Abanyamerika ibihumbi 45 bamaze kwemeranya ku mugambi wo kwigabiza ’Area 51’ ivugwamo ibivejuru

Yanditswe na Ferdinand Maniraguha
Kuya 14 Nyakanga 2019 saa 03:19
Yasuwe :
0 0

Ibihumbi bisaga 45 by’abanyamerika, babinyujije kuri Facebook bagaragaje ko bifuza kujya gusura agace kazwi nka Area 51 kavugwamo kuba indiri y’ibivejuru (aliens).

Ako gace gaherereye muri Leta ya Nevada iri mu burengerazuba bwa Amerika. Hubatse ikigo cya gisirikare cy’Abanyamerika, kimwe mu bya mbere birindiwe umutekano ku Isi.

Guhera mu myaka ya 1950, inshingano nyamukuru z’icyo kigo cya gisirikare ntabwo zizwi neza dore ko na Leta ya Amerika itajya ibitangaza.

Bivugwa ko ako gace kaba kabarizwamo ibinyabuzima bidasanzwe bizwi nk’ibivejuru ndetse bamwe bavuga ko haba hakorerwa ubushakashatsi kuri ibyo binyabuzima.

Muri iki cyumweru umwe mu bakoresha urubuga rwa Facebook yanditse ubutumwa bukangurira abanyamerika kumushyigikira, bakigabiza ako gace karinzwe cyane bakajya kureba koko niba ibivejuru bibaho.

Kugeza ku wa Gatanu, abantu basaga ibihumbi 45 bari bamaze kugaragaza ko bashaka kwifatanya bakigabiza Area 51 bakirebera ukuri kw’ibihavugwa.

Uwatangije iyo nkubiri mu buryo busa n’ubusekeje, yabyise ngo ‘Twese duhurire muri Area 51, nta we ushobora kuduhagarika.” Mu mabwiriza ngo abashaka kuhinjira bagomba kuzajyayo biruka ku buryo nta muntu cyangwa amasasu azabasha kubahagarika.

Kuva mu myaka ya kera ako gace ko muri Nevada kavugwamo kuba ubuturo bw’ibinyabuzima bidasanzwe.

Mu mwaka wa 1950 mu gihe cy’intambara y’ubutita nibwo Perezida Harry S Truman yahashyize ikigo cya gisirikare hagamijwe kugereragerezwa indege nshya z’intambara.

Abashaka kwinjira ku ngufu muri ako gace bavuga ko bazagenda tariki 20 Nzeri uyu mwaka.

N’iyo byaba gukina, ikinyamakuru Le Point cyatangaje ko bigaragaza amatsiko abantu bafitiye ako gace kakunze kugirwa ubwiru kuva kera.

Iyo wifashishije irangamerekezo rya Google Map ushaka Area 51, aho ako gace kari haza umutwe w’ikivejuru, nyamara ku makarita ndangamerekezo yemewe ntabwo ako gace ushobora kukabonaho.

Ako gace karinzwe n’imitwe myinshi y’abasirikare ndetse kazengurutswe n’ikoranabuhanga rigenzura buri cyose gishaka kuhinjira. Bivugwa ko n’abasirikare ba Amerika bakorera hafi aho iyo hari uwibeshye akajya aho atemerewe abihanirwa bikomeye.

Muri Zone 51 bivugwa ko habamo ibivejuru
Aka gace nta muntu wemerewe kukinjiramo kuko karimo ikigo cya gisirikare cy'abanyamerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza