Abagore bafatwa nk’abanyabuntu kurusha abagabo

Yanditswe na Habimana Jean Baptiste
Kuya 31 Ukwakira 2017 saa 07:45
Yasuwe :
0 0

Itsinda ry’abashakashatsi mu bya siyansi muri Kaminuza ya Zurich mu Busuwisi ryagaragaje ko ubwonko bw’abagabo n’ubw’abagore bukora mu buryo butandukanye ku bijyanye n’imyitwarire ibaranga.

Aba bashakashatsi bavuga ko mu gihe umugore agaragaje imyitwarire y’ubugwaneza n’ubuntu binyura benshi kurusha uko byakorwa n’umugabo kuko akenshi afatwa nk’uwikomeza.

Imikorere y’ubwonko izwi nka “stratium”, igenzura ihererekanya ry’amakuru mu gihe buri gukora, kandi igafasha gukora ibintu bitanga umunezero mu buzima busanzwe; iri mu bisobanura ko abagore bifitemo imyitwarire y’ubugwaneza n’ubuntu, mu gihe abagabo bo baba bifitemo ibitekerezo byo kwikubira.

Abashakashatsi bakoreye inyigo y’imyitwarire ku bagabo n’abagore 56, bose basubizaga ibibazo birimo no gufata imyanzuro, hanyuma impuguke mu mikorere y’ubwonko zasesenguye uduce dutandukanye twabwo tugira uruhare mu mitekerereze y’umuntu.

The Independent dukesha iyi nkuru itangaza ko izi zagaragaje ko ubwonko bw’abagabo n’abagore bukora mu buryo butandukanye, cyane cyane ku marangamutima y’ubuntu n’ubugwaneza.

Umuyobozi w’Itsinda ry’Abashakashatsi, Alexander Soutschek, yavuze ko hakenewe gukora inyigo zimbitse kuri iyi mitandukanire y’ubwonko bw’abagabo n’abagore.

Yakomeje avuga ko inyigo zitandukanye zigaragaza ko abakobwa bagira imyitwarire y’ubuntu kurusha abahungu. Iri tandukaniro mu mitekerereze hamwe n’inyigo zakozwe, rimwe na rimwe biba bishingiye ku muco w’agace runaka.

Nubwo ubushakashatsi bugaragaza itandukaniro mu mikorere y’ubwonko bw’abagabo n’abagore ku bijyanye n’ubugwaneza no kugira ubuntu, hari izindi nyigo zivuga ko ibi hari n’igihe bishingira ku buryo umuntu yarezwe n’aho yarerewe.

Ku ruhande rumwe, abakobwa bafatwa nk’abagira ubuntu no kwikubira, abahungu bakaba abanyengufu. Ku rundi ruhande, ushobora kwibwira ko ugwa neza kubera uri umugore ariko ugasanga biterwa n’aho uri habiguhatira.

Itandukaniro mu kugira ubuntu hagati y’abagabo n’abagore rivugwa muri ubu bushakashatsi, rishimangirwa n’imvugo yamamaye igaragaza ko abagabo baturutse ku mubumbe wa Mars naho abagore bagaturuka ku wa Venus.

Ubu bushakashatsi bugaragaza ko n’abagore ngo bashobora kugira imyitwarire yo kwikubira no kwikunda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza