Bimwe mu bishobora gutera abagore gukundana n’abasore bakiri bato

Yanditswe na Ishimwe Israel
Kuya 4 Nzeri 2016 saa 01:39
Yasuwe :
0 0

Gucibwa inyuma n’abo bashakanye, kutitabwaho nk’uko babyifuza, gufatwa nk’abamaze gusaza,ni zimwe mu mpamvu bamwe mu bagore bo mu Mujyi wa Kigali bagaragaza ko zituma baca inyuma abagabo babo bakikundanira n’abasore bakiri bato.

Muri kamere y’abakobwa ntibakunze gukundana n’abasore baruta, ku buryo usanga n’iyo hagaragaye umugore ukundana n’umuhungu aruta hari ababifata nk’amahano.

Icyakora kami ka muntu ni umutima we, ababikora baba bagamije inyungu zabo ariko ntibyabuza abantu kubyibazaho dore ko bitandukanye cyane n’umuco nyarwanda.

IGIHE yegereye abantu batandukanye mu Mujyi wa Kigali, batangaza bimwe mu byo batekereza ko bishobora kuba bituma bamwe mu bagore bakuru bahitamo guca inyuma abagabo babo bagakundana n’abasore bakiri bato mu myaka.

Uwase yabwiye IGIHE ko ahanini umugore atangira guca inyuma uwo bashakanye iyo yamaze kumubonaho ingeso y’ubusambanyi cyangwa iyo atamwitaho nk’uko bikwiye.

Yagize ati “ Erega umugore ntiyapfa kuguca inyuma nawe atari yakubonaho iyo ngeso n’umunsi n’umwe. Akenshi usanga atangira kujya muri iyo ngeso mu rwego rwo guhima umugabo we gusa.”

Mukandori Sarah w’imyaka 31, wo mu Murenge wa Gitega nawe yagize ati “ Nanjye nemera ko iyo umugabo atita ku mugore we uko bikwiye ngo amuzirikane nk’uko bivugwa agatangira kumwereka ko atamwitayeho asa nk’aho umugaragariza ko yashaje yavuye mu kibuga aribwo atangira kumuca inyuma akishakira abandi cyane cyane iyo na we akiri muto.”

Yakomeje agaragaza ko abagore benshi basigaye bakundana n’abasore bato biterwa n’uko abagabo babo nta gaciro baba bakibaha nk’abo bashakanye mu gihe abo bahungu bakiri bato bo babereka ko babafitiye urukundo kandi batitaye ku kuba barashatse cyangwa barabyaye.

Abasore bo babivugaho iki?

Maniriho yemeza ko abagabo batita ku bagore babo cyane ari bo batuma babaca inyuma.

Yagize ati “ Nonese nkubeshye iyo umugabo atita ku mugore we ngo amushimishe, byanze bikunze amuca inyuma. Nanjye umugore dukundana yambwiye ko impamvu atamwiyumvamo [umugabo we],ari uko atamwitaho ngo amuhe icyubahiro kimukwiye ahubwo ahora amwuka inabi gusa.”

Undi musore utarashatse ko izina rye ritangazwa we yagize ati “Ariko se ni gute umuntu yakugurira imodoka cyangwa akajya ahora akwambika buri kintu cyose kigezweho aguha icyo wifuje cyose anakwereka ko agukunda ukamwitesha? Niba utari unabizi rero ubimenye;ibyo nibyo bituma dukundana na bo aho gushaka abakobwa batunyunyuza ayacu.”

Uyu musore avuga ko abagore bakuze cyangwa bashatse bamwitaho bakamumenyera buri kintu cyose ashatse mu gihe abakobwa bakundanye bo bahoraga bategereje ko ari we ugomba kubitaho.

Abagore bakuze bagurira abasore imodoka n'ibindi by'agaciro kugira ngo barusheho kubakunda
Benshi mu basore bakundana n'abagore bakuru baba babakurikiranyeho amafaranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244