorwamo ifu izajya ikoreshwa mu biryo, mu gukora imigati, ibisuguti n’ibindi.

Gafite intungamubiri zirimo poroteyine n’ amavuta. Gusa ntabwo ari buri wese ugirwa inama yo kurya kariya gasimba, cyangwa ibyakoreshejwemo ifu yako, kuko gashobora gutera kuzinukwa (allergie) umuntu usanzwe uzigira.

Icyemezo cyo gushyira ako gasimba mu muryango w’ibiribwa, cyafashwe nyuma y’igenzurwa ryakozwe n’abahanga mu bya siyansi bakora muri EFSA kubera ko iki kigo cyari cyabisabwe na Sosiyete y’u Bufaransa ikora ibijyanye n’ibiribwa biva mu dukoko yitwa Agronutris.

Ermolaos Ververis, umuhanga mu bya siyansi akaba n’ umushakashatsi muri EFSA, yavuze ko imbogamizi ya mbere bagize ari ukugenzura ibigize ako gasimba no kureba icyo kamarira umubiri, cyane ko udusimba two muri ubu bwoko tuzwiho kugira poroteyine nyishi, ishobora no kuba irengeje urugero.

EFSA bivugwa ko yatangiye kwakira ubusabe bwinshi bw’ibiribwa birimo utu dusimba.

Mu Bubiligi ho hari hasanzwe hari ibiribwa bikoreshwamo utwo dusimba mu masoko. Byitezwe ko iki cyemezo kizatuma isoko ryabyo ryaguka hirya no hino.

Udusimba twenda kumera nka Nkongwa yo mu Rwanda twemejwe nk'ikiribwa kitatera umuntu ikibazo i Burayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .