Urubanza rwa Mugesera rwasubitswe

Urubanza rwa Leon Mugesera rwongeye gusubikwa bitunguranye
N’ubwo abantu bari biteze ko urubanza rugomba gukomeza kuri uyu wa 23 Mutarama, Dr León Mugesera ntiyakomeje kwisobanura ku birego ashinjwa kubera uburwayi.

Nyuma y’aho Mugesera abwiriye abacamanza ejo tariki ya 22 ko akeneye kubonana na muganga, kuko ngo yumva atameze neza, uyu munsi yaje avuga ko yumva ijwi rye ritameze neza n’umubiri we muri rusange, bityo avuga ko agomba kubanza kubonana na muganga akamubwira uko ubuzima bwe buhagaze.

Ku ruhande rw’ubushinjacyaha buhawe ijambo, bwatangaje ko ibyo Mugesera avuga nabo babyemera, kuko ngo umuntu ariwe uba yumva uko ahagaze, ariko basaba ko atagomba kwisabira abaganga kumugenera igihe azagarukira kuburana.

Ubushinjacyaha bwasabye abacamanza ko bategeka umuganga akareba indwara Mugesera arwaye, bakemeza niba urubanza rwakomeza bitemejwe na Mugesera.

Uwunganira Mugesera, Me Rudakemwa Jean felix, we yabwiye abacamanza ko abaganga aribo bonyine bafite ububasha bwo kwemeza igihe umukiriya we azagarukira, bityo ntawe ugomba kwivanga mu burengazira bw’abaganga.

Mugesera yagombaga kwisobanura ku kirego cyirebana n’igihe yavugiye ijambo ryo ku Kabaya mu 1992, kuko ubushinjacyaha bwemeza ko yarivuze mu gihe umutekano mu gihugu utari mwiza, bityo akaba asa nk’uwakongeje umuriro abiba urwango mu banyarwanda.

Dr Mugesera ari kumwe n'umwunganira mu mategeko,Me Rudakemwa Jean felix

Urubanza rukaba rwimuriwe ku wa mbere tariki ya 28 Mutarama 2013, Mugesera akomeza kwisobanura ku byaha aregwa, birimo gushishikariza abandi gukora Jenoside, gucura no gutegura umugambi wa Jenoside, ubufatanyacyaha mu gukora Jenoside no kubiba urwango rushingiye ku moko no ku nkomoko.