IGIHE.com > Amakuru > U Rwanda
Urukiko rwasubitse urubanza rw’abarwaniye ku irimbi

Urukiko rwasubitse urubanza rw’abarwaniye ku irimbi


Yanditswe kuya 26-03-2013 - Saa 19:14' na Emmanuel Kwizera

Urukiko rw’Ibanze rwa Nyamirambo kuri uyu wa kabiri tariki ya 26 Werurwe, rwasubitse urubanza ruregwamo Abayisilamu batatu, bahohoteye bagenzi babo mu muhango wo gushyingura nyakwigendera Hadji Nzamwita Omar kuwa 13 Werurwe 2012. Urubanza rwimuriwe ku wa 14 Mutarama 2014.

Nyuma y’ubwumvikane buke bwabereye mu irimbi rya Nyamirambo ku wa 13 Werurwe 2012 bukorewe abagabo babiri ari bo Sheik Mbarushimana Suleiman wahoze ari Umunyamabanga Nshingwabikorwa Wungirije wa AMUR na Sheik Mussa Sindayigaya wahoze ari Mufti w’u Rwanda wungirije.

Umuhango wo gushyingura nyakwigendera Hadji Nzamwita Omar waranzwe n’amakimbirane yavukiye ku irimbi aho bamwe mu bayobozi bakuru ba Islam mu Rwanda bashinjaga bagenzi babo bari kumwe mu buyobozi ko ari bo bamwivuganye.

Inkomoko y’amakimbirane

Ubwo uyu muhango wo gushyingura nyakwigendera Hadji Nzamwita Omar wari ugeze hagati, ni bwo ngo haje uwitwa Sheik Shwayibu Mvuyekure wahoze ari umuyobozi w’Abayisilamu mu Ntara y’Iburengerazuba, avuga ko ari we wahawe uburenganzira na Mufti mukuru w’Abisilamu Gahutu Abdoul Kalim bwo kuyobora umuhango, kuko we yari i Burayi muri icyo gihe.

Ku rundi ruhande bo bakavuga ko ibyo byakozwe ngo binyuranije n’amategeko kuko iyo umukuru w’Abiyisilamu adahari, ahagararirwa na Mufti Wungirije.

Sheik Shwayibu yahise aha ijambo umunyamakuru wa Radio Voice of Africa witwa Rubangisa Suleiman ngo agire icyo avuga ku buzima bwa nyakwigendera, we ngo ahita avuga ko bababajwe n’urupfu rwa Hadji Nzamwita ariko ko ikibababaje cyane ari uko abagize uruhare muri urwo rupfu bari kumwe na bo aho mu irimbi nk’uko Sheik Mbarushimana Suleiman wahoze ari Umunyamabanga Nshingwabikorwa Wungirije yabitangaje.

Sheik Mbarushimana arakomeza ati “Rubangisa akimara kuvuga ayo magambo yahise adutunga urutoki aho nari mpagaze njyewe na mugenzi wanjye Sheik Mussa Sindayigaya wari Mufti w’u Rwanda wungirije, ako kanya tutaranasoza gushyigura, hahita haza itsinda ry’abantu tutari tuzi n’aho baturutse batugwa hejuru badusumira, buri wese ahunga akiza amagara ye, ngwa mu rwobo, ariko abandi barankiza.”

Akomeza avuga ko Sheik Mussa na we atari yorohewe. Ati “Munyanzeza Nurudini na we yirukankanye Mufti Wungirije afite igiti cy’igisongo ashaka kukimutera, abashinzwe umutekano baratabara.”

Abafashwe n’ibimenyetso ko bahohoteye aba bagabo dore ko n’abatangabuhamya ngo babihamije kuri polisi ko babyiboneye, ni Rubangisa Suleiman wavuze ko bagize uruhare mu gupfa kwa nyakwigendera, undi ni Bigabiro Youssouf wirukankanye uyu wahoze ari Umunyamabanga Nshingwabikorwa Wungirije, na Nurudini na we yirukankanye Mufti Wungirije.

Abavuga ko bahohotewe bahise birukanwa no ku mirimo yabo

Sheik Mbarushimana Suleiman anavuga ko hashize umwaka inshingano bari bafite we na mugenzi we bazambuwe n’icyiswe Inama Nkuru yateranye ku wa 18 Werurwe 2012, mu buryo buhabanye n’amategeko.

Impamvu ngo ni uko Inama Nkuru ari yo ifite inshingano zo guhagarika Mufti w’u Rwanda, Mufti Wungirije, n’Abanyamabanga Nshingwabikorwa bombi ariko iyobowe n’Ushinzwe Ubutabera mu Muryango w’Abiyisilamu mu Rwanda, mu gihe ngo icyabaye ari uko iyo yo guhagarika aba bayobozi yayobowe na Mufti Sheik Gahutu Adboul Kalim, aba yishe amategeko ya Islam, atamuha ububasha bwo kwirukana Mufti mugenzi we.

Barasaba ko uru rubanza rutakomeza kudindizwa kuko ngo kuva aya makimbirane yabaho, aba bagabo babiri bahise bahagarikwa ku mirimo yabo mu buryo budasobanutse, aho basanga bararenganijwe. Ubushinjacyaha ni bwo bwareze abo bakekwaho guhohotera bagenzi babo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO