Abapasiteri 10 b’abaherwe ku isi

Yanditswe na Zigiranyirazo Bajecteur
Kuya 3 Ugushyingo 2017 saa 10:41
Yasuwe :
1 0

Mu myaka yo hambere, abapasiteri bafatwaga nk’abantu b’abakene, bambara inkweto zihengamye, baciye bugufi kandi babayeho mu buzima buciriritse ariko imibereho yabo ihinduka buri munsi ndetse kuri ubu abenshi bagenda mu modoka nziza zihenze, batuye mu nzu zibengerana, banatunze ibya Mirenge.

Mu kinyejana cya 20 ubumisiyoneri bwafashe indi ntera ku mugabane wa Afurika no mu bindi bihugu bitandukanye ku isi aho abiyemeje kwamamaza ubutumwa bwiza cyane Abanya-Espagne n’Abanya-Portugal bageze ahantu henshi babwira abantu kureka Imana gakondo zabo bakayoboka Iyera yo mu ijuru.

Iyi nzira yatangijwe n’abamisiyoneri b’abera yaje gushora imizi muri Afurika, irayobokwa kugeza ubwo abantu batangiye gushinga amatorero bakurikirwa na benshi bituma bagwiza amaboko, abafatwaga nk’ab’amikoro make bahinduka abanyacyubahiro n’abanyabutunzi.

Mu isi ya none, abihayimana bari mu mubare w’abubahwa na benshi bitewe n’ijambo bagabura ndetse n’imitungo yabo. Urutonde rw’abapasiteri 20 baza ku isonga mu bakize ku isi ruyobowe n’Umunya- Brésil, Edir Macedo Bezerra mu gihe Nigeria yihariyemo barindwi nkuko urutonde rwa Forbes Magazine rubigaragaza.

Uko abapasiteri 10 ba mbere b’abaherwe ku isi bakurikirana:

1. Bishop Edir Macedo

Umunya- Brésil Edir Macedo Bezerra ni we watangije akaba anayobora Universal Church of the Kingdom of God. Uyu mugabo w’imyaka 72 afite umutungo ubarirwa muri miliyari 1.1 y’amadolari ya Amerika.

Bishop Edir Macedo

2. Kenneth Copeland

Umunyamerika washinze Minisiteri y’ivugabutumwa akanayiyitirira izwi nka Kenneth Copeland Ministries (KCM).Pasiteri Kenneth Copeland ufite imyaka 80 afite umutungo ubarirwa mu kayabo k’amadolari agera kuri miliyoni 760.

Kenneth Copeland

3. Pat Robertson

Marion Gordon "Pat" Robertson afite umwihariko wo kuba yaratangije ibigo n’imiryango myinshi itandukanye nka CBN (Christian Broadcasting Network), ACLJ ( The American Center of Law & Justice), Boeing 757 Flying Hospital n’ibindi. Uyu Munyamerika atunze miliyoni 500 z’amadolari.

Pat Robertson

4. George Foreman

George Edward Foreman yahoze ari umukinnyi w’iteramakofe mbere y’uko atangira umurimo w’ivugabutumwa mu itorero rizwi nka The Church of Lord Jesus Christ mu Mujyi wa Houston.

George utunze akayabo ka miliyoni 250 z’amadolari anaherutse gushyira ku mugaragaro igitabo yise God in My Corner: A Spiritual Memoir.

George Edward Foreman

5. Bishop David Oyedepo

Umunyafurika uza hafi kuri uru rutonde ni Bishop David Oyedepo, umubwirizabutumwa w’umunya- Nigeria ufite umutungo ungana na miliyoni 150 z’amadolari ya Amerika.

Uyu mugabo afite kaminuza ebyiri kugeza ubu zirimo iyitwa Landmark na Convenant. Oyedepo ni na we washinze itorero rya Living Faith Church Worldwide izwi cyane nka Winners Chapel International World Headquater. Anafite imiryango yatangije irimo Faith Tabernacle, Canaanland, Ota n’iyindi.

Bishop David Oyedepo

6. Pasiteri Enoch Adejare Adeboye

Pasiteri Enoch Adejare Adeboye, uyu mukozi w’Imana w’umuherwe na we ni umunya-Nigeria uyoboye Redeemed Christian Church of God akaba abarirwa umutungo ungana na miliyoni 130 z’amadolari.

Pasiteri Enoch Adejare Adeboye

7. Bishop Ayodele Oritsejafor

Ayodele Joseph Oritsegbubemi Oritsejafor uzwi nka Papa Ayo Oritsejafor ni we washinze akaba anayobora Word of Life Bible Church. Bishop Ayodele unafite imigabane mu bijyanye n’amabanki, itangazamakuru ndetse n’ubwikorezi; umutungo we ubarirwa muri miliyoni 120 z’amadolari.

Bishop Ayodele Oritsejafor

8. Prophet Uebert Angel

Prophet Uebert Angel yashinze Spirit Embassy mu 2007 nyuma aza kuyihindurira izina mu 2015 ayita Good News Church.

Uyu muhanuzi ni icyamamare muri Zimbabwe aho bivugwa ko atunze akayabo ka miliyoni 60 z’amadolari.

Prophet Uebert Angel

9. Chris Oyakhilome

Uyu azwiho kuba yarigaruriye imitima y’abayoboke biganjemo abanyapolitiki n’abashoramari babarirwa mu bihumbi 40 mu itorero yatangije ryitwa Christ Embassy muri Nigeria. Afite umutungo ugera kuri miliyoni 50 z’amadolari ya Amerika.

Chris Oyakhilome

10. Benny Hinn

Toufik Benedictus "Benny" Hinn, Umu-Canada ufite inkomoko muri Israel akaba azwi cyane muri gahunda ya Miracle Crusade ikunze guhuruza imbaga mu ma stade manini. Umutungo w’uyu munyabitangaza ubarirwa muri miliyoni 42 z’amadolari.

Benny Hinn

Mu bandi bapasiteri bari mu bafite imitungo myinshi bazwi cyane barimo Billy Graham uza ku mwanya wa 15, afite miliyoni $25; Rick Warren wa 16 watangije Saddleback Church Lake Forest California, afite miliyoni $25 ndetse n’Umuhanuzi T.B. Joshua uri ku mwanya wa 19. Uyu munyabitangaza ukomoka muri Nigeria ayobora Synagogue Church of All Nations, akaba afite umutungo ubarirwa muri miliyoni $15.

bajecteur@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza